ސަރުކާރަށް ކައުންސިލް އިންތިޚާބުގެ މެޖޯރިޓީ ލިބިއްޖެނަމަ ކައުންސިލްތަކުގެ ހުރިހާ ވިޔަފާރިއެއް ހުއްޓުވާނެ: ޔައުގޫބް

އިގްތިސާދީ ގޮތުން ބާރުވެރި ނުވާހާ ހިނދެއްގައި ރައްޔިތުން ބާރުވެރިނުވާނެ ކަމަށާއި، ސަރުކާރަށް ލޯކަލް ކައުންސިލް އިންތިޚާބުގެ މެޖޯރިޓީ ލިބިއްޖެނަމަ ކައުންސިލްތަކުގެ ހުރިހާ ވިޔަފާރިއެއް ހުއްޓުވާނެ ކަމަށް ރައްޔިތުން މަޖިލީހުގެ ދާންދޫ ދާއިރާގެ ކުރީގެ މެންބަރު ޔައުގޫބް އަބްދުﷲ ވިދާޅުވެއްޖެ އެވެ.

ރާއްޖެޓީވީގެ ޓީވީޓޯކް ޕްރޮގްރާމްގައި ޔައުގޫބް ވިދާޅުވީ ރާއްޖޭގައި ފުރަތަމަ ވެސް ރައްޔިތުން ބާރުވެރި ކުރުވުމުގެ މަސައްކަތް ފެށީ އެމްޑީޕީގެ ސަރުކާރުން ކަމަށާއި، އެގޮތުން ކައުންސިލްތަކަށް ބާރުވެރިކަން ދިން ކަމަށެވެ. އަދި އިގްތިސާދީ އެކިއެކި ހަރަކާތްތައް ހިންގޭނެ ފުރުސަތު ރަށްރަށުގައި ފަހިކޮށްދިން ކަމަށެވެ. 

މާފުށީގެ ފަތުރުވެރިކަމަށް އިޝާރާތް ކުރައްވައި ޔައުގޫބް ވިދާޅުވީ އެއީ ޕައިލެޓް ޕޮޖެކްޓެއް ކަމަށާއި، ވަރަށް ކާމިޔާބު ކަމާއެކު އަތޮޅުތެރޭގެ ރަށްރަށުގައި ފަތުރުވެރިކަން ކުރިއަރަމުންދާ ކަމަށެވެ. ޔައުގޫބް ވިދާޅުވީ މިއަދު ދައުލަތުގެ ބަޖެޓަށް ބަރޯސާނުވާ ރަށްރަށް އެބަހުރި ކަމަށާއި، ބަޖެޓުގައި ކަނޑައަޅާ އަދަދަށް ވުރެ ބޮޑު އާމްދަނީއެއް ކައުންސިލްތަކަށް ލިބޭ ރަށްތައް އެބަހުރި ކަމަށެވެ.

މީގެ އިތުރުން ޔައުގޫބު ވިދާޅުވީ މިގޮތަށް ރައްޔިތު މީހާ ބާރުވެރިވުމުން ސަރުކާރުން ބޭނުންހާ ގޮތަކަށް ރައްޔިތުން ބޯނުލަބާ ކަމަށާއި، އެހެންކަމުން މަސައްކަތް ކުރަނީ އިގްތިސާދީ ގޮތުން ރައްޔިތުން ނިކަމެތި ކޮށްލުމަށް ކަމަށެވެ.

އެވްރެޖްކޮށް މީގެ ރަށަކަށް ދައުލަތުގެ ބަޖެޓުން އަހަރަކަށް ހަރަދު ކުރަން މިދެނީ 7 މިލިއަން ރުފިޔާ. މީގެން ރަށްތަކަށް އެމީހުން އެ ކުރާ ވިޔަފާރީގައި، ރަށު ތެރޭގައި މި ކުރާ ވިޔަފަރީގައި އެކިއެކި ފީތަކާއި އެކިއެކި ކަންކަމުގެ ތެރެއިން އެ ކައުންސިލްތަކަށް އެބަ ލިބޭ 7 މިލިއަނަށްވުރެ މާގިނައިން. އެތައް މިލިއަނެއް ޓެކްސްގެ ގޮތުގައި ދައްކާ. އޭގެ އިތުރުން ކައުންސިލަށް އެބަ ލިބޭ އާމްދަނީ. ދެން މިވާގޮތަކީ މިރަށްރަށުގެ އާމްދަނީ އިތުރުވެގެން ވިޔަފާރިތައް ރަނގަޅުވެގެން ވަޒީފާތައް އިތުރުވެގެން ދިޔާއީމަ ރައްޔިތު މީހާ ބާރުގަދަވަނީ. ނޫނީ ބާރުވެރިވަނީ. ބާރުވެރިވީމަ ސަރުކާރުން ބުނާހާ އެއްޗެއް ބޭނުން ގޮތަކަށް ބުނާ ކޮންމެ ކަމެއް ކުރާކަށް ރައްޔިތު މީހާ ނޫޅޭނެ. ނެތީމަ އެއްކަލަ ސަރުކާރުން ބޭނުންވާ ސަކަރާތެއް ނުޖެހޭ. އެހެންވީމަ ރައީސް މުއިއްޒުގެ ބޭނުމަކީ  ރައްޔިތުން ނިކަމެތި ކޮށްލުން.ނިކަމެތި ކޮށްފައި ނިކަމެތި ކަންމަތީގައި ބަހައްޓާފައި ދެން އިންތިޚާބަކަށް ގޮސް މީހުންނަށް މަޖުބޫރުކޮށްގެން މަޖުބޫރީ ހާލަތެއްގައި ބައިތިއްބައިގެން ވޯޓު ހޯދައިގެން އިންތިޚާބު ކާމިޔާބު ކުރުން. އެއީ މައިގަނޑު ސިޔާސަތަކީ.

ރައްޔިތުން މަޖިލީހުގެ ދާންދޫ ދާއިރާގެ ކުރީގެ މެންބަރު ޔައުގޫބް އަބްދުﷲ

ޔައުގޫބް ވިދާޅުވީ މި ސަރުކާރަށް ކުރިއަށް އޮތް ލޯކަލް ކައުންސިލް އިންތިޚާބުގެ މެޖޯރިޓީ ލިބިއްޖެނަމަ،  އެއްވެސް ރަށެއްގައި ކައުންސިލްތަކަށް ވިޔަފާރި ކުރުމުގެ ފުރުސަތު ނުލިބޭ ކަމަށެވެ.

މި ސަރުކާރުން އަތޮޅު ކައުންސިލްތައް އުވާލާފައިވާއިރު، ކުރިއަށް އޮތްތަނުގައި ކައުންސިލްތަކުގެ ބާރު ހަނިކޮށް، މިހާރު ދޭ ބަޖެޓު ވެސް ދިނުން އެއްކޮށް ހުއްޓާލާނެ ކަަމަށް އޭނާ ވިދާޅުވި އެވެ.