އިޒްރޭލުން އިރުމަތީ ގުދުސްގައި ހުންނަ އަންރުވާ ގެ އިމާރާތްތައް ތަޅާލައިފި

އިޒްރޭލުގެ ސިފައިން، ފަލަސްތީނުގެ ރެފިއުޖީންނަށް އެހީތެރިކަން ފޯރުކޮށްދޭ އދ. ގެ އެޖެންސީ (އަންރުވާ) ގެ ހެޑްކުއާޓާޒްގައި ހުރި ބައެއް އިމާރާތްތައް ތަޅާލައިފި އެވެ.

އިސްލާމީ މުޤައްދަސް ބިމެއް ކަމަށްވާ އިރުމަތީ ގުދުސްގައި ހިންގި މި އަމަލަކީ ބައިނަލްއަގުވާމީ ގާނޫނުތަކާ ކަނޑައެޅިގެން ޚިލާފު، މީގެ ކުރިން ފެނިފައިނުވާ ފަދަ ނުރައްކާތެރި އަމަލެއްގެ ގޮތުގައި އަންރުވާ އިން ވަނީ ސިފަކޮށްފަ އެވެ.

އަންރުވާ އިން އަންގާރަ ދުވަހު ނެރުނު ބަޔާނެއްގައި ބުނެފައި ވަނީ، އިޒްރޭލުގެ ސިފައިން ޝައިޚް ޖައްރާ އަވަށުގައި ހުންނަ އެ އެޖެންސީގެ މަރުކަޒަށް ވަދެގަނެ، އެތަނުގެ މުވައްޒަފުންގެ އަތުން ސާމާނުތައް އަތުލައި، މުވައްޒަފުން ގަދަކަމުން ނެރުމަށްފަހު އިމާރާތްތައް ތަޅާލާފައިވާ ކަމަށެވެ.

"މިއީ ހަމައެކަނި އަންރުވާ އާއި އެ އެޖެންސީގެ އިމާރާތްތަކަށް ދިން ހަމަލާއެއް ނޫން. މިއީ ބައިނަލްއަގުވާމީ ގާނޫނުތަކާއި، އދ. އަށް ލިބިދީފައިވާ އިމްތިޔާޒުތަކަށް އަރައިގަތުމުގެ ސީރިއަސް އަމަލެއް،" އެ އެޖެންސީން ބުންޏެވެ.

ފަލަސްތީނުގެ ރަސްމީ ނޫސް އެޖެންސީ 'ވަފާ' އިން ރިޕޯޓްކޮށްފައިވާ ގޮތުގައި، ބުލްޑޯޒަރުތަކާ އެކު އައި އިޒްރޭލު ސިފައިން ވަނީ އެ ސަރަހައްދުގެ މަގުތައް ބަންދުކޮށް، ސަލާމަތީ ފިޔަވަޅުތައް ވަރުގަދަކުރުމަށް ފަހު އެ މަރުކަޒަށް ވަދެފަ އެވެ.

އަންރުވާގެ ކޮމިޝަނަރ ޖެނެރަލް ފިލިޕް ލަޒަރީނީ ވިދާޅުވި ގޮތުގައި، މި އޮޕަރޭޝަން ހިންގިއިރު އިޒްރޭލުގެ ގާނޫނު ހަދާ މަޖިލީހުގެ މެންބަރުންނާއި ސަރުކާރުގެ އިސްވެރިން އެތަނުގައި ތިއްބެވެ. އަދި މިއީ ފަލަސްތީނުގެ ރެފިއުޖީންގެ އައިޑެންޓިޓީ ނައްތާލުމަށް އިޒްރޭލުން ކުރަމުންދާ މަސައްކަތުގެ ބައެއް ކަމަށް އޭނާ ފާހަގަކުރެއްވި އެވެ.

ލަޒަރީނީ އިންޒާރު ދެއްވި ގޮތުގައި، މި އަމަލަކީ ނުރައްކާތެރި ފެށުމެކެވެ. "މިއަދު އަންރުވާ އަށް މި ދިމާވި ކަންތައް، މާދަމާ އެހެން ކޮންމެ ބައިނަލްއަގުވާމީ ޖަމްއިއްޔާއަކަށް ނުވަތަ ޑިޕްލޮމެޓިކް މިޝަނަކަށް ވެސް ކުރިމަތިވެދާނެ،" އޭނާ ވިދާޅުވި އެވެ.

އިޒްރޭލުން ޒަމާނުއްސުރެ ތުހުމަތުކުރަމުން ދަނީ އަންރުވާ އަކީ ފަލަސްތީނަށް ތާއީދުކުރާ އަދި ހަމާސް ޖަމާއަތާ ގުޅުން އޮންނަ އިދާރާ އެއް ކަމަށެވެ. ނަމަވެސް އެ އެޖެންސީން ވަނީ އެކަން ތަކުރާރުކޮށް ދޮގުކޮށްފަ އެވެ.

އިޒްރޭލުގެ ހަރުކަށި ފިކުރުގެ ސެކިއުރިޓީ މިނިސްޓަރު އިތަމާރު ބެން-ގަވީރް ވެސް އެ ސަރަހައްދަށް ގޮސް، އެއީ "ތާރީޚީ ދުވަހެއް" ކަމަށް ވަނީ ބުނެފަ އެވެ.

އިޒްރޭލުގެ މި އަމަލު ހިންގާފައިވަނީ ޣައްޒާ އާއި ހިފާފައިވާ ހުޅަނގު އައްސޭރީގައި މަސައްކަތްކުރާ އެހީދޭ ޖަމާއަތްތަކަށް އިޒްރޭލުން ހުރަސްއަޅަމުންދާތީ ބައިނަލްއަގުވާމީ މުޖުތަމައުގެ ފާޑުކިޔުން އިންތިހާއަށް އަމާޒުވެފައިވާ ދަނޑިވަޅެއްގަ އެވެ. ފާއިތުވި ހަފުތާތަކުގައި އިޒްރޭލުން ވަނީ 'ޑޮކްޓާސް ވިތައުޓް ބޯޑާސް' ފަދަ ބައިނަލްއަގުވާމީ 37 ޖަމާއަތެއްގެ ލައިސަންސް ބާތިލުކޮށްފަ އެވެ.

ހަމާސް ޖަމާއަތުން ނެރުނު ބަޔާނެއްގައި، އިޒްރޭލުގެ މި އަމަލު ހަރުކަށި އިބާރާތުން ކުށްވެރިކޮށް، މިއީ ބައިނަލްއަގުވާމީ ގާނޫނުތަކާ ޚިލާފު "ލަދުވެތި ޖަރީމާ އެއް" ކަމަށް ވަނީ ބުނެފަ އެވެ. އަދި އަންރުވާގެ މަސައްކަތްތަކަށް ހުރަސްއެޅުން ހުއްޓުވުމަށް އިޒްރޭލަށް މަޖުބޫރުކުރުވުމަށް ބައިނަލްއަގުވާމީ މުޖުތަމައަށް ހަމާސް އިން ވަނީ ގޮވާލާފަ އެވެ.