ފައިސާއާއި ނުފޫޒުން ވެސް ކައުންސިލް އިންތިޚާބުގެ މެޖޯރިޓީ ޕީއެންސީ އަށް ނުލިބޭނެ: ނިޔާޒު

ފައިސާ އާއި ނުފޫޒުން ވެސް ކުރިއަށް އޮތް ލޯކަލް ކައުންސިލް އިންތިޚާބުގެ މެޖޯރިޓީ، ސަރުކާރު ހިންގާ ޕާޓީ ޕީއެންސީ އަށް ނުލިބޭނެ ކަމަށް ރައްޔިތުންގެ މަޖިލީހުގެ ހުޅުމާލޭ ދާއިރާގެ ކުރީގެ މެންބަރު އަލީ ނިޔާޒު ވިދާޅުވެއްޖެ އެވެ.

ރާއްޖެޓީވީގެ ޓީވީޓޯކް ޕްރޮގްރާމްގައި ނިޔާޒު ވިދާޅުވީ، ސަރުކާރުގެ އަތުގައި ބާރާއި ނުފޫޒު އެބައޮތް ކަމަށާއި، މުއައްސަސާތަކުގައި ތިއްބެވީ ސަރުކާރުގެ ބޭފުޅުން ކަމަށެވެ. ނަމަވެސް ކުރިއަށް އޮތް އިންތިޚާބުގައި ބާރާއި ނުފޫޒު ދައްކައި، ފައިސާ އިން ވެސް އިންތިޚާބުގެ މެޖޯރިޓީ ޕީއެންސީ އަށް ނުލިބޭނެ ކަމަށެވެ. އެކަން ރާއްޖޭގެ ތާރީހުން ފެންނަން އޮބައޮތް ކަމަށް އޭނާ ވިދާޅުވި އެވެ. 

ނިޔާޒު ވިދާޅުވީ މުޅި ރާއްޖޭގެ ތަރައްގީގެ މަޝްރޫއުތައް ހުއްޓުވާފައިވާ ކަމަށާއި، ލާމަރުކަޒީ ނިޒާމުގެ ބާރު ހަނިކޮށް މަރުކަޒު ކުރުމަށް ސަރުކާރުން ކުރަމުންދާ މަސައްކަތް ރައްޔިތުންނަށް އެނގޭ ކަމަށެވެ. 

ރައްޔިތުން މަޖިލީހުގެ މެޖޯރިޓީ ވެސް ފައިސާ އާއި ނުފޫޒުން ޕީއެންސީން ހޯދާފައިވާ ކަމަށް ބައެއް މީހުން ތުހުމަތުކޮށް ވާހަކަތައް ދައްކަމުންދާތީ، އެކަމަށް އިޝާރާތް ކުރައްވައި ނިޔާޒު ވިދާޅުވީ، އެއީ އެންމެ ރަނގަޅު މިސާލު ނޫން ކަމަށެވެ. މަޖިލިސް އިންތިޚާބާ ހިލާފަށް ކައުންސިލް އިންތިޚާބަކީ މިޑްޓާމް އިންތިޚާބެއް ކަމަށާއި، ސަރުކާރު ހިންގާ ގޮތާއި، ރައީސް މުއިއްޒު ވެވަޑައިގަންނަވާ ވައުދުތައް ފުއްދުމުގެ އިހްލާސްތެރިކަން ހުރި މިންވަރު ވަޒަން ކުރެވޭނެ ކަމަށް އޭނާ ވިދާޅުވި އެވެ. 

ފުރަތަމަ ކަމަކަށް ތީގެ މިސާލެއްގެ ގޮތުގައި ތިބޭފުޅުން ވިދާޅުވެދާނެ ރައްޔިތުންގެ މަޖިލިސް ވެސް ހަމަ އެހެނޭ ކަންތައްވީ. ރައްޔިތުން މަޖިލިސް އިންތިޚާބު މިއަންނަނީ ވެރިކަން ލިބުމަށްފަހު ގާތްގަނޑަކަށް ހައެއްކަ މަސް ދުވަހުގެ ތެރޭގައި. އެހެންވީމަ ވަރަށް ބޮޑެތި ވައުދުތަކެއް ސަރުކާރުން ވެގެން މިއަންނަނީ ތިމަންނާމެން ރައްޔިތުންނަށްޓަކައި އަނެއްކާ ވެސް ކުރިން ހިންގި ވަރަށް ވުރެ ރަނގަޅަށް ހިންގަން. އެހެންވީމަ 6 މަސް ދުވަހަކީ ރައްޔިތުންނަށް އެކަން ޖަޖް ކުރަން ނޭނގޭނެ. އެހެންވީމަ އެއީ ރަނގަޅު މިސާލަކަށް ނުވެދާނެ. 

އަލީ ނިޔާޒު

ކައުންސިލްތަކުން ސަރުކާރަށް ޖެއްސުން ކުރާ ކަމަށް ދެކެވޭ ވާހަކަތަކަށް ރައްދު ދެއްވަމުން ނިޔާޒު ވިދާޅުވީ އެއީ އިންތިޚާބާ ދިމާކޮށް ވޯޓު ހޯދުމަށް މިސަރުކާރުގެ ބޭފުޅުން ދައްކަމުންދާ ދޮގު ވާހަކަތަކެއް ކަމަށެވެ.

ކައުންސިލްތައް ގޯސް ނަމަ، ރާއްޖޭގެ ފަސް ސިޓީއަށް ރައީސް މުއިއްޒު ވަޑައިގަންނަވާ ރައްޔިތުންނާ ބައްދަލު ނުކުރެއްވޭނެ ކަަމަށް އޭނާ ވިދާޅުވި އެވެ. އަދި ވިދާޅުވީ ހުރިހާ ސިޓީއެއްގައި ތިއްބެވީ އެމްޑީޕީގެ މޭޔަރުން ކަމަށާއި، ސަރުކާރަށް ފުރިހަމައަށް އެއްބާރުލުން ދެއްވާ ކަމަށެވެ.

ނިޔާޒު ވިދާޅުވީ ކައުންސިލްތަކުން މަސައްކަތް ކުރާ ކަމަށާއި، ރައްޔިތުންގެ މަޝްވަރާއާއެކު، ރަށުގެ ކުރިއެރުމަށް މަޝްރޫއުތައް ކުރިއަށް ގެންގޮސްފައިވާ ކަމަށެވެ. 

އެގޮތުން ބައެއް ރަށްރަށުގައި ޕާކުތަކާއި، ބީޗްތައް ތަރައްގީ ކޮށްފައިވާ ކަމަށް އޭނާ ވިދާޅުވި އެވެ.

މީގެ އިތުރުން ނިޔާޒު ވިދާޅުވީ ރައީސް މުއިއްޒާއި، މިސަރުކާރުގެ ބޭފުޅުން ލާމަރުކަޒީ ނިޒާމު ގަބޫލު ނުކުރާ ކަމަށެވެ. ނަމަވެސް އަދިވެސް ރާއްޖޭގެ ގިނަ ރައްޔިތުން ތާއީދު ކުރަނީ މި ނިޒާމަށް ކަމަށާއި، އެކަން އެންމެފަހުން ގައުމީ ޔުނިވަރސިޓީ (އެމްއެންޔޫ) އިން ހެދި ދިރާސާއިން ވެސް ހާމަވެފައިވާ ކަމަށެވެ.

އެހެންކަމުން މި ނިޒާމާ އެކު، ރާއްޖެ ކުރިއަށް ގެންދިއުމަށް ކުރިއަށް އޮތް ލޯކަލް ކައުންސިލް އިންތިޚާބުގައި މި ނިޒާމު ދަންނަ މި ނިޒާމު ހިންގަން އެނގޭ އެމްޑީޕީގެ ކެންޑީޑޭޓުންނަށް ވޯޓު ދިނުމަށް ނިޔާޒު ގޮވާލެއްވި އެވެ.