އަމާން ދޯދި 1 ވަނަ ޓަވަރުގައި އަލިފާނުގެ ހާދިސާ އެއް ހިނގައިފި
23 ޖެނުއަރީ 2026 | ހުކުރު 13:37ހުޅުމާލޭގެ އަމާން ދޯދި 1 ވަނަ ޓަވަރުގައި މިއަދު މެންދުރު 13:11 ގައި އަލިފާނުގެ ހާދިސާއެއް ހިނގައި އެމްއެންޑީއެފް އިން 13:28 ގައި އަލިފާން ކޮންޓްރޯލް ކޮށްފައިވޭ.
އަމާން ދޯދި 1 ވަނަ ޓަވަރުގައި އަލިފާނުގެ ހާދިސާ އެއް ހިނގުން | ސޯޝަލް މީޑިއާ
ހުޅުމާލޭގެ ދެވަނަ ފިޔަވަހީގައި ކުރީ ސަރުކާރުން ތަރައްގީ ކުރި އަމާން ދޯދި 1 ވަނަ ޓަވަރުގައި އަލިފާނުގެ ހާދިސާ އެއް ހިނގައިފި އެވެ.
މިކަމުގެ މައުލޫމާތު ހާމަކޮށް ފަހި ދިރިއުޅުން ކޯޕަރޭޝަން (އެފްޑީސީ) އިން ބުނީ އެ އަލިފާނުގެ ހާދިސާގެ މައުލޫމާތު ރިޕޯޓު ކުރުމާއެކު އެމްއެންޑީއެފް ގެ ފަޔަރ އެންޑް ރެސްކިއު އިން ހަރަކާތްތެރިވެ އެ އަލިފާންގަނޑު ކޮންޓްރޯލް ކޮށްފައިވާ ކަމަށެވެ. އަދި އެއްވެސް މީހަކަށް މި ހާދިސާގައި އަނިޔާ އެއް ލިބިފައި ނުވާ ކަމަށް ވެސް އެފްޑީސީ އިން ވަނީ ބުނެފަ އެވެ.
އެފްޑީސީ އިން ބުނީ އެ ސަރަހައްދުގެ ރައްކާތެރިކަން ކަށަވަރު ކުރުމަށް މިހާރު އިންސްޕެކްޝަންތައް ކުރިއަށް ދާ ކަމަށެވެ.
މީގެ އިތުރުން ބައެއް އަމިއްލަ ވައިބަރ ގްރޫޕް ތަކުގައި އިމާރާތުގެ ވެންޓިލޭޝަން ޝާފްޓްތަކާއި ކުނި އުކާލުމާ ގުޅޭގޮތުން ދޮގު މައުލޫމާތު ހިއްސާ ކޮށްފައިވާއިރު މިފަދަ މައުލޫމާތު ހިއްސާކުރާއިރު ޒިންމާދާރު ވުމަށް އެ ކޯޕަރޭޝަނުން ވަނީ އިލްތިމާސް ކޮށްފަ އެވެ.
މި ހާދިސާ އާ ގުޅިގެން އެމްއެންޑީއެފް އިން ބުނީ ހާދިސާ ރިޕޯޓްކޮށްފައި ވަނީ މިއަދު މެންދުރު 13:11 ހާއިރު ކަމަށެވެ. އަދި މި މައުލޫމާތު އެމްއެންޑީއެފް ފަޔަރ އެންޑް ރެސްކިޔު ސަރވިސްއަށް ލިބުމާ އެކު، ހުޅުމާލޭ ފަޔަރ ސްޓޭޝަނުގެ ފަޔަރ ފައިޓަރުން ވަނީ އެ ސަރަހައްދަށް ގޮސް އަލިފާން ނިއްވުމުގެ މަސައްކަތް ކޮށްފައި ކަމަށެވެ.
ފަޔަރ ފައިޓަރުން ކުރި މަސައްކަތުން އެ ޓަވަރުގެ ތިރީގައި ރޯވެފައި ހުރި އަލިފާން އެއްކޮށް ނިއްވާލެވުނީ މިއަދު މެންދުރު 13:28 ހާއިރުކަމަށް އެމްއެންޑީއެފް އިން ވަނީ ބުނެފަ އެވެ.
