ހުޅުމާލެ ޖަލުގައި ހުކުމް ތަންފީޒުކުރަމުން ދިޔަ އިތުރު މީހަކު ނިޔާވެއްޖެ، މިއީ ހޯމަ ދުވަހު ނިޔާވި ދެވަނަ މީހާ

މޯލްޑިވްސް ކަރެކްޝަނަލް ސަރވިސް ގެ ހުޅުމާލޭ ޖަލުގައި ދިގު ޙުކުމެއް ތަންފީޒު ކުރަމުންދިޔަ އިތުރު ގައިދީއަކު ނިޔާވެއްޖެ އެވެ. 

މޯލްޑިވްސް ކަރެކްޝަނަލް ސަރވިސް އިން ބުނި ގޮތުގައި ނިޔާވީ  ސ. ހިތަދޫ، ދިއްގާގަސްދޮށުގެ / ޙަސަން ނިޔާޒް (45އ) އެވެ. 

ހޯމަ ދުވަހުގެ މެންދުރު ފަހު ނިޔާޒް އަށް ކުއްލި މެޑިކަލް އެމަރޖެންސީއެއް ދިމާވެ، ހުޅުމާލޭ ހޮސްޕިޓަލަށް އަވަސް ފަރުވާއަށް 13:30 ގެންދެވި، ފަރުވާ ދޭން ފެށި ކަމަށާއި އަދި 14:05 ގައި އޭނާ ނިޔާވި ކަމަށް ޑޮކްޓަރުން އަންގާފައި ވާކަމަށް ކަރެކްޝަންސް އިން ބުނެފައިވެ އެވެ. 

އިތުބާރު ހުރި މަސްދަރަކުން ރާއްޖެ އެމްވީ އަށް މައުލޫމާތު ދެއްވި ގޮތުގައި ފުލުހުން ނިޔާޒް ގެ އާއިލާ އަށް ގުޅާފަ ބުނީ ނިޔާޒް ފާހާނަ ތެރެއަށް މަރުވެގެން ވެއްޓިފަ އޮތް ކަމަށެވެ. ނަމަވެސް ހުޅުމާލެ ހޮސްޕިޓަލުން ބެއްލެވި ޑޮކްޓަރު ވިދާޅުވީ ހޮސްޕިޓަލަށް ގެންދިޔަ އިރު ވިންދު ހުރި ކަމަށާއި ކަރުގައި އެއްޗެއް ޖެހިފަ ހުރި ކަމުގެ ނިޝާން ހުރި ކަމަށެވެ. 

ހަސަން ނިޔާޒް ގެ މަރުގައި ސުވާލު އުފެދޭ ކަންތައްތަކެއް ވާކަމަށް ތުހުމަތުކޮށް ބައެއް ފަރާތްތަކުން ސޯޝަލް މީޑިއާގައި ދަނީ އަޑު އުފުލަމުންނެވެ. ހަސަން ނިޔާޒް އަށް އަނިޔާކޮށްފައިވާ ކަމަށް ބުނާ ފޮތޯތަކެއް ވެސް ސޯޝަލް މީޑިއާ ގައި ދަނީ ދައުރު ވަމުންނެވެ. 

ޙަސަން ނިޔާޒް ނިޔާވުމާ ގުޅިގެން ވަގުތުން އެކަން މޯލްޑިވްސް ޕޮލިސް ސާވިސް އަށާއި އޭނާގެ ޢާއިލާ އަށް އަންގާފައިވާނެ ކަމަށް ކަރެކްޝަންސް އިން ބުންޏެވެ. މީގެ އިތުރުން އިންސްޕެކްޓާ އޮފް ކަރެކްޝަނަލް ސާވިސް އަށާއި ހިއުމަން ރައިޓްސް ކޮމިޝަން އޮފް ދަ މޯލްޑިވްސް އަށާއި ނެޝަނަލް އިންޓެގްރިޓީ ކޮމިޝަނަށް ވެސް  އަންގާފައިވާ ކަމަށް އެ އިދާރާއިން ބުންޏެވެ.

ހަސަން ނިޔާޒް ގެ އިތުރުން، ހޯމަ ދުވަހުގެ ހެނދުނުގަ ވަނީ ހުޅުމާލެ ޖަލުގައި ހުކުމްތަންފީޒު ކުރަމުން ދިޔަ  މާލޭ ދަފްތަރު ނރ.439، އުމުރުން 53 އަހަރުގެ އިބްރާހިމް ސުހައިލް ވެސް ނިޔާވެފަ އެވެ. އޭނާ ނިޔާވީ ސިއްޙީ ހާލު ދެރަވެގެން އައިޖީއެމްއެޗް ގައި އެޑްމިޓްކޮށްގެން ފަރުވާ ދެމުން ގެންދާތާ ހަފްތާއެއް ވެފައިވަނިކޮށް ކަމަށް ކަރެކްޝަންސް އިން ވަނީ ބުނެފަ އެވެ.