މަނާ ކޮށްފައިވާ ވޭޕް ގެ ވިޔަފާރި، ފުޅާ ދާއިރާއެއްގައި ކުރާ ޒުވާނަކު ހައްޔަރުކޮށްފި
ގާނޫނުން މަނާކޮށްފައިވާ ވޭޕްގެ ވިޔަފާރި ފުޅާ ދާއިރާއެއްގައި ކުރުމުގެ ތުހުމަތުގައި 25 އަހަރުގެ ގ. ވައިޓްރޯސް ނުހާމް މުހައްމަދު ޝިޔާން ހުޅުމާލެ އިން ފުލުހުން ވަނީ ހައްޔަރު ކޮށްފައި.
ފުޅާ ދާއިރާއެއްގައި ވޭޕް ގެ ވިޔަފާރި ކުރާކަމުގެ ތުހުމަތުގައި ހުޅުމާލެ އިން ހައްޔަރުކުރި ނުހާމް މުހައްމަދު ޝިޔާން | ޕޮލިސް މީޑިޔާ
2024 ވަނަ އަހަރު ގާނޫނަކުން މަނާ ކޮށްފައިވާ ވޭޕް ގެ ވިޔަފާރި ފުޅާ ދާއިރާއެއްގައި ކުރާކަމުގެ ތުހުމަތުގައި ފުލުހުން ޒުވާނަކު ހައްޔަރުކޮށްފި އެވެ.
މި މައްސަލައިގައި ހުޅުމާލެ އިން ހައްޔަރުކުރީ، ގ. ވައިޓްރޯސް، އުމުރުން 25 އަހަރު ގެ ނުހާމް މުހައްމަދު ޝިޔާން ކަމަށް ފުލުހުން ބުނެ އެވެ.
ފުލުހުން ބުނީ ބުރާސްފަތި ދުވަހު ހުޅުމާލޭގައި ހިންގި އޮޕަރޭޝަނެއްގައި އޭނާ ހައްޔަރުކޮށް، އޭނާ ދިރިއުޅޭ އެޕާޓްމަންޓު ބަލައި ފާސްކުރިއިރު ގިނަ އަދަދެއްގެ ނެނޯ ކާޓްރިޖާއި ވޭޕް އަދި ޕޮޑު ގެ އިތުރުން ފައިސާ ފެނިފައިވާ ކަމަށެވެ. މި މައްސަލައާ ގުޅިގެން ނުހާމް މުހައްމަދު ޝިޔާންގެ ބަންދާމެދު ގޮތެއް ނިންމުމަށް ކޯޓަށް ހާޒިރުކުރުމުން 15 ދުވަހަށް ބަންދުކުރުމަށް ވަނީ އަމުރުކޮށްފަ އެވެ.
ރާއްޖޭގައި ވޭޕް ބޭނުންކުރުމާއި ވޭޕް އެތެރެކުރުން މަނާކުރީ 15 ޑިސެމްބަރު 2024 ގަ އެވެ. އަދި އެފަދަ އެއްވެސް އަމަލެއް ކޮށްފިނަމަ ބޮޑެތި އަދަދުތަކުން ޖޫރިމަނާ ކުރަން ވެސް ގާނޫނު ގައި ވަނީ ހިމަނައިފަ އެވެ. މި ގާނޫނު ގެ ދަށުން ވޭޕް ބޭނުންކުރުން، އުފެއްދުން، އެތެރެކުރުން، ވިއްކުން މަނާކޮށްފައިވެ އެވެ.
ރައީސް މުއިއްޒު އެއްވެސް ކަހަލަ ދިރާސާ އެއް ކުރުމެއް ނެތި އަވަސް އަރުވާލައިގެން، ގާނޫނުތަކަށް ގެނެސްފައިވާ ރާއްޖޭގައި މިހާރު ވަނީ އެތައް ބިލިއަން ރުފިޔާގެ ވަގު ވިޔަފާރިތައް އުފެދިފަ ކަމަށް ގިނަ ބަޔަކު ބުނެ އެވެ. ސިނގެރޭޓް އަދި ވޭޕް ހިމެނޭހެން މިފަދަ ވަގު ވިޔަފާރި ތަކުގެ އެންމެ އަޑީގައި ތިބެނީ މި ސަރުކާރުގެ ނުފޫޒުގަދަ ފަރާތްތަށްކަމަށް ވެސް ގިނަ ބަޔަކު ތުހުމަތު ކުރެ އެވެ. މިކަމުގެ ސަބަބުން ސަރުކާރަށް ލިބެންޖެހޭ އާމްދަނީ ގެއްލި، ވަގު ވިޔަފާރި ކުރާ ފަރާތްތަކަށް ބޮޑެތި ފައިދާ ތަކެއް ދަނީ ލިބެމުންނެވެ.
