ޕެލަސް ބަލިކޮށް، ޗެލްސީ ރަނގަޅު ފޯމުގައި

އިނގިރޭސި ޕްރިމިއަރ ލީގުގައި ކްރިސްޓަލް ޕެލަސްއާ ދެކޮޅަށް ކުޅުނު މެޗުން މޮޅުވެ، ޗެލްސީ އިން އެ ޓީމުގެ ރަނގަޅު ފޯމު ދަމަހައްޓައިފި އެވެ.

ޕެލަސްގެ އަމިއްލަ ދަނޑުގައި ކުޅުނު މެޗު ޗެލްސީ އިން ކާމިޔާބު ކުރީ، 3-1 އިންނެވެ. މެޗުގެ ފުރަތަމަ ހާފުގައި ޗެލްސީ އިން އެއް ލަނޑު ޖެހިއިރު، އަނެއް ދެ ލަނޑު ޖެހީ ދެ ވަނަ ހާފުގަ އެވެ. މި ހާފުގައި ޕެލަސް އިން ވެސް ވަނީ ލަނޑެއް ޖަހައިފަ އެވެ. 

މެޗުގެ ފުރަތަމަ ހާފުގެ 34 ވަނަ މިނެޓުގައި ޗެލްސީ އިން ވަނީ ލަނޑު ޖަހައި ލީޑު ނަގައިފަ އެވެ. އެ ލަނޑު ޗެލްސީ އަށް ޖަހައިދިނީ އެސްޓެވާއޯ އެވެ. އޭގެ ފަހުން ދެ ވަނަ ހާފު ފަށައިގެން ފަސް ވަނަ މިނެޓުގައި ޔާއޯ ޕެޑްރޯ ވަނީ ޗެލްސީގެ ދެ ވަނަ ލަނޑު ޖަހައި ލީޑު ފުޅާ ކޮށްފަ އެވެ. 

މެޗުގެ 64 ވަނަ މިނެޓުގައި ޗެލްސީގެ ތިން ވަނަ ލަނޑަކީ އެ ޓީމަށް ލިބުނު ޕެނަލްޓީ ކާމިޔާބުކޮށް، އާޖެންޓީނާގެ އެންޒޯ ފެނާންޑޭޒް ޖެހި ލަނޑެކެވެ. މެޗުގެ ފުރިހަމަ ވަގުތު ހަމަވާން ދެ މިނެޓަށް ވެފައި ވަނިކޮށް، ޕެލަސްގެ ހަމައެކަނި ލަނޑު ޖެހީ ކްރިސް ރިޗާޑްސް އެވެ. 

މޮޅާއެކު ޗެލްސީ އިން ވަނީ ލީގު ތާވަލްގެ ފަސް ވަނަ މަގާމަށް ޖެހިލައިފަ އެވެ. މިހާތަނަށް ކުޅެފައިވާ 23 މެޗުން ޗެލްސީ އަށް ލިބެނީ 37 ޕޮއިންޓެވެ. ޗެލްސީގެ ކޯޗުކަމާ ލިއަމް ރޮސެނިއާ ހަވާލުވި ފަހުން އެ ޓީމު ފަސް މެޗު ކުޅެފައިވާއިރު، އޭގެ ތެރެއިން ހަތަރު މެޗުން ވަނީ މޮޅުވެފަ އެވެ. ބަލިވެފައި ވަނީ އެންމެ މެޗަކުންނެވެ.