އެމްޑީޕީގެ ހޫނު ރައްދެއް ފަސްޓްލޭޑީ ސާޖިދާ އަށް: މި 2 އަހަރު ރައްޔިތުންނަށް މި ސަރުކާރުން ނުދެނީ ކޮން ގެއްލުމެއްތޯ؟
ސަރުކާރުގެ ކެންޑިޑޭޓުންނަށް ވޯޓު ނުދީފިނަމަ ރައްޔިތުންނަށް ގެއްލުންވާނެ ކަމަށް ފަސްޓްލޭޑީ ސާޖިދާ މުހައްމަދު ވިދާޅުވި ވާހަކައަށް އެމްޑީޕީން ވަރުގަދަ ރައްދެއް ދީފި. އެ ޕާޓީން ބޭއްވި ނޫސްވެރިންގެ ބައްދަލުވުމުގައި ބުނީ، ވޭތުވެދިޔަ ދެ އަހަރު ސަރުކާރުން ރައްޔިތުންނަށް ނުދޭ ގެއްލުމެއް ނެތް ކަމަށާއި، ކައުންސިލްތަކުގެ ބާރު ސަރުކާރަށް ދޫކޮށްނުލުމަށް އިލްތިމާސްކުރާ ކަމަށް. މީގެއިތުރުން، އިންތިޚާބާ ދިމާކޮށް ސަރުކާރުން ކުންފުނިތަކުގެ މުވައްޒަފުންނަށް ބިރުދައްކަމުންދާ ކަމަށްވެސް އެމްޑީޕީން ވަނީ ތުހުމަތުކޮށްފަ.
އެމްޑީޕީ ކައުންސިލް އިންތިޚާބުގެ ތަރުޖަމާން އަބްދުﷲ ވަހީދު | ރާއްޖެއެމްވީ
ރައީސް ޑރ. މުހައްމަދު މުއިއްޒުގެ މި ސަރުކާރުގެ 2 އަހަރުގައި ރައްޔިތުންނަށް ނުދެނީ ކޮން ގެއްލުމެއް ތޯ ވިދާޅުވެދެއްވެވޭނެތޯ އެމްޑީޕީ އިން ރައީސް މުއިއްޒުގެ އަނބިކަނބަލުން ސާޖިދާ މުހައްމަދު އާ ސުވާލު ކޮށްފި އެވެ.
ކުރިއަށް އޮތް ލޯކަލް ކައުންސިލް އިންތިޚާބު ގައި ސަރުކާރަށް އެއްބާރުލުން ދޭނެ ކެންޑިޑޭޓުން ނުހޮވައިފިނަމަ، ރައްޔިތުންނަށް ގެއްލުންވާނެ ކަމަށް ސާޖިދާ ވަނީ މިފަހުން ވިދާޅުވެފަ އެވެ. މިކަމަށް އެމްޑީޕީ އިން މިވަނީ ހޫނު ރައްދެއް ދީފަ އެވެ.
އެގޮތުން އެ ޕާޓީ އިން ހޮނިހިރު ދުވަހު ބޭއްވި ނޫސްވެރިންގެ ބައްދަލުވުމުގައި ކައުންސިލް އިންތިޚާބަށް އެމްޑީޕީން ހަމަޖައްސާފައިވާ ތަރުޖަމާން ދިއްދޫ ދާއިރާގެ ރައީސް އަބްދުﷲ ވަހީދު ވިދާޅުވީ ޕީއެންސީގެ ކެންޑިޑޭޓުންނަށް ވޯޓު ނުދީފިނަމަ ރައްޔިތުންނަށް ގެއްލުން ވާނެ ކަމަށް ސާޖިދާ ވިދާޅުވެފައިވާ ކަމަށެވެ. ވަހީދު ވިދާޅުވީ އެކަން ހަރުކަށި އިބާރާތުން ކުށްވެރި ކުރާ ކަމަށެވެ.
އަޅުގަނޑު އެވާހަކަ ކުށްވެރިކުރަން. މެޑަމް ސާޖިދާ އަށް ދަންނަވަން އޮތީ ރައްޔިތުންނަށް ކޮން ގެއްލުމެއްތޯ ނުދެނީ ވޭތުވެ ދިއަ 2 އަހަރު ދުވަހުގެ ތެރޭގައި. މެޑަމް ސާޖިދާ ވިދާޅުވެދެއްވަބައްލަވާ ރައްޔިތުންނަށް ކޮން ގެއްލުމެއްތޯ ނުވަނީ ވޭތުވެ ދިއަ 2 އަހަރުގެ ތެރޭގަ. އެހެންވީމަ އަޅުގަނޑުމެން ސަރުކާރުގެ ކެންޑިޑޭޓުންނަށް ވޯޓު ދޭކަށެއް ނުޖެހޭ. އެ ސަބަބުތަކަކީ ރައްޔިތުންނަށް ލިބިފަ އޮތް މިއަދުގެ ހަމައެކަނި ބާރަކީ ކައުންސިލްތައް.ކައުންސިލް އިންތިޚާބަށް އެމްޑީޕީން ހަމަޖައްސާފައިވާ ތަރުޖަމާން ދިއްދޫ ދާއިރާގެ ރައީސް އަބްދުﷲ ވަހީދު
ވަހީދު ވިދާޅުވީ ކައުންސިލްތަކުގެ ބާރު ރައްޔިތުން ދޫކޮށްލައިފި ނަމަ ހުރިހާ ބާރެއް ސަރުކާރަށް ލިބިގެން ދާނެ ކަމަށެވެ. އަދި ރައްޔިތުންގެ ދިފާއުގައި، ރައްޔިތުންގެ ހައްގުގައި ބަހެއް ބުނާނެ އެއްވެސް ފަރާތެއް އޭރުން ނޯންނާނެ ކަމަށް ވެސް ވަހީދު ވިދާޅުވި އެވެ. އެހެންކަމުން ހުރިހާ ރައްޔިތުންގެ ކިބައިން ވެސް އެދެނީ ކުރިއަށް އޮތް އިންތިޚާބުގައި ރައްޔިތުންގެ އަތުގަ އޮތް އެ ބާރު ދޫ ނުކޮށްލުމަށާ ސަރުކާރަށް އެ ބާރު ނުދިނުމަށް ކަމަށް ވަހީދު ވަނީ ވިދާޅުވެފަ އެވެ.
މިއަދުވެސް ސަރުކާރުގެ ނުފޫޒުން އެތައް ކަމެއް މި އިންތިޚާބު ގަޑުބަޑު ކުރުމަށްޓަކައި ކުރަމުންދާއިރު ރާއްޖޭގެ ހުރިހާ ކަންކޮޅުތަކެއްގައި ކެންޑިޑޭޓުންނަށް ބިރު ދައްކަމުން ދާ ކަމަށް ވެސް ވަހީދު ވިދާޅުވި އެވެ. އެގޮތުން އެސްއޯއީ ތަކުގައި މަސައްކަތް ކުރާ މުވައްޒަފުންނަށް ބިރުދައްކަމުން ދާ ކަމަށާ ބައެއް މުވައްޒަފުން މިހާރު ވަކި ވެސް ކޮށްފއިވާއިރު އަނެއްބައި މުވައްޒަފުންނަށް އިންޒާރު ދީފައިވާ ކަމަށް ވަހީދު ވިދާޅުވި އެވެ.
