ރިސޯޓު ތަރައްގީ ކުރަން 13 ފަޅު، ހަލާލު ޓޫރިޒަމަށް 3 ތަނެއް ހުޅުވާލައިފި
ހަލާލް ޓޫރިޒަމް ތަރައްގީކުރުމަށް ހދ. މަކުނުދޫ ފަޅާއި، ލ. ފޮނަގާދޫގެ އިތުރުން އައްޑޫ ސިޓީގެ ދޮންހެރަ ކަނޑައަޅާފައިވާއިރު، ކުރިއަށް އޮތް ތިން އަހަރު ތެރޭގައި މަދުވެގެން 10 ރިސޯޓު ސަރުކާރުން ތަރައްގީކޮށް، ކޮންމެ ދިވެއްސަކަށް 400 ޑޮލަރު ލިބޭނެ ކަމަށް ވެސް މުއިއްޒު ވަނީ ވިދާޅުވެފައި.
ފަޅެއް ގައި ހިއްކައިގެން ތަރައްގީ ކުރަމުންދާ ރިސޯޓު ތަކެއް. | ރާއްޖެ އެމްވީ
މިނިސްޓްރީ އޮފް ޓޫރިޒަމުން ރާއްޖޭގެ 13 ފަޅަކާއި، ހަލާލް ޓޫރިޒަމަށް ކަނޑައަޅާފައިވާ ތިން ރަށެއްގައި ރިސޯޓު ތަރައްގީކުރުމަށް ބިޑަށް ހުޅުވާލާފި އެވެ.
ޓޫރިޒަމް މިނިސްޓްރީން ހާމަކޮށްފައިވާ ގޮތުގައި، ހަލާލް ޓޫރިޒަމް ތަރައްގީކުރުމަށް ހަމަޖެހިފައިވަނީ ހދ. މަކުނުދޫ ފަޅުގެ 200 ހެކްޓަރުގެ ސަރަހައްދަކާއި، ލ. ފޮނަގާދޫގެ އިތުރުން އައްޑޫ ސިޓީގެ ދޮންހެރަ އެވެ. މި ތަންތަނަށް ބީލަން ހުށަހެޅުމުގެ ސުންގަޑިއަކީ މާޗު މަހުގެ 6 ވަނަ ދުވަހުގެ ހެނދުނު 9:00 އެވެ. ހަލާލް ޓޫރިޒަމް ޒޯންތަކަކީ މުސްލިމް ފަތުރުވެރިންނަށް ޚާއްސަ އިސްކަމެއް ދީގެން، ހަލާލް މިންގަނޑުތަކަށް ފެތޭ ޚިދުމަތްތަކާއެކު ހިންގާ ތަންތަން ކަމަށް ސަރުކާރުން ބުނެ އެވެ. ނަމަވެސް މި ތަންތަނަކީ ހުރިހާ ފަތުރުވެރިންނަށް ވެސް ހުޅުވާލެވިފައިވާނެ ތަންތަން ކަމަށް ވެސް މިނިސްޓްރީން ބުނެ އެވެ.
މި ތަންތަނުގެ ތެރެއިން އައްޑޫ ސިޓީގެ ދޮންހެރަ މިހާރު ބިޑަށް ހުޅުވާލާފައިވާއިރު، ރައީސް ޑރ. މުޙައްމަދު މުޢިއްޒު މިދިޔަ ޖޫން މަހު އިއުލާނުކުރެއްވީ އައްޑޫ ހަންކެޑެ ސަރަހައްދުގައި ހަލާލް ޓޫރިޒަމް ތަރައްގީކުރުމަށެވެ. ނަމަވެސް އެކަމާ ގުޅިގެން އާންމުންގެ ފާޑުކިޔުންތައް އަމާޒުވުމުން، އޮކްޓޫބަރު މަހު ޓޫރިޒަމް މިނިސްޓްރީން ވަނީ އެ މަޝްރޫއު ދޮންހެރަ އަށް ބަދަލުކޮށްފައިވާކަމަށް ބުނެފަ އެވެ.
ހަލާލު ޓޫރިޒަމް ސަރަހައްދުތަކުގެ އިތުރުން، ރާއްޖޭގެ އުތުރުގެ އަތޮޅުތަކުގެ 13 ފަޅެއްގައި ރިސޯޓު ތަރައްގީކުރުމަށް ވެސް މިނިސްޓްރީން ވަނީ ބިޑަށް ހުޅުވާލާފަ އެވެ. މީގެ ތެރޭގައި ހިމެނެނީ ހއ. މާދުނި ފަރުގެ ތިން ސަރަހައްދަކާއި، ކެލާގެ ފަޅުގެ ދެ ސަރަހައްދަކާއި، މަކުނުދޫ ފަޅުގެ ދެ ސަރަހައްދަކާއި، މާފަރު ފަޅުގެ ތިން ސަރަހައްދެއްގެ އިތުރުން ށ. ގޮނާ ފަޅުގެ ތިން ސަރަހައްދެކެވެ.
ހަލާލް ޓޫރިޒަމަށް ކަނޑައަޅާފައިވާ ސަރަހައްދުތަކަށް ބިޑު ހުށަހެޅުމުގެ ސުންގަޑިއަކީ އޭޕްރީލް މަހުގެ 6 ވަނަ ދުވަހުގެ ހެނދުނު 09:00 އެވެ. އަދި ފަޅުތަކުގައި ރިސޯޓު ތަރައްގީކުރުމަށް ބިޑް ހުށަހެޅުމުގެ ފުރުސަތު އެ ދުވަހުގެ ހެނދުނު 11:00 އާ ހަމައަށް ވަނީ ހުޅުވާލާފަ އެވެ. ބިޑް ޑޮކިއުމަންޓްތައް އޭޕްރީލް 5 ވަނަ ދުވަހާ ހަމައަށް ރަސްމީ ގަޑީގައި ޓޫރިޒަމް މިނިސްޓްރީގެ ރިސެޕްޝަނުން ލިބެން ހުންނާނެ ކަމަށާއި، އީމެއިލް މެދުވެރިކޮށްވެސް ޑޮކިއުމަންޓްތަކަށް އެދެވޭނެ ކަމަށް އެ މިނިސްޓްރީން ބުނެ އެވެ.
މިދިޔަ ހަފްތާގެ ބުރާސްފަތި ދުވަހު ރިޔާސީ ބަޔާން އިއްވަވަމުން ރައީސް މުޢިއްޒު ވިދާޅުވީ، ކުރިއަށް އޮތް ތިން އަހަރު ދުވަހުގެ ތެރޭގައި މަދުވެގެން 10 އާ ރިސޯޓު ސަރުކާރުން ތަރައްގީކުރުމަކީ ސަރުކާރުގެ އަމާޒެއް ކަމަށެވެ. އަދި ކޮންމެ ދިވެހި ރައްޔިތަކީވެސް ހިއްސާދާރަކަށް ވާނެ ފަދަ މޮޑެލްއެއްގެ ދަށުން މި ރިސޯޓުތަކުން ލިބޭ ފައިދާ އިން ކޮންމެ ރައްޔިތެއްގެ އެކައުންޓަށް ޑޮލަރު ޖަމާވާނެ އިންތިޒާމެއް ހަމަޖައްސަވާނެ ކަމަށް އެމަނިކުފާނު ވިދާޅުވި އެވެ. މުއިއްޒު ވިދާޅުވީ، މި ރިސޯޓުތައް ތަރައްގީ ކުރުމުން ކޮންމެ ރައްޔިތަކަށް އަހަރަކު ގާތްގަނޑަކަށް 400 އެމެރިކާ ޑޮލަރުގެ އާމްދަނީއެއް ލިބޭނެ ކަމަށެވެ.
