އެމްޑީޕީއާ އިދިކޮޅު ފިކުރުގެ ސިޔާސީ ބޭފުޅުންނަކީ އަބަދުވެސް ޖެއްސުން ކުރުމުގެ ސަގާފަތެއް ގެންގުޅޭ ބައެއް: މެންބަރު އަމީން
މެންބަރު އަމީން ވިދާޅުވީ ރައީސް ނަޝީދުގެ ވެރިކަމުގައި އޭރު މަޖިލީހުގެ މެޖޯރިޓީ ޑީއާރްޕީ އަށް ލިބުމުން ސަރުކާރަށް ވަރަށް ބޮޑަށް ޖެއްސުންކޮށް މަސައްކަތްތަކަށް ހުރަސް އަޅާފައިވާ ކަމަށް. ރައްޔިތުންނާ ގަައުމުގެ މަސްލަހަތަށް ބެލުމެއް ނެތި، ސަރުކާރުން ގެންނަ ހުރިހާ ކަމަކަށް ނޫނެކޭ ބުނެ، ޖެއްސުން ކުރި ކަމަށް މެންބަރު އަމީން ވިދާޅުވި. އަދި މިއަދު ވެރިކަމުގައި ތިއްބެވީ ވެސް އެބޭފުޅުންކަން ފާހަގަކުރެއްވި.
ރާއްޖެޓީވީގެ ޓީވީޓޯކް ޕްރޮގްރާމްގައި ރައްޔިތުންގެ މަޖިލީހުގެ ކަނޑިތީމު ދާއިރާގެ މެންބަރު އަމީން ފައިސަލް ވާހަކަ ދައްކަވަނީ | ރާއްޖެއެމްވީ
މޯލްޑިވިއަން ޑިމޮކްރެޓިކް ޕާޓީ (އެމްޑީޕީ)އާ އިދިކޮޅު ފިކުރުގެ ސިޔާސީ ބޭފުޅުންނަކީ އަބަދުވެސް ޖެއްސުން ކުރުމުގެ ސަގާފަތެއް ގެންގުޅޭ ބައެއް ކަމަށް ރައްޔިތުންގެ މަޖިލީހުގެ ކަނޑިތީމު ދާއިރާގެ މެންބަރު އަމީން ފައިސަލް ވިދާޅުވެއްޖެ އެވެ.
ރާއްޖެޓީވީގެ ޓީވީޓޯކް ޕްރޮގްރާމްގައި މެންބަރު އަމީން ވިދާޅުވީ، 2008 ވަނަ އަހަރުގެ ތެރޭގައި ކުރީގެ ރައީސް މުހައްމަދު ނަޝީދުގެ ވެރިކަމުގައި އޭރުގެ ރައްޔިތުންގެ މަޖިލީހުގެ މެޖޯރިޓީ ޑީއާރްޕީ އަށް ލިބުމުން އެ މަންޒަރު ވަރަށް ބޮޑަށް ފެނިގެން ދިޔަ ކަމަށެވެ. އޭރުގެ މަޖިލީހުގެ ތެރެއިން ސަރުކާރަށް ވަރަށް ބޮޑަށް ޖެއްސުންކޮށް މަސައްކަތްތަކަށް ހުރަސް އަޅާފައިވާ ކަމަށް އޭނާ ވިދާޅުވި އެވެ.
ރައްޔިތުންނާ ގަައުމުގެ މަސްލަހަތަށް ބެލުމެއް ނެތި، ސަރުކާރުން ގެންނަ ހުރިހާ ކަމަކަށް ނޫނެކޭ ބުނެ، ޖެއްސުން ކުރުމުގެ ސަގާފަތެއް އިޔާދަ ކުރި ކަމަށް މެންބަރު އަމީން ވިދާޅުވި އެވެ. އަދި ވިދާޅުވީ މިހާރު ވެސް އެމްޑީޕީގެ ފިކުރާ އިދިކޮޅު ސިޔާސީ ބޭފުޅުންނަކީ އެ ފިކުރުގައި މަސައްކަތް ކުރާ ބޭފުޅުން ކަމަށެވެ.
މިހާރު ވެރިކަމުގައި ތިއްބެވީ ޖެއްސުން ކުރުމުގެ ސަގާފަތް ގެންގުޅޭ ބޭފުޅުންކަން ފާހަގަކުރައްވައި މެންބަރު އަމީން ވިދާޅުވީ ކުރިއަށް އޮތް ލޯކަލް ކައުންސިލް އިންތިޚާބުގެ މެޖޯރިޓީ ސަރުކާރަށް ނުލިބިއްޖެނަމަ މަޝްރޫއުތައް ހުއްޓޭނެ ކަމަށް މިހާރު ވިދާޅުވަނީ ރައްޔިތުންނަށް އަދިވެސް އޮޅުވާލުމުގެ މަގުސަދުގައި ކަމަށެވެ. އަދި އެމްޑީޕީގެ ކައުންސިލަރުންނަކީ ރަށްރަށުގެ ތަރައްގީއަށް ހުރަސްއަޅައި، ސަރުކާރުގެ މަސައްކަތްތަކަށް ޖެއްސުން ކުރާނެ ބައެއް ނޫން ކަމަށް އޭނާ ވިދާޅުވި އެވެ.
މީގެ އިތުރުން މެންބަރު އަމީން ވިދާޅުވީ އެމްޑީޕީގެ ކައުންސިލަރުންނާ ގުޅޭގޮތުން މިސަރުކާރުން ދައްކަމުން ދަނީ ހޮޅި ވާހަކަ ކަމަށާއި، ބޭނުންވަނީ ރައްޔިތުންގެ ބާރުވެރިކަން ކަނޑުވާލުން ކަމަށެވެ.
ދެން އަނެއްކާ ކައުންސިލް އިންތިޚާބު ބޯމަތިވީމަ މި ބުނަނީ އަދި ކަމަކު ނުދޭ. ހުއްޓިފައި ހުރި ޕްރޮޖެކްޓްތަކާ ތިމަންމަނިކުފާނު ކުރިއަށް ގެންދަން ވައުދުވެފައި ހުރި ޕްރޮޖެކްޓްތަކާ މިކަންކަން ކުރެވޭނީ އަދި ކައުންސިލް ވެސް ލިބިގެންނޭ. ވެރިކަން ލިބިފައި، މަޖިލިސް ލިބިފައި ނުކުރެވުނު ކަމެއް ދެން ވަކި ކައުންސިލް ލިބިގެން ކިހިނެތްތޯ އޭ ކުރާނީ މިބޭފުޅުން މިވީ ދުވަސްތަކުގެ ތެރޭގައި ކައުންސިލަކުން ރާއްޖޭގެ ކޮން ކައުންސިލަކުން ކޮންކަމެއްތޯ އޭ މިބޭފުޅުން ބުނެގެން ނުކޮށް ދިނީ. ނުކޮށްދީފާނެ ކަމަށް ގާނޫނު ވެސް ބަދަލު ކުރީ ބިން ދިނަސް ނުދިނަސް އެލްޖީއޭއަށް ބާރު އޮންނާނޭ މިހާރު ބިން ދިނަސް ނުދިނަސް ސަރުކާރުން ބޭނުން ވެއްޖެއްޔާ އެރަށުގެ ބިން ބޭނުން ސައިޒަކަށް ނަގައިގެން ސަރުކާރުން ބޭނުންވާ ޕްރޮޖެކްޓް ހިންގުމުގެ ބާރު އެއޮތީ ގާނޫނުން ދީފައި. މިބޭފުޅުން އެބަދަލު ގެނައީ ވެސް.ރައްޔިތުންގެ މަޖިލީހުގެ ކަނޑިތީމު ދާއިރާގެ މެންބަރު އަމީން ފައިސަލް
މެންބަރު އަމީން ވިދާޅުވީ ކައުންސިލް އިންތިޚާބުގެ މެޖޯރިޓީ ސަރުކާރަށް ލިބިއްޖެނަމަ ރަސްގެފާނު ވިދާޅުވާ ގޮތަކަށް ކަންކަން ކުރާ އުސޫލަށް ހުރިހާ ކަމެއް އިޔާދަވާނެ ކަމަށެވެ.
އެހެންކަމުން މިފަހަރުގެ ކައުންސިލް އިންތިޚާބުގައި ސަރުކާރަށް ނޫނެކޭ ބުނުމަށް އޭނާ ގޮވާލެއްވި އެވެ.
