ދުވާލަކު ބޯން ޖެހެނީ ކިހާ މިންވަރެއްގެ ފެނެއް؟

ކޮންމެ ދުވަހަކު ގިނަ ލީޓަރުގެ ފެން ބުއިމަކީ ދުޅަހެޔޮ ސިއްހަތަކާއި، ހަކަތަ އިތުރުވުމާއި، ހަންގަނޑު ރީތިވުމުގެ ސިއްރެއް ކަމަށް ބުނެ އަހަރެމެންނަށް ދަނީ ތަފާތު މެސެޖުތައް ލިބެމުންނެވެ. މީގެ އިތުރުން، ގިނައިން ފެން ބުއިމަކީ ބަރުދަން ލުއިކޮށްދީ، ކެންސަރު ބަލިން ރައްކާތެރިކޮށްދޭނެ ކަމެއްގެ ގޮތުގައިވެސް ދަނީ އިޝްތިހާރު ކުރެވެމުންނެވެ. ފެން ބުއިމަށް އޮތް މި ޝައުގުވެރިކަން އިތުރުވުމުގެ އަސްލަކީ "8x8" ގެ އުސޫލެވެ. މިއީ ރަސްމީ އިރުޝާދެއް ނޫން ނަމަވެސް، މީގެ ދަށުން ލަފާދެނީ އެހެނިހެން ބުއިންތަކުގެ އިތުރުން، ދުވާލަކު 240 މިލިލީޓަރުގެ އަށް ތަށި ފެން (ޖުމްލަ ގާތްގަނޑަކަށް ދެ ލީޓަރު) ބުއިމަށެވެ.

އެހެންނަމަވެސް، މި ބުނާ "އުސޫލަކީ" ސައިންޓިފިކް ހޯދުންތަކުން ސާބިތުވާ ކަމެއް ނޫނެވެ. އަދި އިނގިރޭސިވިލާތާއި ވިލާތުގެ އިއްތިހާދުގެ (އީޔޫ) ރަސްމީ އިރުޝާދުތަކުގައި ވެސް އެހާ ގިނައިން ފެން ބޯންޖެހޭނެ ކަމަކަށް ބަޔާންކޮށްފަ އެއް ނުވެ އެވެ.

ދުވާލަކު ބޯންޖެހޭ ފެނުގެ މިންވަރާ ބެހޭގޮތުން އޮޅުންބޮޅުން ބޮޑު މައުލޫމާތުތަކެއް ފެތުރިފައި ވަނީ ކީއްވެގެން ހެއްޔެވެ؟

ބޮޑަށް ބެލެވޭ ގޮތުގައި މިއީ މީގެ އެތައް އަހަރެއް ކުރިން ނެރެފައިވާ ދެ އިރުޝާދެއް ނުބައިކޮށް މާނަކުރުމުގެ ސަބަބުން ދިމާވެފައިވާ ކަމެކެވެ.

1945 ވަނަ އަހަރު، އެމެރިކާގެ ނޭޝަނަލް ރިސާޗް ކައުންސިލްގެ 'ފުޑް އެންޑް ނިއުޓްރިޝަން ބޯޑް' އިން ބޮޑެތި މީހުންނަށް ލަފާދީފައި ވަނީ، ބޭނުންކުރާ ކޮންމެ ކެލަރީއަކަށް އެއް މިލިލީޓަރުގެ ދިޔާ ތަކެތި ބޭނުންކުރުމަށެވެ. މީގެ މާނައަކީ 2,000 ކެލަރީ ހިމެނޭ ކެއުމަކަށް ފަހު އަންހެނަކަށް ދެ ލީޓަރު، އަދި 2,500 ކެލަރީގެ ކެއުމަކަށް ފަހު ފިރިހެނަކަށް ދެ ލީޓަރާއި ބައިގެ ދިޔާ ތަކެތި ބޭނުންވާނެ ކަމެވެ. އެހެން ނަމަވެސް މިއީ ހަމައެކަނި ސާފު ފެނުގެ ވާހަކަ އެއް ނޫނެވެ. މީގެ ތެރޭގައި ގިނަ ބާވަތްތަކުގެ ބުއިންތަކާއި، މޭވާއާއި ތަރުކާރީ ވެސް ހިމެނެއެވެ. ބައެއް މޭވާ އާއި ތަރުކާރީގައި 98 އިންސައްތައާ ހަމައަށް ފެން އެކުލެވިގެންވެ އެވެ.

ހަމައެއާއެކު، 1974 ވަނަ އަހަރު ނިއުޓްރިޝަނިސްޓުން ކަމަށްވާ މާގްރެޓް މެކްވިލިއަމްސް އާއި ފްރެޑްރިކް ސްޓޭއާ ލިޔުއްވި "ނިއުޓްރިޝަން ފޯ ގުޑް ހެލްތު" ފޮތުގައި، ދުވާލަކު 6 އަކާއި 8 އަކާ ދެމެދުގެ އަދަދަކަށް ފެން ތަށި ބުއިމަށް ލަފާދީފައިވެ އެވެ. ނަމަވެސް، މީގެ ތެރޭގައި މޭވާ އާއި ތަރުކާރީގެ އިތުރުން، ކެފެއިން ހުންނަ ބުއިންތަކާއި ފޮނި ބުއިންތައް ވެސް ހިމެނޭނެ ކަމަށް އެ މުސައްނިފުން ލިޔުއްވާފައިވެ އެވެ.

އަހަރެމެންގެ ހަށިގަނޑަށް ބޭނުންވަނީ ކިހާ މިންވަރެއްގެ ފެނެއް؟

ހަށިގަނޑުގައި އަބަދުވެސް ފެން ހުންނަންވާނެ ކަމަށް ގަބޫލުކުރެވޭތީ، ވަރަށް ގިނަ މީހުން ކޮންމެ ތަނަކަށް ދިޔަޔަސް ފެންފުޅި ހިފައިގެން އުޅެ އެވެ. އަދި ހަށިގަނޑަށް ހަގީގަތުގައި ބޭނުންވާ މިންވަރަށްވުރެ އިތުރަށް ފެން ބޮއެ ހަދަ އެވެ.

ލަންޑަންގެ އިންސްޓިޓިއުޓް ފޯރ ސްޕޯޓް، އެކްސަސައިޒް އެންޑް ހެލްތުގެ ޑައިރެކްޓަރ އޮފް ރިސާޗް ހިއު މޮންޓްގޮމެރީ ވިދާޅުވާ ގޮތުގައި، ސަހަރާއެއްގެ މެދުގައި އިންތިހާވއަށް ހޫނުގަދަ ހާލަތެއްގައި ހުރި މީހެއްގެ ހަށިގަނޑުން ގަޑިއަކު އެންމެ ގިނަވެގެން ބޭރުވާނީ ދެ ލިޓަރުގެ ދަލެވެ. ނަމަވެސް އެއީ ވެސް ވަރަށް ނާދިރު ހާލަތެކެވެ.

އޭނާ އިތުރަށް ވިދާޅުވީ، ލަންޑަންގެ އަންޑަގްރައުންޑް ރޭލުގައި ކުރާ 20 މިނެޓުގެ ދަތުރަކަށް 500 މިލިލިޓަރުގެ ފެންފުޅިއެއް ހިފައިގެން ދިއުމަކީ ބޭނުންތެރި ކަމެއް ނޫން ކަމަށެވެ. ސަހަރާއެއްގެ ހޫނުމިނުގައި ދާހިއްލާ ފަދަ މިންވަރަކަށް އެފަދަ ދަތުރެއްގައި ހަށިގަނޑު ހޫނުވުމަކީ ދުރުކަމެކެވެ.

ކަރު ހިއްކުމަށް ބެލުމުގެ ބަދަލުގައި، ރަސްމީ އިރުޝާދުތަކަށް ބަރޯސާވާން ބޭނުންވާ ފަރާތްތަކަށް، އިނގިރޭސިވިލާތުގެ އެން.އެޗް.އެސް އިން ލަފާ ދެނީ ދުވާލަކު 6 އަކާއި 8 އަކާ ދެމެދުގެ އަދަދަކަށް  ފެން ތަށި ނުވަތަ ދިޔާ އެއްޗެހި ބުއިމަށެވެ. މީގެ ތެރޭގައި ފެޓް މަދު ކިރާއި، ހަކުރު ނުހުންނަ ބުއިންތަކުގެ އިތުރުން ސައި އަދި ކޮފީ ވެސް ހިމެނެ އެވެ.

މީގެ އިތުރުން، އުމުރުން 60 އަހަރުން މަތިވުމުން ކަރުހިއްކުން އިހުސާސްވުމުގެ ބާރު ދަށްވާކަން ހަނދާން ބެހެއްޓުން މުހިންމެވެ. 2022 ވަނަ އަހަރު ޝާއިޢުކުރި ދިރާސާއަކުން ދައްކާ ގޮތުގައި، އުމުރުން ދުވަސްވީ މީހުންގެ ހަށިގަނޑުން ފެން މަދުވުމުން ފެންނަ އަލާމާތްތަކަށް ގިނަ ފަހަރަށް ސަމާލުކަން ނުދެވިދެ އެވެ.

ތަޖުރިބާކާރުން ވިދާޅުވާ ގޮތުގައި، އުމުރުން ދުވަސްވަމުންދާ ވަރަކަށް ކަރުހިއްކުން އިހުސާސްކޮށްދޭ ތަބީޢީ ނިޒާމުގެ ބާރު ދެރަވެ، ޒުވާނުންނަށްވުރެ ބޮޑަށް ހަށިގަނޑުން ފެން މަދުވުމުގެ ފުރުސަތު ބޮޑުވެއެވެ. އެހެންކަމުން، ދުވަސްވީ މީހުން ހަށިގަނޑު ހައިޑްރޭޓްކޮށް ބެހެއްޓުމަށްޓަކައި ފެން ބޯ މިންވަރަށް ޚާއްޞަ ސަމާލުކަމެއް ދޭންޖެހެ އެވެ.

ގިނަ ތަޖުރިބާކާރުން އެއްބަސްވާ ގޮތުގައި، މީހަކު ބޯންޖެހޭ ފެނުގެ މިންވަރު ބިނާވެފައިވަނީ އެމީހެއްގެ އުމުރާއި، ހަށިގަނޑުގެ ބޮޑުމިނާއި، ޖިންސާއި، ދިރިއުޅޭ މާހައުލުގެ އިތުރުން ކުރާ މަސައްކަތުގެ މައްޗަށެވެ.

ދުވާލަކު އަށް ތަށި ފެން ބޯންޖެހޭނެ ކަމަށް ބުނާ "8x8" އުސޫލަކީ، އިންސާނާގެ ހަށިގަނޑު މާހައުލާ ގުޅިގެން މަސައްކަތްކުރާ ގޮތަށް ބަލާއިރު، ވަރަށް އާދައިގެ އަދި ހަގީގަތާ ދުރު ވިސްނުމެއް ކަމަށް ތަޖުރިބާކާރުން ވިދާޅުވެ އެވެ. ހަށިގަނޑަށް ހަކަތަ ބޭނުންވާ މިންވަރު ބަލާއިރު މާހައުލުގެ ފިނިހޫނުމިނަށާއި ކުރާ މަސައްކަތުގެ މިންވަރަށް ރިއާޔަތްކުރާ ފަދައިން، ފެން ބޭނުންވާ މިންވަރު ބެލުމުގައި ވެސް މި ކަންކަމަށް ވިސްނަން ޖެހެ އެވެ.

2022 ވަނަ އަހަރު ޔުނިވަރސިޓީ އޮފް އެބަޑީންގެ ދިރާސާވެރިން ހޯދި ގޮތުގައި، އާންމުކޮށް އިރުޝާދުދޭ ދެ ލީޓަރު ނުވަތަ އަށް ތަށި ފެނުގެ ބަދަލުގައި، އިންސާނަކަށް ދުވާލަކު ބޭނުންވަނީ 1.5 އާއި 1.8 ލީޓަރާ ދެމެދުގެ މިންވަރެކެވެ. 23 ގައުމެއްގެ ސައިންސްވެރިންނާ ގުޅިގެން ކުރިއަށް ގެންދިޔަ މި ދިރާސާއިން އެނގުނު ގޮތުގައި، ހޫނު އަދި ތެތްފިނިކަން ގަދަ މާހައުލުތަކުގައި އުޅޭ މީހުންނާއި، އުސް ބިންތަކުގައި ދިރިއުޅޭ މީހުންނާއި، ކުޅިވަރު ކުޅުންތެރިންގެ އިތުރުން މާބަނޑު މީހުންނާއި ކިރުދޭ މައިންނަށް އެހެން މީހުންނަށްވުރެ ގިނައިން ފެން ބޭނުންވެ އެވެ. މީހަކަށް ފެން ބޭނުންވާ މިންވަރު ދެނެގަތުމަށް ބޭނުންކުރެވޭނެ އެންމެ މުހިންމު މިންގަނޑަކީ އެމީހަކު އަންދާ ހަކަތައިގެ މިންވަރެވެ. އެހެންކަމުން، ހުރިހާ އެންމެން އެއް މިންގަނޑަކަށް އަމަލުކުރުމަކީ އެންމެ ރަނގަޅު ގޮތެއް ނޫނެވެ.

ގިނަ މާހިރުން އެއްބަސްވާ ގޮތުގައި، ކޮންމެ ދުވަހަކު ވަކި މިންވަރަކަށް ފެން ބޯންޖެހޭނެ ކަމަށް ބުނާ ބުނުމާ މެދު ކަންބޮޑުވާކަށް ނުޖެހެ އެވެ. ބަނޑުހައިވުމުން ނުވަތަ ވަރުބަލިވުމުން ހަށިގަނޑު އެކަން އަންގައިދޭ ފަދައިން، ފެން ބޭނުންވުމުން ވެސް ކަރުހިއްކުމުގެ ޒަރީއާ އިން ހަށިގަނޑު އެކަން އަންގައިދެ އެވެ. ހަށިގަނޑަށް ބޭނުންވާ މިންވަރަށް ވުރެ އިތުރަށް ފެން ބުއިމުން ލިބޭ ހަމައެކަނި ސިއްހީ ފައިދާ އަކީ، ގިނަގިނައިން ފާޚާނާއަށް ދާންޖެހުމުގެ ސަބަބުން މަދު ކެލޮރީކޮޅެއް ހަށިގަނޑުން އަންދާލެވުން އެކަނި ކަމަށް ބެލެވެއެވެ.