ޓެކްނިކަލް މައްސަލަ އަކުން ކަަމަށް ބުނެ ޑީޖޭއޭ އިން ކުށުގެ ރެކޯޑް ސާފުކޮށް ނުދީ ހިފެހެއްޓުމުން ކެނޑިޑެސީ ފުރުސަތު ގެއްލިއްޖެ
ކ. ގުރައިދޫ ކައުންސިލް ރައީސް ކަމަށް އަމިއްލަ ގޮތުން ވާދަކުރާ އަބްދުލް މަޖީދު ކުށުގެ ރެކޯޑް ސާފުކުރުމަށް ހުށަހެޅުމުން ދިމާވި ޓެކްނިކަލް މައްސަލަ ހައްލު ނުވެގެން އުޅެނީ ޓެކްނިކަލް ޓީމް ރިސޯޓަކަށް ގޮސްފައިވާތީ ކަމަށް ވެސް ޑީޖޭއޭ އިން އޭނާ އަށް މައުލޫމާތު ދިން ފަރާތުން ބުނެފައި ވޭ.
ޑީޖޭއޭ
ޓެކްނިކަލް މައްސަލަ އަކުން ކަަމަށް ބުނެ ޑިޕާޓްމަންތް އޮފް ޖުޑީޝަލް އެޑްމިނިސްޓްރޭޝަން (ޑީޖޭއޭ) އިން ކުށުގެ ރެކޯޑް ސާފުކޮށް ނުދީ ހިފެހެއްޓުމުން، ކުރިއަށް އޮތް ލޯކަލް ކައުންސިލް އިންތިޚާބުގައި ވާދަކުރަން ނިންމާފައިވާ ކެނޑިޑޭޓަކަށް، ކެނޑިޑެސީ ފުރުސަތު ގެއްލިއްޖެ އެވެ.
މި މައްސަލަ ދިމާވެފައި ވަނީ ކ.ގުރައިދޫ ކައުންސިލް ރައީސް ކަމަށް އަމިއްލަ ގޮތުން ވާދަކުރާކަން އިއުލާންކޮށްފައިވާ އަބްދުލް މަޖީދު އަށެވެ. ރާއްޖެ އެމްވީ އަށް މައުލޫމާތު ދެމުން މަޖީދު ބުނީ އޭނާ ކުށުގެ ރެކޯޑް ސާފުކުރުމަށް ހުށަހެޅީ މީގެ ދެ ތިން ދުވަސް ކުރިން ކަމަށެވެ. އަދި އާދިއްތަ ދުވަހު ހެނދުނު 9 ޖެހި އިރު 193 ކޯޓުގެ ތެރެއިން، 192 ކޯޓުން އޭނާގެ ކުށުގެ ރެކޯޑް ސާފު ކުރެވިފައިވާކަން އެނގުނު ކަމަށް އޭނާ ވަނީ ބުނެފަ އެވެ. އޭނާ އާއި އެކު ކުށުގެ ރެކޯޑް ސާފު ކުރަން ހުށަހެޅި ބައެއް ކެނޑިޑޭޓުން އޭނާ އާއި އެއް ދުވަހެއްގައި ކުށުގެ ރެކޯޑު ސާފުކުރަން ހުށަހެޅި ނަމަވެސް އެ ކެނޑިޑޭޓުންނަށް މައްސަލަ އެއް ދިމާވެފަ އެއް ނުވެ އެވެ.
އާދިއްތަ ދުވަހަކީ ކެނޑިޑެސީ ފޯމު ހުށަހެޅުމަށް ދިން ސުންގަޑި ހަމަވާ ދުވަހަށް ވުމާއި އެކު އެ މަރުހަލާ ފުރިހަމަ ކުރުމަށް އެކި ގޮތް ގޮތުން ވަރަށް މަސައްކަތް ކޮށްފައިވާނެ ކަން އޭނާ ވަނީ ފާހަގަކޮށްފަ އެވެ. އެގޮތުން ބެލި ބެލުމުން ކުށުގެ ރެކޯޑް ސާފު ނުވަނީ ވ. ތިނަދޫ ކޯޓުން ކަން އެނގުނެވެ. އެ ކޯޓާއި ގުޅައިގެން ސުވާލުކުރުމުން އެންމެ ފުރަތަމަ ބުނީ އެންމެ މީހަކު އެ މަސައްކަތް ކުރަން ހުރެފައި، އޭނާ ސިކް ލީވްގައި ހުރުމުން ކުށުގެ ރެކޯޑް ސާފު ނުވަނީ ކަމަށެވެ. ނަމަވެސް ފަހުން ޓެކްނިކަލް މައްސަލަ އެއްގެ ސަބަބުން އެ މަރުހަލާ ފުރިހަމަ ނުވަނީ ކަމަށް އެ ކޯޓުން ވަނީ ބުނެފަ އެވެ.
ރާއްޖެއެމްވީ އަށް މައުލޫމާތު ދެމުން މަޖީދު ބުނީ އޭނާ ދެން މަސައްކަތް ކުރީ ވ. ފުލިދޫ އިން އެ މަރުހަލާ ފުރިހަމަ ކުރެވޭތޯ ކަމަށެވެ.
"އެންމެ ފުރަތަމަ ބުނި ކުރެވޭނެ އޭ. ތިނަދޫގެ އެގޮތަށް ހުންނަ އެއްޗެހި ސާފުކޮށް ދެވޭނެ އޭ. އެ އޮތޯރިޓީ އޮވެއޭ. ތިނަދޫ އިން ކުރިން ބަލާފަ އެއް ފަހަރު ދިން އޭގެ ކުރިން ލިސްޓުގައި އެ ނަމެއް ނެތޭ ކިޔާފަ ވެސް ޖަވާބު. އެކި ފަހަރު އެކި ގޮތަށް. ދެން ފުލިދޫ އިން ކުރެވޭނެ އޭ ބުނީމަ ބަލާފަ ބުނި މާލޭ ކޮޅުން ހިފަހައްޓާފަ އޭ ވީ." އޭނާ ބުނެފައި ވެ އެވެ.
އެހާ ހިސާބުން ޑީޖޭއޭ އަށް ގޮސްގެން އޭނާ ގެ ޓީމުން ކުރި މަސައްކަތުން ވެސް ވާނުވާ ސާފެއް ނުވި އެވެ. ހެނދުނުން ފެށިގެން 5:30 އާ ހަމަ އަށް ކުރި މަސައްކަތުން ވެސް މަޖީދު އަށް އެކަށީގެންވާ ޖަވާބެއް ނުލިބުނެވެ. 11 ޖަހާ އެހާކަށް ހާއިރު ދިން ޖަވާބަކީ ފޯމުގައި ޓެކްނިކަލް މައްސަލަ އެއް ހުރި ކަމަށެވެ. އެފަދަ 12 ފޯމެއްގެ މައްސަލަ ދިމާވި ކަމަށް ޑީޖޭއޭ އިން ވަނީ އަންގާފަ އެވެ.
"ޖުޑީޝަރީ އިން ބުނީ މައްސަލަ ހައްލުވާނޭ 12 ޖަހާ އިރަށް ރިކުއެސްޓް ކޮށްފީމޭ އައިޓީ ޓީމަށް." އޭނާ މި ނޫހަށް ކިޔާދިނެވެ.
މަޖީދު އިތުރަށް ބުނި ގޮތުގައި ޓެކްނިކަލް މައްސަލަ ހައްލު ނުވެގެން އުޅެނީ ޓެކްނިކަލް ޓީމް ވޯކްޝޮޕަކަށް ރިސޯޓަކަށް ގޮސްފައިވާތީ ކަމަށް ވެސް ޑީޖޭއޭ އިން މައުލޫމާތު ދިން ފަރާތުން ބުނެފައި ވެ އެވެ. ޓެކްނިކަލް މައްސަލަ އަކުން ފޯމު ނުލެވޭކަން އެނގުމުން އެކަމާއި ގުޅުން ހުރި ލިޔުމެއް ދިނުމަށް އެދުމުން ޗީފް ޖުޑީޝަލް އެޑްމިނިސްޓްރޭޓަރ ވަކި އެއްޗެއް ނާންގާތީ އެކަން ވެސް ކޮށްދީފަ އެއް ނުވެ އެވެ.
އެހެންކަމުން ފޯމު ހުށަހަޅަން ދިން މުއްދަތު ހަމަވި އިރު ފޯމު ހުށަހެޅޭ ގޮތެއް ނުވި އެވެ. މަޖީދު ވަނީ އޭނާ ގެ ކެނޑިޑޭސީގެ މައްސަލަ ކަމާއި ގުޅުން ހުރި ފަރާތްތަކަށް ހުށަހަޅައިގެން ކުރިއަށް ގެންދާނެ ކަމަށް ބުނެފަ އެވެ. މިފަދަ މައްސަލަ އެއް ދިމާވެފައި މި ވަނީ ކުށުގެ ރެކޯޑް ސާފުކޮށް ނުދީ ލަސްކުރުމަށް ޑީޖޭއޭ މެދުވެރިކޮށް ސަރުކާރާއި ދެކޮޅަށް ވާދަކުރާ ކެނޑިޑޭޓުންނަށް ޓަރގެޓް ކޮށްގެން މަސައްކަތްތަކެއް ކުރާ ކަމަށް އާއްމުންނާއި އިދިކޮޅު ފަރާތްތަކުން ތުހުމަތުކުރަމުންދާ ދަނޑިވަޅެއްގަ އެވެ.
ފޯމު ހުށަހެޅުމުގެ މުޅި މަރުހަލާ އޮންލައިންކޮށް އެކަނި ކުރިއަށް ގެންދެވޭ ގޮތަށް ހަމަޖެއްސުމަކީ ވެސް އާއްމުން ސުވާލު އުފައްދާ ކަމެކެވެ.
