ކައުންސިލް އިންތިޚާބަށް ކުރިމަތިލުމުގެ މުއްދަތު ހަމަވިއިރު ޝަރުތު ހަމަވީ 2،993 ކެންޑިޑޭޓުން
ލޯކަލް ކައުންސިލްތަކާއި ޑަބްލިއުޑީސީގެ އިންތިޚާބަށް ކުރިމަތިލުމުގެ ފުރުސަތު މިދިޔަ މަހުގެ 17 ވަނަ ދުވަހު ހުޅުވާލިއިރު، އެ މުއްދަތު ހަމަވީ އާދިއްތަ ދުވަހުގެ ހަވީރު. ޝަރުތު ހަމަވާ 2،993 ކެންޑިޑޭޓުން ފޯމް ހުށަހަޅާފައިވާއިރު، 294،937 މީހުންނަށް ވޯޓުލުމުގެ ހައްގު ލިބިގެންވޭ. އިންތިޚާބުގައި 629 ކައުންސިލަރުން އިންތިޚާބު ކުރުމަށް ހަމަޖެހިފައިވާއިރު، ވޯޓު ނެގުން އޮންނާނީ އަންނަ އެޕްރީލް 4 ވަނަ ދުވަހު.
ލޯކަލް ކައުންސިލްތަކުގެ އިންތިޚާބާއި އަންހެނުންގެ ތަރައްޤީއަށް މަސައްކަތްކުރާ ކޮމިޓީގެ އިންތިޚާބު 2026ގައި ހަރަކާތްތެރިވާ އޮފިޝަލުންގެ ތަމްރީން ޕްރޮގްރާމްގެ ތެރެއިން. | އިލެކްޝަންސް ކޮމިޝަން
ސިޓީ ކައުންސިލްތަކާއި ރަށު ކައުންސިލްތައް އަދި އަންހެނުންގެ ތަރައްގީއަށް މަސައްކަތްކުރާ ކޮމިޓީ (ޑަބްލިއުޑީސީ) ގެ އިންތިޚާބަށް ކުރިމަތިލުމަށް ހުޅުވާލި ފުރުސަތުގައި ޝަރުތު ހަމަވީ 2،993 ކެންޑިޑޭޓުން ކަމަށް އިލެކްޝަންސް ކޮމިޝަނުން ބުނެފި އެވެ.
މި އިންތިޚާބަށް ކުރިމަތިލުމުގެ ފުރުސަތު މިދިޔަ މަހުގެ 17 ވަނަ ދުވަހު ހުޅުވާލިއިރު، އެ މުއްދަތު ހަމަވީ އާދިއްތަ ދުވަހުގެ ހަވީރު އެވެ.
އީސީ އިން އާންމުކުރި ތަފާސްހިސާބުތަކުން ދައްކާގޮތުން ލޯކަލް ކައުންސިލްތަކުގެ އެކި މަގާމުތަކަށް ޖުމްލަ 1,936 ފޯމު ހުށަހަޅާފައިވެ އެވެ. އޭގެ ތެރެއިން ކޮމިޝަނުން ބަލައިގަނެފައި ވަނީ 1,610 ފޯމެވެ. ޑަބްލިއުޑީސީ އަށް ވާދަކުރުމަށް 1,611 ފޯމު ހުށަހެޅިއިރު، އޭގެ ތެރެއިން ސައްހަ ކަމަށް ބަލައިގަނެފައިވަނީ 1,383 ފޯމު ކަމަށް އެ ކޮމިޝަނުން ބުނެފައިވެ އެވެ.
މި އިންތިޚާބު ގައި ވޯޓުލުމުގެ ހައްގު ލިބިގެންވާ މީހުންގެ ލިސްޓު މިދިޔަ މަހުގެ 8 ވަނަ ދުވަހު އާންމު ކޮށްފައިވާއިރު އެ ލިސްޓުގައިވާ ގޮތުން ޖުމްލަ 294,937 މީހުންނަށް ވޯޓުލުމުގެ ހައްގު ލިބިގެންވެ އެވެ. އެއީ 150,410 ފިރިހެނުންނާއި 144,527 އަންހެނުންނެވެ.
މިފަހަރުގެ އިންތިޚާބު ގައި ރަށު ކައުންސިލްތަކާއި ސިޓީ ކައުންސިލްތައް ހިމެނޭ ގޮތަށް ޖުމްލަ 629 ކައުންސިލަރުން އިންތިޚާބު ކުރުމަށް ވަނީ ހަމަޖެހިފަ އެވެ.
ލޯކަލް ކައުންސިލްތަކުގެ އިންތިޚާބު ގައި ސިޓީ ކައުންސިލްތަކުގެ މޭޔަރުންނާއި ސިޓީ ކައުންސިލްގެ މެންބަރުންނާއި ސިޓީ ކައުންސިލްގެ އަންހެން މެންބަރުން ހޮވާނެ އެވެ. އަދި ރަށު ކައުންސިލްތަކުގެ ރައީސުންނާއި ރަށު ކައުންސިލްތަކުގެ މެންބަރުންގެ އިތުރުން ރަށު ކައުންސިލްތަކުގެ އަންހެން މެންބަރު ވެސް އިންތިޚާބު ކުރާނެ އެވެ.
މީގެ އިތުރުން ޑަބްލިއުޑީސީގެ އިންތިޚާބު ގައި ރަށްރަށުގެ ޑަބްލިއުޑީސީގެ ރައީސުންނާއި ކޮމިޓީގެ މެންބަރުން އިންތިޚާބު ކުރާއިރު، ސިޓީތަކުގައި ވެސް ޑަބްލިއުޑީސީގެ ރައީސުންނާއި ކޮމިޓީ މެންބަރުން އިންތިޚާބު ކުރާނެ އެވެ.
ލޯކަލް ކައުންސިލްތަކުގެ އިންތިޚާބު 2026 ގެ ވޯޓު ނެގުމަށް ހަމަޖެހިފައިވަނީ، 2026 އެޕްރީލް 04 ވާ ހޮނިހިރު ދުވަހުގެ 8:00ން 16:00 އަށެވެ. އަދި ވޯޓު ގުނަން ފަށާނީ ހަމަ އެ ދުވަހު ވޯޓު ނަގާ ނިމޭތާ 30 މިނެޓުގެ ހުސްވަގުތުކޮޅަކަށް ފަހުގަ އެވެ.
މި އިންތިޚާބުގެ ރަސްމީ ނަތީޖާ އިއުލާނުކުރުމަށް ހަމަޖެހިފައިވަނީ 2026 އެޕްރީލް 11 ވާ ހޮނިހިރު ދުވަހު ކަމަށް އީސީން ބުނެ އެވެ.
