މޮރިޝަސްގެ ކަނޑުގެ ގޮތުގައި ބައިނަލް އަގްވަމީ ކަނޑުތަކާ ބެހޭ ގާނޫނުގެ ދަށުން ކަނޑައެޅި ސަރަހައްދަށް ދިވެހި އަސްކަރިއްޔާ އިން ވަދެ ބަލަހައްޓަން ފަށައިފި
ދިވެހިރާއްޖޭގެ ދެކުނުގެ ޚާއްޞަ އިޤްތިސާދީ ސަރަހައްދު ބެލެހެއްޓުމަށް އެމްއެންޑީއެފް އެއަރ ކޯ ގެ ޑްރޯންތަކާއި ކޯސްޓްގާޑުގެ އުޅަނދުފަހަރު ބޭނުންކޮށްގެން ޚާއްޞަ ސަވައިލަންސް އޮޕަރޭޝަނެއް މިހާރު ހިންގަމުން ގެންދާ ކަމަށް އެމްއެންޑީއެފް އިން ވަނީ ބުނެފައި.
ދިވެހިރާއްޖޭގެ ދެކުނުގެ ޚާއްޞަ އިޤްތިސާދީ ސަރަހައްދު ބެލެހެއްޓުމަށް ޓަކައި، އެމްއެންޑީއެފް ކޯސްޓްގާޑް ޝިޕް ދަރުމަވަންތައާއި އެމްއެންޑީއެފް އެއަރ ކޯރގެ ޑްރޯން ބޭނުންކޮށްގެން، ޚާއްޞަ ސަރވައިލަންސް އޮޕަރޭޝަނެއް ވަނީ ފަށާފައި. | އެމްއެންޑީއެފް
މޮރިޝަސް އާއި ރާއްޖެއާ ދެމެދު އޮންނަ ކަނޑުގެ ފުށުއަރާ ސަރަހައްދާ ބެހޭ ގޮތުން އިޓްލޮސް އިން ނިންމާފައިވާ ނިންމުން ބަލައި ނުގަންނާނެ ކަމަށް ރައީސް ޑރ. މުހައްމަދު މުއިއްޒު ވިދާޅުވުމާ ގުޅިގެން، ބައިނަލް އަގްވަމީ ކަނޑުތަކާ ބެހޭ ގާނޫނުގެ ދަށުން މޮރިޝަސްގެ ކަނޑުގެ ގޮތުގައި އިޓްލޮސް އިން ކަނޑައެޅި ސަރަހައްދު އެމްއެންޑީއެފް އިން ވަދެ ބަލަހައްޓަން ފަށައިފި އެވެ.
މިނިސްޓްރީ އޮފް ޑިފެންސް އިން ބުރާސްފަތި ދުވަހުގެ ރޭ އެކްސް ގައި ނެރުނު ބަޔާނެއް ގައި ބުނެފައިވަނީ، ދިވެހިރާއްޖޭގެ ޖުމްހޫރިއްޔާގެ ޤާނޫނުއަސާސީއާއި ޤާނޫނުތަކުގައި ބަޔާންކޮށްފައިވާ ދިވެހިރާއްޖޭގެ ސަރަޙައްދުތަކަށް އެއްވެސް ބަދަލެއް އައިސްފައިވާ ކަމަށް ދިވެހި ދައުލަތުން ބަލައި ނުގަންނަކަމަށް 2026 ވަނަ އަހަރުގެ ރިޔާސީ ބަޔާން ހުށަހަޅުއްވަމުން ރައީސް ޑރ. މުޙައްމަދު މުޢިއްޒު 2026 ފެބުރުއަރީ 05 ވަނަ ދުވަހު އިޢުލާން ކުރައްވާފައިވާތީ، ޤާނޫނު ނަންބަރު 06/96 (ދިވެހިރާއްޖޭގެ ކަނޑުގެ ސަރަޙައްދުތަކާބެހޭ ޤާނޫނު) ގައި ބަޔާންކުރާ ސަރަޙައްދު ބެލެހެއްޓުމުގެ މަސައްކަތް ދިވެހި އަސްކަރިއްޔާ އިން ކުރަމުން ގެންދާނެކަމުގެ ޔަޤީންކަން އެންމެހައި ދިވެހި ރައްޔިތުންނަށް އަރުވާ،" ކަމަށެވެ.
މޮރިޝަސްްއާ ރާއްޖެއާ ދެމެދު އޮންނަ ފުށުއަރާ ކަނޑުގެ ސަރަހައްދު ދެ ގައުމުގެ ދެމެދުގައި ބަހާނެ ގޮތް އިންޓަނޭޝަނަލް ޓްރައިބިއުނަލް ފޯ ދަ ލޯ އޮފް ސީސް (އިޓްލޮސް) އިން ނިންމާފައިވީ ނަމަވެސް އެ ނިންމުން ބަލައި ނުގަންނަކަން ރައީސް މުއިއްޒު 2026 ވަނަ އަހަރުގެ ރިޔާސީ ބަޔާން އިއްވަމުން ރައްޔިތުންގެ މަޖިލީހުގައި ވަނީ ވިދާޅުވެފަ އެވެ.
މައްސަލައިގައި އިޓްލޮސް އިން ގޮތެއް ނިންމީ، 2022 ވަނަ އަހަރު މޮރިޝަސް އިން އިޓްލޮސްއަށް ހުށަހެޅި މައްސަލައަކާ ގުޅިގެންނެވެ.
ފުށުއަރާ ކަނޑުގެ ސަރަހައްދު ބެހުމަށް މޮރިޝަސް އިން ހުށަހެޅުމުން އިޓްލޮސް އިން އެ ސަރަހައްދު ދެ ގައުމަށް ބަހާލީ ރާއްޖެ އަށް މުޅި ޖުމްލަ 47،232 އަކަކިލޯމީޓަރު އަދި މޮރިޝަސްއަށް 45،331 އަކަކިލޯމީޓަރު ލިބޭ ގޮތަށެވެ.
ރައީސް މުއިއްޒު ގެ ނިންމެވުމާ ރާއްޖޭގެ ދެކުނުގެ ޚާއްޞަ އިޤްތިސާދީ ސަރަހައްދު ބެލެހެއްޓުމަށް ޓަކައި، އެމްއެންޑީއެފް ކޯސްޓްގާޑް ޝިޕް ދަރުމަވަންތައާއި އެމްއެންޑީއެފް އެއަރ ކޯރގެ ޑްރޯން ބޭނުންކޮށްގެން، ޚާއްޞަ ސަރވައިލަންސް އޮޕަރޭޝަނެއް ފަށައިފި ކަމަށް އެމްއެންޑީއެފް އިން ވަނީ ހާމަ ކޮށްފަ އެވެ.
