ޣައްޒާ އަށް އެތެރެވާ ފަލަސްތީނު މީހުންގެ އަދަދު އިޒްރޭލުން ކޮންޓްރޯލު ކުރަނީ
ރޮއިޓާސް އިން ރިޕޯޓުކުރި ގޮތުގައި، ރަފަޙް ބޯޑަރު ކްރޮސިން ގެ ތެރެއިން ޣައްޒާ އަށް އެތެރެވާ މީހުންގެ އަދަދު ކޮންޓްރޯލްކޮށް އަސްކަރީ ޗެކްޕޮއިންޓެއް ގާއިމުކުރަން އިޒްރޭލުން ދަނީ މަސައްކަތް ކުރަމުން.
ޣައްޒާ ސްޓްރިޕް އާއި މިސްރާ ދެމެދުގައިވާ ރަފަޙް ބޯޑަރ ކްރޮސިންގ. | ޕްރެސްޓީވީ
މިޞްރުގެ ބޯޑަރު ހުރަސްކޮށް ރަފަޙް ބޯޑަރު ކްރޮސިންގެ ތެރެއިން ޣައްޒާ އަށް އެތެރެވާ ފަލަސްތީނު ރައްޔިތުންގެ އަދަދު ކޮންޓްރޯލްކޮށް، އެތެރެވާ މީހުންނަށްވުރެ ޣައްޒާ އިން ބޭރުވާ މީހުންގެ އަދަދު ގިނަކުރުމަށް އިޒްރޭލުން މަސައްކަތް ކުރަމުންދާ ކަމަށް ރިޕޯޓުތައް ބުނެފިއެވެ.
ރޮއިޓާސް އިން ތިން މަޞްދަރަކާ ޙަވާލާދީ ހުކުރު ދުވަހު އާންމުކުރި މި ރިޕޯޓުގައިވާ ގޮތުން، މި ކޮންޓްރޯލްތައް އިޒްރޭލުން ތަންފީޒު ކުރާނީ ކޮން އުސޫލަކުން ކަމެއް ނުވަތަ ބޭރުވާ މީހުންނާއި އެތެރެވާ މީހުންގެ ނިސްބަތް ބަހައްޓާނެ ވަކި މިންގަނޑެއް އަދި ސާފެއް ނުވެ އެވެ. މީގެ އިތުރުން، ޣައްޒާގެ ބޯޑަރު ސަރަޙައްދުގައި އަސްކަރީ ޗެކްޕޮއިންޓެއް ގާއިމުކޮށް، އެތަނުން ދަތުރުކުރާ ހުރިހާ ފަލަސްތީނު މީހުން އިޒްރޭލުން ބަލައި ފާސްކުރުމަށް ވެސް އިޒްރޭލުން ރާވަމުންދާ ކަމަށް އެ ރިޕޯޓުގައިވެ އެވެ.
މަސްދަރުތަކުން ފާހަގަކޮށްފައިވާ ގޮތުގައި، ޣައްޒާ އަށް އެތެރެވާ އަދި ބޭރުވާ މީހުން ބަލައި ފާސްކުރުމަށް އަސްކަރީ ޗެކްޕޮއިންޓެއް ބެހެއްޓުމަށް އިޒްރޭލުގެ އޮފިޝަލުން ވަނީ ބާރުއަޅާފައެވެ. މިފަދަ ހަރުކަށި ފިޔަވަޅުތަކެއް އެޅުމަށް މިދިޔަ އަހަރުން ފެށިގެން މަޝްވަރާ ކުރެވެމުންދާ ކަމަށް ގިނަ ރިޕޯޓުތަކުން ދައްކައެވެ. ނަމަވެސް، އިޒްރޭލުގެ އަސްކަރިއްޔާ އިން ބޯޑަރު ހުރަސްކުރުން މަނާކުރާ މީހުންނާމެދު، ޚާއްޞަކޮށް މިޞްރުން އެތެރެވާ މީހުންނާމެދު އަމަލުކުރާނެ ގޮތެއް އަދި ސާފެއް ނުވެއެވެ.
މި ރިޕޯޓު އާންމުވެފައި ވަނީ، ސްވިޒަލޭންޑުގެ ޑާވޯސްގައި ބޭއްވުނު ރަސްމިއްޔާތެއްގައި އެމެރިކާގެ ރައީސް ޑޮނަލްޑް ޓްރަމްޕް "ބޯޑް އޮފް ޕީސް" ނަމުގައި ޣައްޒާގެ ސުލްހައިގެ ޕްލޭނެއް ރަސްމީކޮށް އިޢުލާނު ކުރެއްވިތާ އެއްދުވަސް ފަހުންނެވެ. ޓްރަމްޕް ވިދާޅުވާ ގޮތުގައި މި ޕްލޭންގެ ބޭނުމަކީ 2023 ވަނަ އަހަރުގެ އޮކްޓޯބަރު މަހުން ފެށިގެން އިޒްރޭލުން ޣައްޒާގައި ހިންގަމުންދާ ނަސްލު ނައްތާލުމުގެ ހަނގުރާމަ ހުއްޓުވުމެވެ.
އޮކްޓޯބަރު މަހުގެ ކުރީކޮޅު އިޒްރޭލާއި ހަމާސް ޖަމާޢަތާ ދެމެދު ސުލްހައިގެ އެއްބަސްވުމެއްގައި ސޮއިކުރެވުނު ނަމަވެސް، އެ އެއްބަސްވުމަށްފަހު ވެސް އިޒްރޭލުން ދަނީ ފަލަސްތީނުގެ އެތައް ސަތޭކަ ބަޔަކު ޝަހީދުކުރަމުންނެވެ. މީގެ އިތުރުން، ޣައްޒާގެ ރައްޔިތުންނަށް އިންތިހާ އަށް ބޭނުންވެފައިވާ އިންސާނީ އެހީގެ ތަކެތި އެތެރެވުމަށް ވެސް އިޒްރޭލުން ދަނީ ހުރަސްތައް ކުރިމަތިކުރަމުންނެވެ. އޮބްޒާވަރުން ސިފަކުރާ ގޮތުގައި މިއީ މެދުނުކެނޑި ހިންގަމުންދާ ނަސްލު ނައްތާލުމުގެ އަމަލުތަކެކެވެ.
