ދިރާސީ އައު އަހަރު ފެށެންވާއިރަށް ގެދޮރުވެރިޔާ ސްކީމުގެ ހުރިހާ ޓަވަރުތަކަކަށް ވަދެވޭނެ ކަމަށް ވިދާޅުވެ ރައީސް މުއިއްޒު ދެއްވި ޔަގީންކަން ތޮޅިޔަށް
ހުސްވި އަހަރުގެ ނޮވެމްބަރު 25 ވަނަ ދުވަހު މައްޗަންގޮޅީ ރައްޔިތުންނާ ބައްދަލުކޮށް ރައީސް ޑރ.މުއިއްޒު ވިދާޅުވީ ހުސްވި އަހަރުގެ ޑިސެމްބަރު މަސް ނިމޭއިރު ގެދޮރުވެރިޔާ ސްކީމްގެ ގިނަ ފްލެޓްތައް ނިންމައި ހައްޤުވެރިންނަށް ހަވާލު ކުރެވޭނެ ކަމަށާއި ދިރާސީ އައު އަހަރު ފެށެން ވާއިރަށް ހުރިހާ ޓަވަރުތަކަކަށް މީހުން ވަދެވޭނެ ކަމަށް.
ގެދޮރުވެރިޔާ ސްކީމްގެ ދަށުން ބިނާ ކޮށްފައިވާ ޓަވަރުތަކެއް. | ރާއްޖެ އެމްވީ
ދިރާސީ އައު އަހަރު ފެށެންވާއިރަށް ގެދޮރުވެރިޔާ ސްކީމުގެ ހުރިހާ ޓަވަރުތަކަކަށް ވަދެވޭނެ ކަމަށް ވިދާޅުވެ ރައީސް މުއިއްޒު ދެއްވި ޔަގީންކަން ތޮޅިޔަށް ހިނގައްޖެ އެވެ.
ހުސްވި އަހަރުގެ ނޮވެމްބަރު މަހުގެ 25 ވަނަ ދުވަހުގެ ރޭ މައްޗަށްގޮޅީ ރައްޔިތުންނާ ބައްދަލުކޮށް ވާހަކަދައްކަވަމުން ރައީސް ޑރ.މުއިއްޒު ވިދާޅުވީ، ޓަވަރުތަކަށް މީހުން ވަނުމަށް ކުރަންޖެހޭ ކަންތައްތައް ފަހި ދިރިއުޅުން ކޯޕަރޭޝަން (އެފްޑީސީ) އިން ކުރަމުންގެންދާ ކަމަށާއި، މިގޮތުން ފަންގިފިލާތަކަށް ކަރަންޓާއި ފެން ގުޅުމުގެ މަސައްކަތްތައް ކުރިއަށްދާކަމަށެވެ.
މަސައްކަތްތައް ކުރިއަށްދާގޮތުން ހުސްވި ޑިސެމްބަރު މަސް ނިމޭއިރު ގިނަ ފްލެޓްތަކެއް ނިމި އެތަންތަނުގެ ވެރިންނަށް ހަވާލު ކުރެވޭނޭ ކަމުގެ ޔަގީންކަން އެފްޑީސީން ދެއްވާފައިވާކަން ރައީސް މުއިއްޒު ފާހަގަކުރެއްވި އެވެ. އަދި އެހާތަނަށް ނުނިމޭ ތަންތަން ވެސް އައު އަހަރަށް ސްކޫލް ހުޅުވެން ވާއިރަށް ހުރިހާ ޓަވަރަކަށް މީހުންނަށް ވަދެވޭނެ ކަމުގެ ޔަގީންކަން އެފްޑިސީން ދީފައިވާކަމަށް މުއިއްޒު އޮތީ ވިދާޅުވެފަ އެވެ.
އެފް.ޑީ.ސީ.އިން މިހާރު އެ ތަންތަނުގައި ގުޅަންޖެހޭ ކަރަންޓާއި، އެ ހުރިހާ މަސައްކަތެއް އެ ނިންމަނީ. މި ޑިސެންބަރު ނިމޭއިރަށް، ގިނަ ފްލެޓްތައް، ނޫނީވިއްޔާ ޓަވަރުތައް ލިބިފައި ހުރި ފަރާތްތަކަށް ނިންމާފައި، ހަވާލުކުރެވޭނެ ކަމަށް، އެފް.ޑީ.ސީ.އިން މިރޭވެސް އަޅުގަނޑަށް ޔަޤީންކަން ދެއްވާފައި އެބައޮތް. ދެން، ނުނިމޭ ތަންތަންވެސް، ސްކޫލް ހުޅުވެންވާއިރަށް، ދިރާސީ އާ އަހަރު ހުޅުވެންވާއިރަށް، ހުރިހާ ޓަވަރަކަށް މީހުންނަށް ވަދެވޭނެކަމުގެ ޔަޤީންކަން ދެއްވާފައި ވަނީ.ރައީސް މުއިއްޒު މައްޗަންގޮޅި ރައްޔިތުންނާ ބައްދަލުކުރައްވާ ދެއްކެވި ވާހަކަފުޅުގެ ތެރެއިން - 25 ނޮވެމްބަރު 2025
ޑިސެމްބަރު ނިމި ޖެނުއަރީ މަހުގެ 27 ވަނަ ދުވަހު ދިރާސީ އައު އަހަރަށް ކިޔަވަން ފެށުނު އިރު ރައީސް މުއިއްޒު އެ ވިދާޅުވި ގޮތަައް ފްލެޓް ތައް ހަވާލު ކޮށް ނިމިފަ އެއް ނުވެ އެވެ.
ރައީސް ސޯލިހުގެ ސަރުކާރުން ހުޅުމާލޭގެ ދެވަނަ ފިޔަވަހީގައި ތަރައްޤީ ކޮށްފައިވާ 4،000 ހައުސިންގ ޔުނިޓު ލިބޭ ފަރާތްތަކަށް ޔުނިޓު ހަވާލު ކުރުމުގެ މަސައްކަތް އެފްޑީސީ އިން ފެށީ ސެޕްޓަރު 28، 2025 ގަ އެވެ.
އެންމެ ފުރަތަމަ ތަޅުދަނޑި ހަވާލުކޮށްފައި ވަނީ 'އަމާން އުދަރެސް' ޓަވަރު 14 އިން ޔުނިޓު ލިބުނު ފަރާތްތަކަށެވެ.
ގެދޮރުވެރިޔާ ސްކީމްގެ ދަށުން އިމާރާތް ކުރާ ފުރަތަމަ 4 ޓަވަރަށް 2024 ވަނަ އަހަރުގެ ފެބްރުއަރީގެ ނިޔަލަށް މީހުން ވެއްދޭވަރު ވާނެ ކަމަށް 20 ޑިސެމްބަރު 2023 ގައި ރާއްޖޭގެ މީޑީއާ އަކަށް އެފްޑީސީ ގެ މެނޭޖިންގ ޑިރެކްޓަރ ޙަމްދާން ޝަކީލް ދެއްވި އިންޓަރވިއުއެއްގައި ވިދާޅުވެފައިވެ އެވެ.
އޭގެ ފަހުން 4000 ފްލެޓް 2024 ވަނަ އަހަރުގެ އޮކްޓޯބަރުގައި ޙަވާލުކޮށް ނިންމަން މަސައްކަތް ކުރައްވާ ކަމަށް އޭރުގެ ހައުސިންގ މިނިސްޓަރ ޑރ. ޢަލީ ޙައިދަރު 12 އޮގަސްޓް 2024 ގައި ރައްޔިތުންގެ މަޖިލީހުގައި މެމްބަރަކު ކުރެއްވި ސުވާލަކަށް ޖަވާބު ދެއްވަމުން ވިދާޅުވެފައިވެ އެވެ.
ހުސްވި އަހަރުގެ ޑިސެމްބަރު މަހު އެފްޑީސީ އިން 4،000 ފްލެޓް ލިބުނު މީހުންނަށް އެތަންތަން ހަވާލުކޮށް ނިމޭނެކަމަށް ބުނެ އާ ތާރީހުތަކެއް އެ އިއުލާނުކުރި އެވެ. އެ ގޮތުން އެއްކޮށް ފްލެޓުތައް ދީ ނިމޭނީ މި ހިނގަމުންދާ ޖެނުއަރީ މަހުގެ ފަހު ހަފްތާގައި ކަމަށް އޭރު ބުނެފައިވެ އެވެ.
32 ޓަވަރުގެ މައްޗަށް އެކުލެވޭ ދެ ކޮޓަރި އާއި ތިން ކޮޓަރީގެ ފްލެޓުތައް ހިމެނޭ ގެދޮރުވެރިޔާ ސްކީމަށް ކުރީ ސަރުކާރުން ކުއްޔާއި ފީ ދެއްކުމަށް ކަނޑައަޅާފައި އޮތް އުސޫލަށް ރައީސް މުއިއްޒު ސަރުކާރުން ބަދަލު ގެނައުމާއެކު ދެ ކޮޓަރީގެ ފްލެޓަކަށް މެއިންޓެނަންސް ފީއާ އެކު 8،000ރ. މަހަކު ދައްކަން ޖެހޭއިރު ތިން ކޮޓަރީގެ ފްލެޓަކަށް މެއިންޓެނަންސް ފީއާ އެކު ދައްކަން ޖެހެނީ 11،500ރ. އެވެ.
