ކްރިއޭޓިން: ހަށިގަނޑު ބިނާކުރުމަށް ބޭނުންކުރާ ސަޕްލިމެންޓެއް، ސިކުނޑީގެ ހަރަކާތްތެރިކަން އިތުރުކޮށްދޭ ވެސް އެއްޗެއް

ކްރިއޭޓިން: ހަށިގަނޑު ބިނާކުރުމަށް ބޭނުންކުރާ ސަޕްލިމެންޓަކަށް ވުމުގެ އިތުރުން މިއީ ސިކުނޑީގެ ހަރަކާތްތެރިކަން އިތުރުކޮށްދޭ އެއްޗެއް ވެސް މެއެވެ.

ހަށިގަނޑުގެ މަސްތައް އުފައްދާ ވަރުގަދަ ކުރަން ބޭނުންވާ މީހުން އާންމުކޮށް ކްރިއޭޓިން ބޭނުންކުރެ އެވެ. އެކަން އެހެން އޮތް އިރު، މިހާރު ސައިންސްވެރިން ދަނީ މި ކެމިކަލްގެ ސަބަބުން ސިކުނޑީގެ ހަރަކާތްތެރިކަމާއި އަދި މީހާގެ ހިތުގެ ހާލަތަށް ކުރާ އަސަރުތައް ދިރާސާކުރަމުންނެވެ.

ކްރިއޭޓިން އަކީ ވަރަށް ފުޅާ ދާއިރާ އެއްގައި ދިރާސާކޮށްފައިވާ ކެމިކަލްގެ ތެރޭގައި ހިމެނޭ ސަޕްލިމެންޓެކެވެ. އެއީ ކަސްރަތު ކުރުމުގަ އާއި ހަށިހެޔޮ ކަމުގެ ކުޅަދާނަކަން އިތުރުކުރުމާ ގުޅިފައިވާ އެއްޗެއްގެ ގޮތުގައި ވަރަށް ކުރިއްސުރެން ފެށިގެން ބެލެވިފައިވެ އެވެ. އަދި ހަށިގަނޑު ބިލްޑް ކުރާ މީހުން އާންމުކޮށް ކްރިއޭޓިން މޮނޯހައިޑްރޭޓްގެ ގޮތުގައި މިއީ ބޭނުންކުރާ އެއްޗެކެވެ. ނަމަވެސް މި މާއްދާ އަކީ ހަމައެކަނި ހަށިގަނޑު ބިލްޑް ކޮށް ވަރުގަދަ ކުރުމަށް ބޭނުންވާ މީހުންނަށް ޚާއްސަ އެއްޗެއް ނޫނެވެ.

ކްރިއޭޓިން އަކީ އިންސާނާގެ ހަށިގަނޑުގައި ހުންނަ މުހިންމު ކެމިކަލް މާއްދާއެކެވެ. މިއީ ފުރަމޭ، ގުރުދާ އަދި ޕެންކްރިއާސްގައި ގުދުރަތީގޮތުން އުފައްދައި، އަދި މަސްގަނޑާއި ސިކުނޑީގައި ރައްކާކުރެވޭ މާއްދާއެކެވެ. ހަށިގަނޑުން އުފައްދާ ކްރިއޭޓިން އާންމުކޮށް އަހަރެމެންނަށް ބޭނުންވާ މިންވަރަށް ނުފުދެ އެވެ. އެހެންކަމުން އިތުރަށް ބޭނުންވާ ކްރެއޭޓިން ހޯދުމަށް ނިއުޓްރިއެންޓްސް މުއްސަނދި ކާނާގެ ބާވަތްތަކަށް ބަރޯސާވާން ޖެހެ އެވެ.

ކްރިއޭޓިން އަކީ އަހަރެމެންގެ ސެލްތަކާއި ޓިޝޫތަކަށް ބޭނުންވާ ހަކަތަ ރަނގަޅަށް ބެލެހެއްޓުމަށް އެހީވެދޭ އެއްޗެކެވެ. އަދި ބައެއް މީހުންނަށް ކްރިއޭޓިން ސަޕްލިމެންޓް ބޭނުންކުރުމުން ފައިދާކުރާކަމުގެ ހެކިތައް ފެންނަމުންދެއެވެ.

ވައިރަސް ބަލިތަކަށްފަހު ދިމާވާ ވަރުބަލިކަން ކުޑަކުރުމުން ފެށިގެން، ސްޓްރެސް ގައި އުޅޭ މީހުންގެ ސިކުނޑީގެ ހަރަކާތްތެރިކަން ރަނގަޅުކުރުމާއި، ހަނދާން ބޫސްޓް ކުރުން ފަދަ ކަންކަމަށް، ކްރިއޭޓިން ސަޕްލިމެންޓްތަކުން ބައެއް މީހުންނަށް މުހިންމު ސިކުނޑީގެ ކުރިއެރުންތަކެއް ލިބިދާނެއެވެ. އަދި ކްރިއޭޓިން އަކީ އަލްޒައިމަރސް ބަލީގެ މީހުންގެ އަލާމާތްތައް ކުޑަކޮށްދީ، ހިތުގެ ހާލަތު ރަނގަޅުކޮށްދިނުމުގައި ވެސް އެހީތެރިވެދާނެ އެއްޗެއް ކަމަށް ލަފާކުރެވިފައިވެ އެވެ.

ވީމާ، ކްރިއޭޓިން ބޭނުންވާ މިންވަރަށް ލިބޭތޯ އެވެ؟ އަދި ސަޕްލިމެންޓް ބޭނުންކުރުމަށް ރަނގަޅީ ކޮން ވަގުތެއްގައިތޯ އެވެ؟

ކްރިއޭޓިން ދިރާސާތައް ފެށުން

ކްރިއޭޓިން ސަޕްލިމެންޓްގެ ފައިދާތައް ފުރަތަމަ ހޯދީ 1970 ގެ އަހަރުތަކުގައި ވެލްސްގެ އެބެރިސްޓްވިތް ޔުނިވަރސިޓީގެ ޕްރޮފެސަރ ރޮޖަރ ހެރިސް އެވެ. އޭގެފަހުން  ކުޅިވަރުގެ ދުނިޔޭގައި، އަދި ހަށިގަނޑުގެ ހަރަކާތްތައް ރަނގަޅުކުރުމާ ގުޅޭގޮތުން ގިނަ ދިރާސާތަކެއް ކުރެވިފައިވެ އެވެ.

ނަމަވެސް ފާއިތުވެދިޔަ ދެ ދިހަވަރަކަށް އަހަރުގެ ތެރޭގައި، ކްރިއޭޓިން ސަޕްލިމެންޓްގެ އެހެނިހެން ސިއްހީ ފައިދާތައް ދިރާސާތަކުން ދައްކަން ފަށާފައިވެ އެވެ. މި ދިރާސާތަކުގެ އެންމެ ބޮޑު އެއް ދާއިރާ އަކީ ސިކުނޑީގެ ހަރަކާތްތެރިކަމެވެ. އެއީ ކްރިއޭޓިން ސިކުނޑީގައި އައު ނިއުރޯންތައް އުފެއްދުމުގައި (ނިއޯޖެނެސިސް) މުހިންމު ދައުރެއް އަދާކުރާތީ އެވެ.

ކްރިއޭޓިންގެ އެހެނިހެން ސިއްހީ ފައިދާތައް ވެސް ދިރާސާތަކުން ދައްކަމުންދެ އެވެ. އެގޮތުން ބައެއް ޖަނަވާރުންގެ ދިރާސާތަކުން ކެންސަރު އާލާވުން ހުއްޓުވައިދީ، އަދި މެނޮޕޯޒްގެ އަލާމާތްތައް ރަނގަޅުކޮށްދޭކަން ފާހަގަކުރެވިފައިވެ އެވެ. މީގެ އެއް ސަބަބަކީ ކްރިއޭޓިންގައި ހަށިގަނޑަށް ދިމާވާ ސްޓްރެސްތަކުން ހިމާޔަތްކޮށްދޭ އެންޓިއޮކްސިޑެންޓް އަސަރެއް ހުރުންކަމަށް ވެދާނެ ކަމަށް ސައިންސްވެރިން ދެކެ އެވެ.

 25,000 މީހުން ބައިވެރިކޮށްގެން ހެދި ދިރާސާ އަކުން ދައްކާގޮތުން 52 އަހަރާއި އެއަށްވުރެ މަތީގެ މީހުންގެ ތެރެއިން، ކާނާ އިން އެންމެ ގިނައިން ކްރިއޭޓިން ލިބުނު މީހުންނަށް، ދެދުވަހުގެ މައްޗަށް ބޭނުންކުރި ކޮންމެ އިތުރު 0.09ގ ކްރިއޭޓިން ގެ ސަބަބުން ކެންސަރުގެ ނުރައްކާ 14% ކުޑަކުރެވުނެވެ.

ކްރިއޭޓިން އަކީ ނަފްސާނީ ސިއްހަތަށްވެސް ފައިދާހުރި އެއްޗެއް ކަމަށް ވެދާނެ އެވެ. އެއް ދިރާސާއެއް ގައި، މާޔޫސްކަމުގެ މައްސަލަތައް ހުރި މީހުންނަށް ކޮގްނިޓިވް ބިހޭވިއަރަލް ތެރަޕީ (ސީ.ބީ.ޓީ) އާ އެކު ކްރިއޭޓިން ޕައުޑަރު ދެވުނެވެ. ދިރާސާކުރި ފަރާތްތަކުން ހޯދި ގޮތުގައި، އަށް ހަފްތާގެ ތެރޭގައި، ކްރިއޭޓިން ނުލިބުނު ސީ.ބީ.ޓީ ހެދި މީހުންނަށް ވުރެ ކްރިއޭޓިން ލިބުނު މީހުންގެ ބަލީގެ އަލާމާތްތައް މާ ބޮޑަށް ފިލައިފާވެ އެވެ.

ކްރިއޭޓިން ބޭނުންކުރުމުގެ ނުރައްކާތައް

ބައެއް މީހުންނަށް ކްރިއޭޓިން ސަޕްލިމެންޓް ބޭނުންކުރުމުން ފައިދާކުރާނެ ކަމަށް ވިޔަސް، އޭގެ ސަބަބުން ބައެއް ގޯސް އަސަރުތައް ކުރިމަތިވެދާނެ އެވެ. އޭގެ ތެރޭގައި ހަށިގަނޑުގައި ފެން ގިނަވުން، މަސްތަކުގައި ރިއްސުން އަދި ހޮޑުލެވުން ހިމެނެ އެވެ. ކްރިއޭޓިން އަކީ ބައެއް މީހުންނަށް، ޚާއްސަކޮށް ގުރުދާ ނުވަތަ ފުރަމޭގެ މައްސަލަތައް ހުންނަ މީހުންނަށް ނުވަތަ ވަކި ބޭސްތަކެއް ބޭނުންކުރާ މީހުންނަށް އެކަށީގެންވާ އެއްޗެއް ނޫނެވެ. ކްރިއޭޓިން އަކީ އާންމުކޮށް ރައްކާތެރި އަދި ބަލައިގަނެވޭ އެއްޗެއްކަމަށް ބެލެވުނު ނަމަވެސް، ސަޕްލިމެންޓާ ގުޅިގެން ފުރަމޭ ފެއިލްވުން ފަދަ ވަރަށް މަދު ނުރައްކާތެރި ހާދިސާތައް ދިމާވެފައިވެ އެވެ.

އަހަރެމެންނަށް ކްރިއޭޓިން ބޭނުންވާ މިންވަރަށް ލިބޭތޯ؟

ހުޅަނގުގެ ގައުމުތަކަށް ބަލާއިރު އެ ގައުމު ތަކުގެ އާންމު ކާނާ ބޭނުންކުރާ ގިނަ އަންހެނުންނަށް ކްރިއޭޓިން ގިނަ އިން ހިމެނޭ ކާނާ ނުކެވޭކަމުގެ ހެކިތައް ފެންނަމުންދާކަމަށް ތަޖުރިބާކާރުން ވިދާޅުވެ އެވެ. ދިރާސާއަކުން ދައްކާގޮތުގައި، ދިހަ އަންހެނުންގެ ތެރެއިން ހަ އަންހެނުން، ދިރާސާކުރި ފަރާތްތަކުން ދުވާލަކު ބޭނުން ކުރުމަށް ލަފާދޭ ކްރިއޭޓިންގެ މިންވަރު (ހަށިގަނޑުގެ ބަރުދަނުގެ ކިލޯއަކަށް 13 މިލިގްރާމް) ބޭނުން ނުކުރެއެވެ. އަދި ބަނޑުބޮޑު އަންހެނުންގެ ތެރެއިން ގާތްގަނޑަކަށް ފަސްބައިކުޅަ އެއްބައި އަންހެނުންނަށް ކްރިއޭޓިން އެއްގޮތަކަށް ވެސް ލިބިފައި ނުވެއެވެ.

ފުރަތަމަ މަރުހަލާގެ ދިރާސާތަކުން ދެއްކި ގޮތުގައި ބޮޑެތި މީހުންނަށް ދުވާލަކު ގާތްގަނޑަކަށް 1ގ. ކްރިއޭޓިން ބޭނުންވެ އެވެ. އާބާދީގެ ދިރާސާތަކުން ލިބިފައިވާ މައުލޫމާތުތަކުން ދައްކާގޮތުގައި، ދުވާލަކު 1ގ. އަށް ވުރެ މަދުން ކްރިއޭޓިން ބޭނުންކުރާ މީހުންގެ ތެރޭގައި މާޔޫސްކަން، ހިތާއި ލޭހޮޅީގެ ބަލިތައް، އަދި ކެންސަރު ފަދަ ބަލިތައް ގިނަ އެވެ. ނަމަވެސް، ދުވާލަކު ކްރިއޭޓިން ބޭނުންކުރަންވީ މިންވަރާ ބެހޭގޮތުން ސިއްހީ އިރުޝާދެއް މިހާތަނަށް ރަސްމީ ސިފައެއް ގައި ދީފަ އެއް ނުވެ އެވެ.

ގިނަ މީހުންނަށް ކްރިއޭޓިން ކެއުމުގެ ޒަރީއާ އިން ލިބޭނެ ކަމަށް ތަޖުރިބާކާރުން ވިދާޅުވެ އެވެ. ނަމަވެސް މަސް ނުކައި ހަމައެކަނި ގަސްގަހާގެހީގެ ބައިތަކުގެ ޑައިޓް ބޭނުންކުރާ މީހުންނަށް ބޭނުންވާ މިންވަރަށް ނުލިބުމުގެ ނުރައްކާ އެބަހުއްޓެވެ.

ކްރިއޭޓިން އަކީ ހަށިގަނޑުގައި ގުދުރަތީގޮތުން އުފައްދާ މާއްދާއެއްކަމުން، އެއީ "އެސެންޝަލް" މާއްދާއެއްގެ ގޮތުގައި ބަޔާންކޮށްފައެއް ނުވެ އެވެ. އެސެންޝަލް ނިއުޓްރިއެންޓްސްތަކަކީ ހަށިގަނޑަށް އަމިއްލަ އަށް އުފެއްދޭނެ އެއްޗެއް ނޫންކަމުން، އެއީ ކެއުމުން ލިބެންޖެހޭ އެއްޗެކެވެ.

ނަމަވެސް، ބައެއް ދިރާސާކުރާ ފަރާތްތަކުން ވިދާޅުވަނީ، އަޅުގަނޑުމެންގެ ހަށިގަނޑަށް ބޭނުންވާ މިންވަރަށް އަމިއްލައަށް ކްރިއޭޓިން އުފެއްދޭކަމަށް ނުފެންނާތީ، ކްރިއޭޓިންއަކީ ސެމީ-އެސެންޝަލް މާއްދާއެއްގެ ގޮތުގައި ކަނޑައެޅުން މުހިންމުކަމަށެވެ.

ގިނަ ދިރާސާތަކެއްގެ މައިގަނޑު މައުޟޫއެއްގެ ގޮތުގައި ކްރިއޭޓިން ހިމެނޭ ކަމުގައި ވިޔަސް، އަދި ގިނަ ބަޔަކަށް ކާނާ އިން އެކަށީގެންވާ މިންވަރަށް އެ މާއްދާ ނުލިބޭ ކަމުގައި ވިޔަސް، ދިރިއުޅުމުގެ އެކި މަރުހަލާތަކުގައި ކްރިއޭޓިންގެ ސިއްހީ ފައިދާތަކާ ބެހޭ ދިރާސާތައް އަދިވެސް ވަނީ ވަރަށް އިބްތިދާއީ މަރުހަލާ އެއްގަ އެވެ.