މުއިއްޒުގެ ވައުދާ ޚިލާފުވެ، ފްލެޓް އެއްބަސްވުންތައް ބާތިލު ކޮށް ލިޔުން ފޮނުވަން ފަށައިފި
ރައީސް މުއިއްޒު އެއްވެސް މީހެއްގެ އަތުން ލިބިފައިވާ ފްލެޓް އަތުނުލައްވާނެ ކަމަށް ވައުދުވެފައިވާއިރު، އެފްޑީސީން އެމްޑީޕީ ސަރުކާރުން ދިން ގެދޮރުވެރިޔާ ފްލެޓް ލިބުނު ފަރާތްތަކާ އެކު ހަދާފައިވާ އެއްބަސްވުން ބާތިލު ކޮށް ލިޔުން ފޮނުވަން ފަށައިފި.
ރައީސް މުހައްމަދު މުއިއްޒު.
އެމްޑީޕީ ސަރުކާރުން އެޅި ގެދޮރުވެރިޔާ ފްލެޓްތައް ލިބުނު ބައެއް ފަރާތްތަކާ އެކު ސަރުކާރުން ހަދާފައިވާ ފްލެޓް ލިބުނު ކަމުގެ އެއްބަސްވުން ރައީސް މުއިއްޒު ގެ ރިޔާސީ ވައުދާ ޚިލާފަށް ބާތިލު ކޮށް އެ ފަރާތްތަކަށް ފަހި ދިރިއުޅުން ކޯޕަރޭޝަން (އެފްޑީސީ) އިން ލިޔުން ފޮނުވަން ފަށައިފި އެވެ.
ރައީސް މުއިއްޒު ވެރިކަމަށް ވަޑައިގަންނަވުން ރައްޔިތުންނަށް ވީ ވައުދުގެ ތެރޭގައި އެއްވެސް މީހަކަށް ލިބިފައިވާ ފްލެޓެއް ވިޔަސް ގޯއްޗެއް ވިޔަސް އަތުނުލައްވާނެ ކަމަށް ތަކުރާރުކޮށް ވިދާޅުވެފައިވެ އެވެ. އަދި ވެރިކަމަށް ވަޑައިގަތުމަށް ފަހު، ސަރުކާރުން މީހަކަށް އެ ފަދަ އެއްޗެއް ދީ ގެޒެޓް ކޮށްފައިވާ ނަމަ ބަލާނީ އެ މީހަކަށް އެއެއްޗެއް ލިބުނީ ކަމަށް ވަނީ ވިދާޅުވެފަ އެވެ.
މުއިއްޒު މިހެން ވައުދުވެފައިވަނިކޮށް، އެފްޑީސީން ގެންދަނީ ފްލެޓް ލިބުނު އެތައް ބަޔަކަށް ފްލެޓް އެެއްބަސްވުން ކެންސަލް ކޮށް ސިޓީ ފޮނުވަމުންނެވެ.
އެފްޑީސީ އިން ފޮނުވަމުންދާ ސިޓީ ގައި ބުނެފައިވަނީ، ގެދޮރުވެރިޔާ ސްކީމުގެ ފްލެޓް ދޫކުރުމުގެ އުސޫލުގެ ދަށުން ކުރީގެ މިނިސްޓްރީ އޮފް ނޭޝަނަލް ޕްލޭނިންގ ހައުސިންގ އެންޑް އިންފްރާސްޓްރަކްޗަރ އިން ދިވެހި ސަރުކާރުގެ ގެޒެޓް ގައި ޝާއިއު ކޮށްފައިވާ ގެދޮރުވެރިޔާ ސްކީމް ގެ ދަށުން ފްލެޓް ލިބޭ ފަރާތްތަކުގެ ދާއިމީ ލިސްޓް ތިޔަ ފަރާތް ހިމެނޭތީ ފްލެޓް ކަނޑައެޅުމަށްޓަކައި "އެފްޑީސީ ގެ ލިޔުމުގައި" ސޮއިކޮށްފައިވީ ނަމަވެސް ތިޔަ ފަރާތަކީ ފްލެޓް ދޫކުރުމުގެ ޝަރުތު ފުރިހަމަވާ ފަރާތެއް ނޫން ކަމަށް ހައުސިންގ މިނިސްޓްރީން އަންގާފައިވާތީ އެ ލިޔުމަށް އަމަލު ކުރެވެން ނެތް ކަމަށާއި އެއީ "ބާތިލު ލިޔުމެއް" ކަމަށް އަންގާ ކަމަށެވެ.
އެފްޑީސީ އިން "ލިޔުމެއް" ކަމަށް ސިޓީ ގައި ބުނެފައިވަނީ އެފްޑީސީ އާއި ފްލެޓް ލިބުނު މީހުންނާ ދެމެދު ހަދާފައިވާ ރަސްމީ "ފަހި ދިރިއުޅުން ކޯޕަރޭޝަން ލިމިޓެޑުން އިމާރާތް ކުރާ ފްލެޓް ކަނޑައަޅާ އެއްބަސްވުން" އަށް ކަން ފާހަގަ ކުރެވެ އެވެ.
މައުލޫމާތު ލިބިފައިވާ ގޮތުގައި ފްލެޓް ލިބި އެއްބަސްވުން ހަދާފައިވާ 400 އެއްހާ ފަރާތައް ފްލެޓް ކެންސަލް ކޮށް އެފްޑީސީ އިން ލިޔުން ފޮނުވުމަށް ވަނީ ނިންމާފަ އެވެ.
