ގއ.ކޮލަމާފުށީ އިންޖީނުގެ ހިންގުމާއި ހަވާލުވެ ހުރި ނާސިރު މަޤާމުން ވަކިކުރުމަކީ، މިނިވަންކަމާ އެކު ސިޔާސީ ހަރަކާތްތަކުގައި ބައިވެރިވާ ހުރިހާ މުވައްޒަފުންނަށް ބިރުދައްކަން ސަރުކާރުން ހިންގި ފިނޑި އަމަލެއް: ފައްޔާޒް
ސިޔާސީ ފިކުރު ފާޅުކުރުމާ ގުޅިގެން ކޮލަމާފުށީ ފެނަކަ ބްރާންޗުގެ އިސްވެރިޔާ ވަޒީފާއިން ވަކިކުރުމަކީ ފިނޑި އަމަލެއް ކަމަށާއި، ރައީސް މުއިއްޒު ރައްޔިތުންގެ މައްޗަށް ބާރުވެރިކަން ހޯއްދަވަން ކުރައްވާ މިފަދަ ކަންކަން ހުއްޓުވޭނީ ރައްޔިތުން ނުކުމެ ސަރުކާރު ހަމަމަގަށް އަޅުވައިގެން ކަމަށް ފައްޔާޒް ވިދާޅުވި.
އެމްޑީޕީ ގައުމީ މަޖިލިސް ޖަލްސާގައި ޕާޓީގެ ކުރީގެ ޗެއަރޕާސަން ފައްޔާޒް އިސްމާއިލް ވާހަކަދައްކަވަނީ | އިބްރާހިމް ޝާބިލް
ގއ.ކޮލަމާފުށި އިންޖީނުގެއާއި ފެނަކަ އޮފީސް ހިންގުމާއި ހަވާލުވެ ހުރި އަބްދުﷲ ނާސިރު މަޤާމުން ވަކިކުރީ ވަޒީފާގެ މަގާމު ދަށްކުރުމުން ވެސް މިނިވަން ސިޔާސީ ފިކުރު ފާޅުކުރުން ހުއްޓާނުލުމުން ކަމަށް އެމްޑީޕީގެ ކުރީގެ ޗެއަރޕަސަން ފައްޔާޒް އިސްމާއިލް ވިދާޅުވެއްޖެ އެވެ.
ނާސިރު ވަޒީފާއިން ވަކިކުރުމާ ގުޅިގެން "އެކްސް" ގައި ކުރެއްވި ޕޯސްޓުގައި ފައްޔާޒް ވިދާޅުވީ މިއީ މިނިވަންކަމާއެކު ސިޔާސީ ހަރަކާތްތަކުގައި ބައިވެރިވާ ހުރިހާ މުވައްޒަފުންނަށް ބިރުދައްކަން ސަރުކާރުން ކުރި ފިނޑި އަމަލެއް ކަމަށެވެ.
އެ ޕޯސްޓުގައި ފައްޔާޒް ވިދާޅުވި ގޮތުގައި ނާސިރު ވަޒީފާއިން ވަކިކުރީ ސަރުކާރު ހިންގާ ޕާޓީއަށް ތާއީދު ނުކުރާތީ އެވެ. މީގެ ކުރިން ވެސް އޭނާއަށް އެތައް އިންޒާރެއްދީފައިވާ ކަން ފައްޔާޒު ފާހަގަކުރެއްވި އެވެ.
މީގެ އިތުރުން، ރައީސް މުއިއްޒު ބޭނުންފުޅު ވަނީ ރައްޔިތުންގެ މައްޗަށް ފުރިހަމަ ބާރާއި ކޮންޓްރޯލް ހޯއްދެވުމަށް ކަމަށް ފައްޔާޒު ވިދާޅުވި އެވެ. އޭނާ އިތުރަށް ވިދާޅުވި ގޮތުގައި، އެ މަޤްސަދު ހާސިލުވަންދެން މިފަދަ ކަންކަން ތަކުރާރުވަމުންދާނެ އެވެ. އަދި އެކަން ހުއްޓުވޭނީ ރައްޔިތުން ނުކުމެ މި ސަރުކާރު ހަމަމަގަށް އަޅުވައިގެން ކަމަށް ވިދާޅުވި އެވެ.
ސިޔާސީ ފިކުރު ދިމާ ނުވާ މީހުން ވަޒީފާ އިން ވަކި ކުރުމާއި ވަޒީފާތައް ސިޔާސީ މަންފާ އަށް ބެހުމުގެ މައްސަލަ މި ފަހަކަށް އައިސް ދަނީ އިތުރުވަމުންނެވެ. ސަރުކާރުން މިފަދަ ކަންކަން ކުރަނީ ކައުންސިލް އިންތިޚާބަށް ނުފޫޒު ފޯރުވަން ކަމަށް އާއްމުން ދަނީ ބުނަމުންނެވެ.
