ފުލުހުންގެ މުއައްސަސާގެ ޒަމާން ދުއްވާލި ނާޒިމުގެ ބައިވަރު މައުލޫމާތު ފުލުހުންގެ އަތުގައި އެބަހުރި: ކުރީގެ ސީޕީ

ރައްޔިތުންގެ މަޖިލީހުގެ ނައިބު ރައީސް އަހުމަދު ނާޒިމް މޯލްޑިވްސް ޕޮލިސް ސާވިސް ގެ ޒަމާން ދުއްވާލައިފި ކަމަށާއި އޭނާ އާ ބެހޭ ބައިވަރު މައުލޫމާތު ފުލުހުންގެ އަތުގައި ހުރި ކަމަށް ފުލުހުންގެ ތެރޭގައި މަސައްކަތް ކުރާ އިސް ފުލުހަކު ބުނެފި ކަމަށް ކުރީގެ ކޮމިޝަނަރ އޮފް ޕޮލިސް ހުސެއިން ވަހީދު ވިދާޅުވެއްޖެ އެވެ.

"ރައްޔިތުންގެ މަޖިލިސްގެ ނައިބު ރައީސް މުއައްސަސާ އެއްގެ، މޯލްޑިވްސް ޕޮލިސް ސާވިސްގެ ޒަމާން ދުއްވާލައިފިއޭ،" ސީނިއަރ ރޭންކެއްގެ ފުލުހަކު ބުނި ކަމަށް ހުސެއިން ވަހީދު ވިދާޅުވި އެވެ.

ޕީއެންއެފް ގެ ފްރަންޓް އޮފީސް ޖަލްސާ ގައި ބުރާސްފަތި ދުވަހުގެ ރޭ ވާހަކަ ދައްކަވަމުން ހުސެއިން ވިދާޅުވީ، ފުލުހުންގެ މުއައްސަސާގެ އިންޓެގްރިޓީ ގެއްލުވާލައިފި ކަމަށާއި އެހެން ނަމަވެސް އެކަން އެކުރެއްވި މަޖިލީހުގެ ނައިބު ރައީސް ނާޒިމް އާ ބެހޭ ބައިވަރު މައުލޫމާތު ފުލުހުންގެ އަތުގައި ހުރި ކަމަށެވެ.

"ހަނދާން ކުރައްޗޭ ތިމަންނާމެންގެ އަތުގައި އެބަހުއްޓޭ އެބޭފުޅާ އާ ބެހޭ ބައިވަރު މައުލޫމާތު،" ފުލުސް އޮފިސަރު ބުނި ކަމަށް ހުސެއިން ވިދާޅުވި އެވެ.

"އަޅުގަނޑަށް ޔަގީންވާ ކަމަކީ އޭނާ ދޭ މައުލޫމާތެއް ގައި ހުންނާނެ ރަނގަޅު އެއްޗެހި،" ހުސެއިން ވިދާޅުވި އެވެ.  

ޖަލްސާ ގައި ވާހަކަފުޅު ދައްކަވަމުން ކުރީގެ ރައީސް ޔާމީން ވަނީ ފުލުހުންގެ އިދާރާގައި ކަންކަން ގޯހުން ދާއިރު މުއައްސަސާ އެއްގެ ގޮތުން އެތަން ރަނގަޅު ކުރަން ތެދުވުމުގެ ވިސްނުން އެ މުއައްސަސާގެ ތެރޭގައި ވެސް ހުންނަން ޖެހޭނެ ކަމަށާއި އެއީ ހަމަ އެކަނި ސިޔާސީ މީހުންގެ ޒިންމާ އެއް ނޫން ކަމުގައެވެ.

ޕީއެންއެފް އިން ބާއްވާ ފްރަންޓް އޮފީސް ޖަލްސާ އެއްގައި ވެރިފައި ނުކުރެވޭ ވާހަކަ އެއް ދައްކައިގެން ނުވާނެ ކަމަށް ރައީސް ޔާމީން އޮންނަނީ އަންގަވާފައިކަން ވެސް ހުސެއިން ފާހަގަ ކުރެއްވި އެވެ.