މިދިޔަ އަހަރު ފަށާނެ ކަމަށް ވިދާޅުވި މާލެ އަދި ވިލިމާލޭގެ މަގު ހެދުމުގެ މަސައްކަތް މި އަހަރަށް ފަސްވެއްޖެ ކަމަށް ރައީސް ވިދާޅުވެއްޖެ
ޗައިނާ ސަރުކާރުގެ ހިލޭ އެހީގައި މާލެ އާއި ވިލިމާލޭގެ މަގުތައް ޒަމާނީ ފެންވަރަށް ތަރައްޤީކުރުމުގެ މަޝްރޫޢުގެ ޢަމަލީ މަސައްކަތް މިއަހަރުގެ ފަހުކޮޅު ފެށޭނެ ކަމަށާއި މި މަޝްރޫޢުގެ ފީސިބިލިޓީ މަސައްކަތްތައް ނިމިފައިވާއިރު، މިއަހަރުގެ ކުރީކޮޅު މަގުތަކުގެ ޑިޒައިން މަސައްކަތް ފެށުމަށް ވަނީ ހަމަޖެހިފައި ކަމަށް މުއިއްޒު ވިދާޅުވި.
އަމީނީ މަގުގެ މަސައްކަތް ކުރުމުގެ ތެރެއިން | އާރްޑީސީ
މިދިޔަ އަހަރު ފަށާނެ ކަމަށް ރައީސް ޑރ. މުހައްމަދު މުއިއްޒު ވިދާޅުވި މާލެ އަދި ވިލިމާލޭގެ މަގު ހެދުމުގެ މަސައްކަތް މި އަހަރަށް ފަސްވެއްޖެ ކަމަށް ރައީސް ވިދާޅުވެއްޖެ އެވެ.
މިއަހަރަށް ރިޔާސީ ބަޔާން އިއްވަމުން ބުރާސްފަތި ދުވަހު ރައީސް ވިދާޅުވީ ޗައިނާ ސަރުކާރުގެ ހިލޭ އެހީގައި ހަދަން ހަމަޖެހިފައިވާ މާލެ އަދި ވިލިމާލޭގެ މަގުތައް އަލުން ތަރައްޤީކުރުމުގެ މަޝްރޫއުގެ ޑިޒައިން މަސައްކަތްތައް މި އަހަރު ކުރީކޮޅު ފެށުމަށް ވަނީ ހަމަޖެހިފައި ކަމަށެވެ. އަދި ޢަމަލީ މަސައްކަތް މި އަހަރުގެ ފަހު ކޮޅު ފެށޭނެކަމަށް ލަފާކުރެވޭ ކަމަށެވެ. އިތުރު ތަފްސީލެއް ރައީސް ނުދެއްވަ އެވެ.
މިދިޔަ 2025 ވަނަ އަހަރުގެ ރިޔާސީ ބަޔާނުގައި ވެސް މާލެ އަދި ވިލިމާލޭގެ މަގުތައް ތަރައްގީ ކުރުމުގެ މަސައްކަތް ފެށޭނެ ކަމަށް ރައީސް ވިދާޅުވި އެވެ. 2025 ވަނަ އަހަރުގެ ރިޔާސީ ބަޔާނުގައި ރައީސް ވިދާޅުވީ "މާލޭގެ ހުރިހާ މަގެއް ވަނީ ވަރަށް ބޮޑަށް ހަލާކުވެފަ އެވެ. އޭގެ ސަބަބުން، އެތައް ތަކުލީފެއް ރައްޔިތުން އުފުލަންޖެހޭ ކަމަށެވެ. އެހެންވީމާ، މާލޭގެ ހުރިހާ މަގެއް، އަލުން ރަނގަޅު ފެންވަރަކަށް ހެދުމުގެ ބިޔަ ބޮޑު މަޝްރޫޢެއް، ޗައިނާ ސަރުކާރުގެ ހިލޭ އެހީގެ ދަށުން ކުރިއަށް ގެންދިޔުމަށް ވާންޖެހޭ އެންމެފަހުގެ ތައްޔާރީތައް ވަމުން އަންނަ ކަމަށެވެ. އެގޮތުން، ފީޒިބިލިޓީގެ މަސައްކަތް މިހާރު ނިމިފައިވާ ކަމަށާއި، އިރާދަކުރެއްވިއްޔާ، މާލެއާއި ވިލިމާލޭގެ ހުރިހާ މަގެއް، ޒަމާނީ ފެންވަރަށް އަލުން ހެދުމުގެ ޢަމަލީ މަސައްކަތް، 2025 ގެ ތެރޭގައި ފެށިގެންދާނެ ކަމަށެވެ.
މާލެ އާއި ވިލިމާލޭގެ މަގުތައް ތަރައްގީކުރުމުގެ މަޝްރޫއުގެ ފީސިބިލިޓި ސްޓަޑީގެ މަސައްކަތް ނިންމާލީ ނޮވެމްބަރު 21، 2024 ގަ އެވެ. ކޮންސްޓްރަކްޝަން މިނިސްޓްރީން 'އެކްސް' ގައި ނޮވެމްބަރު 21، 2024 ގައި ކުރި ޕޯސްޓެއްގައި ބުނީ، ޗައިނާ ސަރުކާރުން އެ މަސައްކަތަށް ކަނޑައެޅި އެކްސްޕާޓް ޓީމުތަކާއި ކަމާ ގުޅުންހުރި ފަރާތްތަކާ އެކު މަޝްވަރާކޮށް، މާލެ އާއި ވިލިމާލޭގެ މަގުތަކުގެ ހާލަތު ދެނެގަތުމުގެ މަސައްކަތް ނިންމާލާފައިވާ ކަމަށެވެ.
އަދި އެ ޓީމުން މާލެ އާއި ވިލިމާލެ މަގުތަކުގެ ވެސް ފީސިބިލިޓީ ޓެސްޓްގެ މަސައްކަތް މިނިސްޓްރީގެ ޓެކްނިކަލް ޓީމާ ގުޅިގެން ނިންމާލައިފައި ކަމަށް މިނިސްޓްރީން ބުނެފައިވެ އެވެ. މާލެއާއި ވިލިމާލޭގެ މަގުތައް ޒަމާނީ ފެންވަރަށް ތަރައްގީ ކުރުމަށް ޗައިނާއާއި ގުޅިގެން ސަރުކާރުން ހިންގަމުންދާ އެ މަޝްރޫއުގައި ދެން ކުރިއަށްދާނީ ޑިޒައިން މަރުހަލާގެ މަސައްކަތް ކަމަށް ވެސް މިނިސްޓްރީގެ ޕޯސްޓުގައި ބުނެފައިވެ އެވެ.
ޑިޒައިންގެ މަސައްކަތް ފަށާނެ ކަމަށް 2024 ވަނަ އަހަރު މިނިސްޓްރީ އިން ބުނި ނަމަވެސް ރައީސް މިއަހަރުގެ ރިޔާސީ ބަޔާނުގައި އޭގެ އަހަރެއްހާ ދުވަސް ފަހުން ވިދާޅުވީ މާލެ އަދި ވިލިމާލޭގެ މަގުތައް އަލުން ތަރައްޤީކުރުމުގެ މަޝްރޫއުގެ ޑިޒައިން މަސައްކަތްތައް މި އަހަރު ކުރީކޮޅު ފެށުމަށް ހަމަޖެހިފައިވާ ކަމަށެވެ.
