ތަރައްޤީގެ މަޝްރޫޢުތައް ހިންގަން ރައީސް އަށް ފުރުސަތު ނުލިބެނީ އިންތިޚާބުތަކުގައި ދައުލަތް ތަޅު ލެވިފައި އޮތުމުން ކަމަށް އާދަމް ޝަރީފް ވިދާޅުވެއްޖެ
އިންތިޚާބުތައް ގިނަވުމުން ދައުލަތުގެ ޚަރަދު ބޮޑުވެ، ތަރައްޤީގެ މަޝްރޫޢުތައް ހިންގުމަށް ހުރަސްއެޅޭތީ ރިޔާސީ އިންތިޚާބާއި މަޖިލިސް އިންތިޚާބު އެއްކޮށްލުމަކީ ނިޒާމީ ގޮތުން އެންމެ ރަނގަޅު ގޮތް ކަމަށް މިނިސްޓަރު އާދަމް ޝަރީފް އުމަރު ވިދާޅުވި.
ޕީއެންސީގެ ނައިބު ރައީސް އަދި ރައީސް ޑރ.މުހައްމަދު މުއިއްޒު ގެ ލޯކަލް ގަވަރުމަންޓް މިނިސްޓަރު އާދަމް ޝަރީފް އުމަރު މަޖިލީހުގެ ކޮމިޓީގައި ވާހަކަދައްކަވަނީ | ރާއްޖެ އެމްވީ
ތަރައްޤީގެ މަޝްރޫޢުތައް ހިންގަން ރައީސް އަށް ފުރުސަތު ނުލިބެނީ އިންތިޚާބުތަކުގައި ދައުލަތް ތަޅު ލެވިފައި އޮތުމުން ކަމަށް ކަމަށް ޕީއެންސީގެ ނައިބު ރައީސް އަދި ރައީސް ޑރ.މުހައްމަދު މުއިއްޒު ގެ ލޯކަލް ގަވަރުމަންޓް މިނިސްޓަރު އާދަމް ޝަރީފް އުމަރު ވިދާޅުވެއްޖެއެވެ.
ދެ އިންތިހާބު އެއްކޮށްލަން ޖެހޭ ގޮތަށް ގާނޫނުއަސާސީ އަށް ސަރުކާރުން ހުށަހެޅި އިސްލާހުގެ ބިލުގެ ދިރާސާކުރަމުންދާ މިނިވަން މުއައްސަސާތަކުގެ ކޮމިޓީން ބޭއްވި ބައްދަލުވުމުގައި އާދަމް ޝަރީފް ވަނީ ނިޒާމީ ގޮތުން އެންމެ ރަނގަޅު ގޮތަކީ އިންތިޚާބުތައް އެއްކޮށްލުން ކަމަށް ވިދާޅުވެފަ އެވެ. މިހާރު ދައުރެއްގެ ތެރޭގައި އޮންނަ އިންތިޚާބުތައް ގިނަ ވުމުން ތަރައްޤީގެ މަޝްރޫޢުތައް ހިންގަން ރައީސަކަށް ހުންނަވާ ބެފުޅާ އަށް ފުރުސަތު ނުލިބޭ ކަމަށް އޭނާ ވިދާޅުވި އެވެ.
އޭނާ ވަނީ ފުރަތަމަ 6 މަސް ދުވަސް ރައީސް ހޭދަކުރައްވަން ޖެހެނީ މަޖިލީހުގެ އޮއެވަރުގައި ކަމަށް ވިދާޅުވެފަ އެވެ. އަދި އޭގެ ދުވަސް ކޮޅެއް ފަހުން ކައުންސިލް އިންތިޚާބަށް ތައްޔާރުވާން ޖެހޭ ކަމަށް ވެސް އޭނާ ވިދާޅުވި އެވެ. އަބަދު އިންތިޚާބުތަކުގެ ތެރޭގައި އޮންނަން ޖެހުމަކީ ދައުލަތުގެ ޚަރަދުތައް ބޮޑުވާ ކަމެއް ކަމަށް އޭނާ ވަނީ ވިދާޅުވެފަ އެވެ.
"ފެހި ޤާނޫނުއަސާސީއަކީ 30 އަހަރުގެ ވެރިކަމެއް ނިންމުމަށް ބައްޓަން ކުރި އެއްޗެއް. ޒަމާނާ އެއްގޮތަށް އޭގެ އިސްލާހީ ބަދަލުތައް ގެނައުމަކީ ގައުމުގެ އިގްތިސާދަށާއި ހިންގުމަށްޓަކާ މުހިންމު ކަމެއް." އާދަމް ޝަރީފް ވިދާޅުވި އެވެ.
އާދަމް ޝަރީފް ވަނީ ރިޔާސީ އިންތިހާބާއި މަޖިލިސް އިންތިހާބު އެއްކޮލުމާ ގުޅޭ ގޮތުން ހޭލުންތެރިކުރުމަށް ލިބުނު ކުރު މުއްދަތަކީ އެކަށީގެންވާ މުއްދަތެއް ކަމަށް ސިފަކުރައްވާ އެކަން ދިފާއުކުރައްވަން މަސައްކަތް ކުރައްވާފަ އެވެ. އަދި ފެންނަ ނުފެންނަ ވޯޓެއް ބޭއްވުން އިތުރަށް ލަސްކުރަން ޖެހޭ ސަބަބެއް ނެތް ކަމަށް ވެސް ވިދާޅުވި އެވެ.
އާދަމް ޝަރީފް މިހެން ވިދާޅުވި ނަމަވެސް ޕީއެންސީ ފިޔަވައި އެހެން ސިޔާސީ ޕާޓީތަކުން ވަނީ ކައުންސިލް އިންތިހާބުގެ ވޯޓާ އެކު ރެފެރެންޑަމް ބާއްވާނަމަ ރައްޔިތުން ހޭލުންތެރިކުރުމަށް ލިބެނީ މަދު ވަގުތުކޮޅެއް ކަން ފާހަގަކޮށް އެކަމާއި މެދު ކަންބޮޑުވުން ފާޅުކޮށްފަ އެވެ. އޭނާ ވަނީ އިންތިޚާބުތައް އެއްކޮށްލުމަށް ދިރާސާ އެއް ހެދުން މުހިންމު ނޫން ކަމަށާއި މިއީ ބުއްދީގެ ހަމަތައް ޤަބޫލުކުރާ ގޮތް ކަމަށް ފާހަގަކުރައްވާ އިންތިޚާބުތައް އެއްކޮށްލުމަށް ފަހިވާ ގޮތަށް ވާހަކަދައްކަވާފަ އެވެ.
އޭނާ ވިދާޅުވީ ސިޔާސީ ޕާޓީތަކުގެ ހިންގުމަށް ވެސް އެންމެ ފައިދާ ބޮޑު ގޮތަކީ އިންތިޚާބުތައް އެއްކޮށްލުން ކަމަށެވެ.
