އެމެރިކާގެ ކާނާގެ އުސޫލުތަކަށް ބޮޑު ބަދަލެއް؛ އާޓިފިޝަލް ހަކުރާ ދުރުވެ، މަހާއި ކިރު ބޭނުން ކުރުމަށް ބާރުއަޅަނީ
8 ޖެނުއަރީ 2026 | ބުރާސްފަތި 09:10މިއީ ފާއިތުވި ދިހަވަރަކަށް އަހަރުގެ ތެރޭގައި އެމެރިކާގެ ކާނާގެ ސިޔާސަތައް ގެނައި އެންމެ ބޮޑު އެއް ބަދަލު. އާ އުސޫލުގައި ބާރުއަޅަނީ ކާނާގައި ޕްރޮޓީން ހިމެނޭ މިންވަރު އިތުރުކުރުމަށް. މީގެ ތެރޭގައި އެއްގަމު މަހާ ބިސް ހިމެނޭ.
އެމެރިކާގެ ސެކެރެޓަރީ އޮފް ހެލްތް ރޮބަޓް އެފް ކެނެޑީ ޖޫނިއަރ | ނިއު ޔޯކް ޓައިމްސް
އެމެރިކާގެ ރައްޔިތުން ކެއިން ބުއިމުގައި ގެންގުޅޭ މިންގަނޑުތަކަށް ނުވަތަ "ޑައިޓަރީ ގައިޑްލައިންސް" އަށް ޓްރަމްޕް ސަރުކާރުން ބޮޑެތި ބަދަލުތަކެއް ގެނެސްފި އެވެ.
މިއީ ފާއިތުވި ދިހަވަރަކަށް އަހަރުގެ ތެރޭގައި އެމެރިކާގެ ކާނާގެ ސިޔާސަތަށް ގެނައި އެންމެ ބޮޑު އެއް ބަދަލެވެ.
އެމެރިކާގެ ހެލްތު އެންޑް ހިއުމަން ސާވިސަސް ސެކްރެޓަރީ ރޮބަޓް އެފް ކެނެޑީ ޖޫނިއަރ (އާރު.އެފް.ކޭ ޖޫނިއަރ) އިސްވެ ހުންނަވައި އިއުލާންކުރެއްވި މި އާ އުސޫލުތަކުގެ ދަށުން، މީގެ ކުރިން ސިއްހީ މާހިރުން މަދުކުރުމަށް ބާރުއެޅި ބައެއް ބާވަތްތައް ބޭނުން ކުރުމަށް މިހާރު ވަނީ ބާރުއަޅާފަ އެވެ. އެގޮތުން އައު އުސޫލުގެ ބައިތައް ތިރީގައި މިވަނީ އެވެ.
ޕްރޮޓީން އަށް އިސްކަން ދިނުން
އާ އުސޫލުގައި ބާރުއަޅަނީ ކާނާގައި ޕްރޮޓީން ހިމެނޭ މިންވަރު އިތުރުކުރުމަށެވެ. މީގެ ތެރޭގައި އެއްގަމު މަހާއި އާއި ބިސް ހިމެނެ އެވެ.
ފުލް-ފެޓް ކިރުގެ ބާވަތްތައް
ކުރިން ބޭނުން ކުރުމަށް ލަފާދިން "ލޯ-ފެޓް" ނުވަތަ ފެޓް މަދު ކިރުގެ ބަދަލުގައި، މިހާރު ބާރުއަޅަނީ ފުލް-ފެޓް ކިރާއި ބަޓަރު ފަދަ ތަކެތި ބޭނުން ކުރުމަށެވެ.
ޕްރޮސެސް ކުރި ކާނާ މަނާކުރުން
ފެކްޓްރީތަކުގައި ތައްޔާރުކޮށްފައި ހުންނަ "އަލްޓްރާ-ޕްރޮސެސްޑް" ކާނާ، މިސާލަކަށް ޗިޕްސް، ކޮންފެކްޝަނަރީ އަދި ފޮނި ބުއިންތައް ބޭނުންކުރުން ހުއްޓާލުމަށް ވަނީ ވަރަށް ބޮޑަށް އިލްތިމާސްކޮށްފަ އެވެ.
ހަކުރު މަދުކުރުން
އާޓިފިޝަލް ހަކުރާއި އިތުރަށް ފޮނިކުރަން އަޅާ އެއްޗެހި އެއްކޮށް ކެއުމުން ދުރުހެލި ވުމަށް ވަނީ އަންގާފަ އެވެ. ކޮންމެ އިރެއްގެ ކެއުމެއް ގައި 10 ގްރާމަށްވުރެ ގިނައިން ހަކުރު ނުބެހެއްޓުމަށް ވަނީ ލަފާދީފަ އެވެ.
ސެކެރެޓަރީ ކެނެޑީ ވިދާޅުވީ، މިއީ އެމެރިކާގެ ރައްޔިތުން، ޚާއްޞަކޮށް ކުޑަކުދިންގެ ސިއްހަތު ރަނގަޅު ކުރުމަށް ފެށި "މޭކް އެމެރިކާ ހެލްތީ އެގެއިން" (MAHA) އެޖެންޑާގެ ދަށުން ކުރެވޭ މުހިންމު މަސައްކަތެއް ކަމަށެވެ. އަދި މީގެ ކުރިން އޮތް "ފުޑް ޕިރަމިޑް" ނުވަތަ ކާނާގެ ތަރުތީބުވެސް ބަދަލުކޮށް، ގްރެއިންސް ނުވަތަ ގޮދަނުގެ ބާވަތްތަކުގެ ބަދަލުގައި ޕްރޮޓީން އަށް ބޮޑު އިސްކަމެއް ދޭނެ ކަމަށް އޭނާ ވިދާޅުވި އެވެ.
ނަމަވެސް، ބައެއް ސިއްހީ މާހިރުން ވަނީ މި ބަދަލުތަކާ މެދު ކަންބޮޑުވުން ފާޅުކޮށްފަ އެވެ. ޚާއްޞަކޮށް ސެޗުރޭޓަޑް ފެޓް ނުވަތަ ސަރުބީ ގިނަ ކާނާ ބޭނުން ކުރުން އިތުރު ކުރުމަކީ ހިތުގެ ބަލިތަކަށް މަގުފަހިވެދާނެ ކަމެއްގެ ގޮތުގައި ބައެއް ޑޮކްޓަރުން ފާހަގަކުރެ އެވެ.
މި އާ ގައިޑްލައިންތަކުގެ ސަބަބުން އެމެރިކާގެ ސްކޫލްތަކުގެ މެންދުރުގެ ކެއުމާއި، އަސްކަރިއްޔާގެ ކާނާގެ މިންގަނޑުތަކަށް ވެސް ބޮޑެތި ބަދަލުތަކެއް އަންނާނެ ކަމަށް ބެލެވެ އެވެ.
