ފެންނަނީ ރައީސް ޑރ.މުހައްމަދު މުއިއްޒު ރައްޔިތުންނަށް ބަވާ، ރައްޔިތުން ހާރުވާ ކަހަލަ ގޮތަކަށް ކަންތައް ކުރަމުންދާ މަންޒަރު: އަހުމަދު އަބްދުﷲ
އެމްޑީޕީން ބޭއްވި ޖަލްސާއެއްގައި ވާހަކަދައްކަވަމުން އިހަވަންދޫ ދާއިރާގެ ކުރީގެ މެމްބަރު އަހުމަދު އަބްދުﷲ ވިދާޅުވީ، މި ސަރުކާރުން ރައްޔިތުންނާ މުޚާތަބު ކުރަނީ އެއްވެސް އިއްޒަތެއް ނެތް ބައެއްގެ ގޮތުގައި ކަމަށާއި، ރިޔާސީ ބަޔާން އިއްވެވިއިރު ވެސް ފެނުނީ ރައްޔިތުންނަށް ބަވާ ޒާތަށް އަމަލުކުރި މަންޒަރު ކަމަށް.
ރައްޔިތުންގެ މަޖިލީހުގެ ބާރަށު ދާއިރާގެ ކުރީގެ މެމްބަރު އަހުމަދު އަބްދުﷲ އެމްޑީޕީގެ ޖަލްސާގައި ވާހަކަދައްކަވަނީ | ރާއްޖެ އެމްވީ
ފެންނަނީ ރައީސް ޑރ.މުހައްމަދު މުއިއްޒު ރައްޔިތުންނަށް ބަވާ، ރައްޔިތުން ހާރުވާ ކަހަލަ ގޮތަކަށް ކަންތައް ކުރަމުންދާ މަންޒަރު ކަަމަށް ރައްޔިތުންގެ މަޖިލީހުގެ ބާރަށު ދާއިރާގެ ކުރީގެ މެމްބަރު އަހުމަދު އަބްދުﷲ ވިދާޅުވެއްޖެ އެވެ.
އޭނާ އެފަދައިން ވިދާޅުވީ އެމްޑީޕީގެ ހޭވައްލާ ތައްޔާރު ޖަލްސާގައި ބުރާސްފަތި ދުވަހުގެ ރޭ ވާހަކަދައްކަވަމުންނެވެ.
ދިވެހިންނަކީ އެއްވެސް އަގެއް ޝަރަފެއް އިއްޒަތެއް ނެތް ބައެއް ކަަމަށް މި ސަރުކާރުން ހަދާފައިވާ ކަމަށް އޭނާ ވަނީ ވިދާޅުވެފަ އެވެ. އަދި ހިތު ހުރިހާ ގޮތަކަށް ދިވެހިންނާއި މި ސަރުކާރުން މުޚާތަބު ކުރަމުންދާ ކަމަށް އޭނާ ވަނީ ވިދާޅުވެފަ އެވެ.
"ރިޔާސީ ބަޔާނުން ވެސް ފެނުނީ ކުރިމަތީ ބައިތިއްބައިގެން ބަވާ ޒާތަށް ވާހަކަދައްކަމުން ރައްޔިތުންނާ މުޚާތަބު ކުރިތަން. ރިޔާސީ ބަޔާނުން ވެސް ފެނިގެން ދިޔައީ ރުޅި ގަދަވެގެން އުޅުނު މަންޒަރު. މިއީ ހަޑި ކަމެއް. ރައްޔިތުން ހޮވާފައި ޤާނޫނުއަސާސީ އާއި އެއްގޮތަށް ކަންކަން ކޮށްދޭށޭ ބުނީމަ މިއީ ކަންތައް ކުރާ ގޮތް." އޭނާ ވިދާޅުވި އެވެ.
އޭނާ ވިދާޅުވީ ބަޖެޓަށް ގޮންޖެހުމަށް ފަހު މި ސަރުކާރުން އަމަލުކުރަމުން ދަނީ ވަރަށް ހުތުރު ގޮތްގޮތަށް ކަމަށެވެ. ބާރުތައް ފެށެނީ ރައްޔިތުންގެ ކިބައިން ކަމަށް ވާއިރު ރައްޔިތުންނަށް މި ސަރުކާރުން ޚިޔާނާތްތެރިވެފައިވާ ކަަމަށް އޭނާ ވިދާޅުވި އެވެ. މިއަދު ފެންނަނީ ޤާނޫނޫ އަސާސީގެ ރޫހު ވަޅުލާފައިވާތަން ކަމަށާއި އެކަމުގެ ނަތީޖާ ވަރަށް ހިތިވާނެ ކަމަށް އަހުމަދު އަބްދުﷲ ވިދާޅުވި އެވެ.
"ރާއްޖޭގެ ރައްޔިތުންނަށް ލޯތްބެއް އޯގާތެރިކަމެއް ހުރެގެން ސިޔާސަތެއް ބައްޓަންކޮށް އެ ސިޔާސަތުގެ މަތީގައި ޚިދުމަތް ދޭ ހަމައެކަނި ޕާޓީއަކީ އެމްޑީޕީ" އޭނާ ވިދާޅުވި އެވެ.
މިއަދު ސަރުކާރުން ކަންކަން ކުރާ އުސޫލަކީ ކޮންމެ އިންތިޚާބަކާއި ދިމާކޮށް ތަކުރާރުކޮށް އެތައް ދޮގުތަކެއް ހެދުން ކަމަށާއި އެކަމުގެ ގެއްލުން ވަނީ ދިވެހިންނަށް ކަމަށް އޭނާ ވިދާޅުވި އެވެ. އަދި ދޮގާއި މަކަރު ހެދުމަކީ އާއްމުންގެ އިތުބާރު ގެއްލޭނެ ކަމެއް ކަމަށް ވެސް އޭނާ ވިދާޅުވި އެވެ.
