ދެ ވަނަ ލެގުގައި ވެސް ޗެލްސީ ބަލިކޮށް، އާސެނަލް ފައިނަލް އަށް

ކަރަބޯ ކަޕްގެ ސެމީ ފައިނަލްގެ ދެ ވަނަ ލެގުގައި ވެސް ޗެލްސީ ބަލިކޮށް، އާސެނަލް އިން މުބާރާތުގެ ފައިނަލްގެ ޖާގަ ހޯދައިފި އެވެ. 

އާސެނަލްގެ އަމިއްލަ ދަނޑު، އެމިރޭޓްސް ސްޓޭޑިއަމްގައި އަންގާރަ ދުވަހުގެ ރޭ ދަންވަރު ކުޅުނު މެޗު އެ ޓީމުން ކާމިޔާބު ކުރީ 1-0 އިންނެވެ. މެޗުގައި އާސެނަލް އިން ލަނޑު ޖެހީ ވެސް، މެޗުގެ އެންމެ ފަހު ވަގުތުގެ ތެރޭގަ އެވެ.

މެޗުގައި ދެ ޓީމަށް ވެސް ވަނީ ލަނޑު ޖަހަން ފުރުސަތު ލިބިފަ އެވެ. މެޗުގައި އާސެނަލް އަށް ލީޑު ނަގައިދޭން އެ ޓީމުގެ ޕިއެރޯ ހިކަންޕީ ފޮނުވާލި ބޯޅަ ދިޔައީ ގޯލުގެ ހުރަސް ދަނޑި މަތިން ބޭރަށެވެ. ޗެލްސީ އަށް ވެސް ލަނޑު ޖަހަން ފުރުސަތު ލިބުނުއިރު، އެންޒޯ ފެނާންޑޭޒް ފޮނުވާލި ހަމަލާ އާސެނަލްގެ ގޯލު ކީޕަރު ވަނީ މަތަކޮށްފަ އެވެ.

މެޗުން އާސެނަލް މޮޅުވެފައި ވަނީ، މެޗުގެ ފުރިހަމަ ވަގުތު ހަމަވެ އިތުރަށް ދެއްކި ވަގުތުގައި ލަނޑު ޖަހައިގެންނެވެ. އެ ލަނޑު އާސެނަލް އަށް ޖަހައިދިނީ ބަދަލު ކުޅުންތެރިޔެއްގެ ގޮތުގައި ކުޅެން ނިކުތް ކައި ހަވާޓްޒް އެވެ. އެއީ ޑެކްލަން ރައިސް ތަނަވަސްކޮށްދިން ފުރުސަތެއްގައި އޭނާ ޖެހި ލަނޑެކެވެ.

ސެމީ ފައިނަލްގެ ފުރަތަމަ ލެގުގައި ޗެލްސީގެ ދަނޑުގައި އާސެނަލް ވަނީ 3-2 އިން މޮޅުވެފަ އެވެ. އަމިއްލަ ދަނޑުގައި ކުޅުނު ދެ ވަނަ ލެގުން ވެސް މޮޅުވެ، އާސެނަލް އިން ފައިނަލްގެ ޖާގަ ހޯދީ އެގްރިގޭޓް 4-2 ގެ ނަތީޖާ އަކުންނެވެ. ފައިނަލްގައި އާސެނަލް ނިކުންނަން ޖެހޭނީ މެންޗެސްޓަރ ސިޓީ އާއި، ނިއުކާސަލް ޔުނައިޓެޑު ކުޅޭ މެޗުން މޮޅުވާ ޓީމަކާ ދެކޮޅަށެވެ.