ތިލަފުށިން ގެއްލުނު މީހާ މަރުވެފަ އޮއްވާ ފެނިއްޖެ؛ މަރުވީ ހައިމާކު ދަތްގަނޑުން ޖެހިގެން!
މަރުވެފައި އޮއްވާ ފެނުނީ ތިލަފުށީގައި ލޭބަރެއްގެ ގޮތުގައި މަސައްކަތް ކުރާ ބަންގްލަދޭޝް އަށް ނިސްބަތްވާ އުމުރުން 24 އަހަރުގެ އަމީން މިއާ.
ތިލަފުށުން މަރުވެފަ އޮއްވާ ފެނުނު އުމުރުން 24 އަހަރުގެ އަމީން މިއާ. | ރާއްޖެ އެމްވީ
ސިނާއީ މަސައްކަތް ކުރުމަށް ހާއްސަ މާލެ އަތޮޅު ތިލަފުށިން ގެއްލިގެން ހޯދަމުން ދިޔަ މިހާ މަރުވެފަ އޮއްވާ ފެނިއްޖެ އެވެ.
ބުދަ ދުވަހުގެ ހަވީރު މީޑިއާ ތަކަށް ފުލުހުން ހިއްސާކުރި މެސެޖެއްގައި ވަނީ، ތިލަފުށީ ސައިޓެއްގައި މަސައްކަތް ކުރާ ބިދޭސީއަކު މިދިޔަ ހޯމަ ދުވަހު ގެއްލިފައިވާ ކަމަށް ރިޕޯޓުކުރީ ބުދަ ދުވަހު ކަމަށެވެ.
އިތުބާރުހުރި މަސްދަރަކުން ރާއްޖެ އެމްވީ އަށް މައުލޫމާތު ދިން ގޮތުގައި މަރުވެފަ އޮއްވާ ފެނުނީ ބަންގްލަދޭޝް އަށް ނިސްބަތްވާ އަމީން މިއާ ނަމަކަށް ކިޔާ އުމުރުން 24 އަހަރުގެ ލޭބަރެކެވެ.
އަމީން މިއާ ގެ މަރު ގައި ޝާމިލްވާ ކަމަށް ތުހުމަތު ކުރެވެނީ ތިލަފުށީގައި ހައިމާކު ޑްރައިވަރެއްގެ ގޮތުގައި މަސައްކަތްކުރާ ސްރީލަންކާ އަށް ނިސްބަތްވާ މީހެއް ކަމަށް ވެސް މައުލޫމާތު ލިބިފައިވެ އެވެ. އަދި މައުލޫމާތު ލިބުނު ގޮތުގައި އަމީން މިއާ މަރުވީ، ލަންކާ މީހާ އޮޕަރޭޓް ކުރި ހައިމާކުގެ ދަތްގަނޑުން ޖެހިގެން ނެވެ. މި މަހުގެ 26 ވަނަ ދުވަހު ހައިމާކުގެ ދަތްގަނޑުން މަރުވި އަމީން މިއާ ގައިގަ ޖެހޭ މަންޒަރު އެ ސަރަހައްދުގެ ސީސީޓީވީ ގެ ފޫޓޭޖެ ތަކުން ފެނެ އެވެ.
އަމީން މިއާ އަދި، މި މައްސަލައިގަ ތުހުމަތު ކުރެވޭ ލަންކާ މީހާ ވެސް މަސައްކަތް ކުރަނީ ތިލަފުށީ ވެމްކޯ ސައިޓެއްގަ ކަމަށް ވެސް ވަނީ މައުލޫމާތު ލިބިފައިވެ އެވެ.
