އިންޑިއާ ގައި ނުރައްކާތެރި ނިޕާ ވައިރަސް ފެތުރެމުންދާތީ، އޭޝިއާގެ ގައުމުތަކުގެ އެއާޕޯޓްތަކުގައި ކޮވިޑް ދުވަސްވަރުގެ ފިޔަވަޅުތައް އަޅަން ފަށައިފި

އިންޑިއާ ގައި ނުރައްކާތެރި ނިޕާ ވައިރަސް ފެތުރެމުންދާތީ، އޭޝިއާގެ ބައެއް ގައުމުތަކުގެ އެއާޕޯޓްތަކުގައި ސިއްހީ ގޮތުން ބަލަންޖެހޭ ކަންކަން ބަލައި، ކޮވިޑް ދުވަސްވަރު އަމަލު ކުރި ގޮތަށް ފިޔަވަޅުތައް ވަރުގަދަ ކުރަން ފަށައިފިއެވެ.

އިންޑިއާގެ ހުޅަނގު ބެންގާލުން ނިޕާ ވައިރަހުގެ ފަސް ކޭސް ފެނުމާ ގުޅިގެން، ރައްކާތެރިކަމުގެ ފިޔަވަޅުތައް ވަރުގަދަކޮށްފައިވާ ގައުމުތަކުގެ ތެރޭގައި ތައިލެންޑް، ނޭޕާލް އަދި ތައިވާން ހިމެނެ އެވެ.

ނިޕާ ވައިރަހަކީ ޖަނަވާރުންގެ ފަރާތުން އިންސާނުންގެ ގަޔަށް އަރާ ބައްޔެކެވެ. މިއީ މައިގަނޑު ގޮތެއްގައި ބަލިޖެހިފައިވާ އޫރާއި ވާލުގެ ފަރާތުން ފެތުރޭ ބައްޔެއް ނަމަވެސް، އެކަކު އަނެކަކާ ގާތުން މުއާމަލާތް ކުރުމުގެ ސަބަބުންވެސް މި ބަލި ފެތުރެއެވެ.

ހުޅަނގު ބެންގާލްގެ ހޮސްޕިޓަލަކުން މި ވައިރަސް ފެނުމާ ގުޅިގެން، ގާތްގަނޑަކަށް 100 އެއްހާ މީހުން ވަނީ ކަރަންޓީނު ކޮށްފަ އެވެ. އެންމެ ފުރަތަމަ ބަލި ޖެހިފައިވާ ކަމަށް ކަށަވަރުވި ދެ ނަރުހުންގެ އިތުރުން، އެ ހޮސްޕިޓަލުގެ ޑޮކްޓަރަކާއި، ނަރުހަކާއި އަދި އެހެން މުވައްޒަފަކު ވެސް ވަނީ މި ބައްޔަށް ޕޮޒިޓިވް ވެފައެވެ.

ތައިލެންޑުގެ މިނިސްޓްރީ އޮފް ޕަބްލިކް ހެލްތުން މިހާރު ވަނީ ހުޅަނގު ބެންގާލުން އަންނަ ފަސިންޖަރުން ޗެކްކުރުމުގެ މަސައްކަތް ބޮޑެތި އެއާޕޯޓްތަކުގައި ވަރުގަދަކޮށްފަ އެވެ. މިކަމުގައި ބޭނުންކުރަމުންދަނީ ކޮވިޑް-19 ގެ ބަލިމަޑުކަމުގެ ތެރޭގައި އަމަލުކުރި އުސޫލުތަކެވެ.

ތައިލެންޑުގެ ބޮޑެތި އެއާޕޯޓުން ދަތުރުކުރާ ފަސިންޖަރުންގެ ހުން ހުރިތޯއާއި ބަލީގެ އެހެނިހެން އަލާމާތްތައް ހުރިތޯ ދަނީ ބަލަމުންނެވެ. މީގެ އިތުރުން، ދަތުރުވެރިން ބަލިވެއްޖެ ހާލަތެއްގައި އަމަލުކުރަންޖެހޭ ގޮތުގެ މައުލޫމާތު ހިމެނޭ  ކާޑުތައްވެސް ދަނީ ދޫކުރަމުންނެވެ.

ރައްކާތެރިކަމުގެ ފިޔަވަޅެއްގެ ގޮތުން ޕުކެޓް އިންޓަނޭޝަނަލް އެއާޕޯޓް ސާފުތާހިރުކުރުމާއި ބަލި ކޮންޓްރޯލް ކުރުމުގެ ތައްޔާރީތައް ވަނީ އިތުރުކޮށްފަ އެވެ. އިންޑިއާގެ އިންޑިގޯ އެއާލައިނުން ކަލްކަތާ އާއި ޕުކެޓާ ދެމެދު ކޮންމެ ދުވަހަކު ސީދާ ފްލައިޓްތައް ބާއްވަ އެވެ.

މިކަމާ ގުޅޭގޮތުން އާންމުންގެ މެދުގައި އުފެދިފައިވާ ކަންބޮޑުވުންތަކަށް ޖަވާބު ދެއްވަމުން ތައިލެންޑުގެ ބޮޑުވަޒީރު އަނޫޓިން ޗާންވީރަކުލް ވިދާޅުވީ، އެ ގައުމުން އަދި ނިޕާ ވައިރަހުގެ ކޭހެއް ފެނިފައި ނުވި ނަމަވެސް، ފާރަވެރިވުމުގެ ފިޔަވަޅުތައް މަތީ ދަރަޖައެއްގައި ދަމަހައްޓާނެ ކަމަށެވެ.

ނޭޕާލަށް ބަލި އައުން ހުއްޓުވުމަށްޓަކައި، ކަތުމަންޑޫގެ ތްރިބުވަން އިންޓަނޭޝަނަލް އެއާޕޯޓާއި، އިންޑިއާއާ ގުޅޭ މައިގަނޑު ބޯޑަރުތަކުގެ ސަލާމަތީ ފިޔަވަޅުތައް ވަރުގަދަކޮށް، ސިއްހީ ގޮތުން ބަލަންޖެހޭ ކަންކަން އެ ގައުމުގެ ސަރުކާރުން މިހާރު ވަނީ ހަރުދަނާކޮށްފަ އެވެ.

ދަތުރުވެރިންގެ ކިބައިން ބަލީގެ އަލާމާތްތައް ފެނޭތޯ ބެލުމަށް ހެލްތު ޑެސްކުތައް ގާއިމުކޮށްފައިވާއިރު، ޝައްކުކުރެވޭ ފަދަ ކޭސްތައް ރިޕޯޓްކުރުމަށާއި އެފަދަ ކަންކަން ބެލެހެއްޓުމަށް ހޮސްޕިޓަލްތަކާއި ބޯޑަރު ސަރަހައްދުގެ ސިއްހީ މަރުކަޒުތަކަށް ވަނީ އަންގާފަ އެވެ. އަދި އިންޑިއާގެ ވެސްޓް ބެންގާލާ ދިމާލުން އޮންނަ ބޯޑަރަކީ ހުޅުވިފައިވާ ބޯޑަރަކަށް ވެފައި، ކޮންމެ ދުވަހަކު ގިނަ އަދަދެއްގެ ބަޔަކު ދަތުރުފަތުރު ކުރަމުންދާތީ، އެކަމުގެ ސަބަބުން ކުރިމަތިވެދާނެ ގޮންޖެހުންތަކާ މެދު ކަމާބެހޭ ފަރާތްތަކުން ވަނީ ކަންބޮޑުވުން ފާޅުކޮށްފަ އެވެ.

ނޭޕާލްގެ ހެލްތު މިނިސްޓްރީގެ ތަރުޖަމާނު ޑރ. ޕްރަކާޝް ބުދަތޯކީ ވިދާޅުވި ގޮތުގައި، ބަލި ފެތުރުން ހުއްޓުވުމަށްޓަކައި އަޅަންޖެހޭ އެކަށީގެންވާ ފިޔަވަޅުތައް މިހާރު ވަނީ އަޅާފަ އެވެ.

އޭނާ އިތުރަށް ވިދާޅުވީ، އެއާޕޯޓާއި އިންޑިއާ ބޯޑަރު ހުރަސްކޮށް އެ ގައުމަށް އެތެރެވާ ފަރާތްތައް ވަކިވަކިން ސްކްރީން ކުރުމުގެ މަސައްކަތް ސަރުކާރުން މިހާރު ފަށާފައިވާ ކަމަށެވެ.

ތައިވާނުގެ ސިއްހީ އިދާރާތަކުން ނިޕާ ވައިރަސް އަކީ އަލަށް ފެތުރޭ ނުރައްކާތެރި ބަލިތަކަށް ކަނޑައަޅާފައިވާ އެންމެ މަތީ ދަރަޖަ ކަމުގައިވާ "ކެޓަގަރީ 5" ގެ ބައްޔެއްގެ ގޮތުގައި އެ ގައުމުގެ ގާނޫނުގައި ކަނޑައެޅުމަށް މިހާރު ދަނީ ތައްޔާރުވަމުންނެވެ.

މި ނިންމުމަށް އަމަލުކުރަން ފެށުމުގެ ކުރިން، އާންމުންގެ ހިޔާލު ހޯދުމަށް 60 ދުވަހުގެ މުއްދަތެއް ދިނުމަށް ވަނީ ހަމަޖެހިފަ އެވެ. ނިޕާ ވައިރަސް އަކީ ފުރާނައަށް ނުރައްކާވުމުގެ ފުރުސަތު ބޮޑު އަދި ބާރުމިނުގައި ފެތުރިދާނެ ބައްޔަކަށް ވާތީ، މި ނިންމުމުގެ ދަށުން ބަލީގެ ކޭސް އެއް ފެނިއްޖެ ނަމަ ވަގުތުން ރިޕޯޓުކުރުމާއި، ބަލި ފެތުރުން ހުއްޓުވުމަށް ހާއްސަ ފިޔަވަޅުތަކެއް އެޅުން މަޖުބޫރުވާނެ އެވެ.

ތައިވާނުގެ ސެންޓަރ ފޯ ޑިޒީޒް ކޮންޓްރޯލް (ސީޑީސީ) އިން ހާމަކޮށްފައިވާ ގޮތުގައި، އިންޑިއާގެ ކެރެލާ ސްޓޭޓަށް ދަތުރުކުރާ ފަރާތްތަކުން ސަމާލުވުމަށް އިލްތިމާސްކޮށް، "ލެވެލް 2" ގެ ރީނދޫ އެލާޓް މިހާރު ވަނީ ނެރެފަ އެވެ.

ސީޑީސީގެ ޑެޕިއުޓީ ޑިރެކްޓަރ ޖެނެރަލް ލިން މިންގް-ޗެންގް ވިދާޅުވީ، ބަލި ފެތުރެމުންދާ މިންވަރަށް ބަލައި ދަތުރުފަތުރުގެ އިރުޝާދުތަކަށް ބަދަލު ގެންނަމުންދާނެ ކަމަށެވެ.

ދުނިޔޭގެ ސިއްހަތު ޖަމްއިއްޔާ (ޑަބްލިއު.އެޗް.އޯ) އިން ވެސް ވަނީ ނިޕާ ވައިރަސް އަކީ ބޮޑު ބަލިމަޑުކަމަކަށް ބަދަލުވުމުގެ ފުރުސަތު އޮތް، ހާއްސަ އިސްކަމެއް ދޭންޖެހޭ ނުރައްކާތެރި ބައްޔެއްގެ ގޮތުގައި ފާހަގަކޮށްފަ އެވެ.