ޕްރޮސިކިއުޓަރުން ބުނީ ދައުލަތުގެ ވެރިންނަށް ލިބޭ ހަދިޔާ އާ ބެހޭ ގަވައިދާ ޚިލާފަށް އިމްރާން ޚާން އާއި އޭނާގެ އަނބިކަނބަލުން އަގުބޮޑު ގަޑިތަކެއް ސަރުކާރުން ވަރަށް ކުޑަ އަގެއްގައި ބައްލަވައި ގަތް ކަމަށް.
ޕާކިސްތާނުގެ ކުރީގެ ބޮޑުވަޒީރު އިމްރާން ޚާން އާއި އޭނާގެ އަނބިކަނބަލުން ބުޝްރާ ބީބީ
ޕާކިސްތާނުގެ ކޯޓަކުން ހޮނިހިރު ދުވަހު ކުރީގެ ބޮޑުވަޒީރު އިމްރާން ޚާނާއި އޭނާގެ އަނބިކަނބަލުން ބުޝްރާ ބީބީ ގެ މައްޗަށް ކޮރަޕްޝަންގެ މައްސަލައެއްގައި 17 އަހަރު ދުވަހުގެ ޖަލު ހުކުމެއް އިއްވައިފިއެވެ.
މި މައްސަލައަކީ ސަރުކާރަށް ލިބުނު އަގު ބޮޑު ހަދިޔާތަކެއް އިމްރާން ޚާން އާއި އަނބިކަނބަލުން ނުއަގުގައި ގަތް ކަމުގެ ތުހުމަތު ގައި އުފުލި ދައުވާއެކެވެ.
އެންމެ ފަހުގެ މި ހުކުމަކީ އިމްރާން ޚާނަށް ކުރިމަތިވެފައިވާ ގާނޫނީ މައްސަލަތަކުގެ ސިލްސިލާ އަށް އިތުރުވި ބޮޅެކެވެ. 2023 އޯގަސްޓުން ފެށިގެން އޭނާ ހުންނަވަން ޖެހފައިވަނީ ޖަލުގަ އެވެ. އަދި 2022 ވަނަ އަހަރު އޭނާ މަގާމުން ދުރުކުރުމަށް ފަހު އެތައް ގިނަ މައްސަލަތަކެއް އޭނާގެ މައްޗަށް އުފުލިފައިވެއެވެ. މި މައްސަލަތަކުގެ ތެރޭގައި ކޮރަޕްޝަން އާއި ޓެރަރިޒަމް އާއި ދައުލަތުގެ ސިއްރުތައް ހާމަ ކުރުމާ ގުޅޭ ކުށުގެ ތުހުމަތުތައް ހިމެނެއެވެ.
އިމްރާން ޚާން ހުރިހާ ތުހުމަތުތަކެއް ދޮގު ކުރައްވަ އެވެ. އަދި އޭނާގެ ޕާޓީން ބުނަނީ މިއީ ސިޔާސީ ދައުވާތަކެއް ކަމުގައެވެ.
އެންމެ ފަހުން މި ކުރި ހުކުމާ ބެހޭ ގޮތުން އިމްރާން ޚާންގެ އާއީލާގެ ގާނޫނީ ވަކީލު ރާނާ މުދައްސަރު ވިދާޅުވީ ކޯޓުން ހުކުމް ކުރީ ދިފާއު ގައި ވާހަކަ ދެއްކުމެއް ވެސް ނެތި ކަމަށެވެ.
ދެ މީހުންގެ މައްޗަށް އިއްވި ހުކުމުގައި ޕާކިސްތާނުގެ ޕީނަލް ކޯޑުގެ ދަށުން އިތުބާރު ގެއްލުމުގެ ކުށުގައި 10 އަހަރު ދުވަހުގެ ހަރުކަށި ޖަލު ހުކުމާއި ކޮރަޕްޝަން ހުއްޓުވުމުގެ ގާނޫނުގެ ދަށުން 7 އަހަރު ދުވަހުގެ ޖަލު ހުކުމާއެކު، ކޮންމެ މީހަކަށް 16.4 މިލިއަން ރުޕީސްގެ ޖޫރިމަނާ ކުރުން ހިމެނެއެވެ.
މި މައްސަލަ އަކީ ރަސްމީ ދަތުރެއްގައި ސައުދީ އަރަބިއްޔާގެ ވަލިއަހުދު މުޙައްމަދު ބިން ސަލްމާން، އިމްރާން ޚާން އަށް ހަދިޔާކުރި އަގުބޮޑު ގަޑިތަކަކާ ގުޅޭ މައްސަލައެކެވެ. ޕްރޮސިކިއުޓަރުން ބުނީ ދައުލަތުގެ ވެރިންނަށް ލިބޭ ހަދިޔާ އާ ބެހޭ ގަވައިދާ ޚިލާފަށް އިމްރާން ޚާން އާއި އޭނާގެ އަނބިކަނބަލުން އެ ގަޑިތައް ސަރުކާރުން ވަރަށް ކުޑަ އަގެއްގައި ބައްލަވައި ގަތް ކަމަށެވެ.
މި މައްސަލަ އަކީ އިމްރާން ޚާން 2023 އޯގަސްޓު މަހު ހައްޔަރު ކުރުމާ ގުޅިފައިވާ ކުރީގެ ސަރުކާރުގެ ހަދިޔާތަކާ ގުޅޭ މައްސަލަ އާ ތަފާތު މައްސަލައެކެވެ. ކުރީގެ މައްސަލަ އާ ގުޅިގެން އިމްރާން ޚާނަށް 14 އަހަރު ބުޝްރާ ބީބީ އަށް 7 އަހަރުގެ ހުކުމްތައް އިއްވުނު ނަމަވެސް އިސްތިއުނާފު ގައި އެ ހުކުމްތައް ފަހުން ސަސްޕެންޑް ކުރިއެވެ.
ކުރީގެ ކްރިކެޓް ތަރި އިމްރާން ޚާންގެ މައްޗަށް ދައުވާ އަކަށް ފަހު ދައުވާ އެއް އުފުލެމުންދާ އިރު އޭނާގެ ޕާކިސްތާން ތަހްރީކް އޭ އިންސާފް ޕާޓީ ވެސް ވަނީ ވަރަށް ބޮޑަށް ސިޔާސީ މައިދާނުން އެކަހެރިވެފަ އެވެ.
