އަމާން ދޯދި 1 ގައި ހިނގި އަލިފާނުގެ ހާދިސާ: 6 ވަނަ ޔުނިޓުގެ މާސްޓާ ބެޑްރޫމް ފިޔަވައި އެހެން ކޮޓަރިތަކާއި ޔުޓިލިޓީ އޭރިއާގައި ފެނާއި ޑްރެއިނޭޖް ބޭނުން ނުކުރުމަށް އެދެފި
24 ޖެނުއަރީ 2026 | ހޮނިހިރު 04:04ހުޅުމާލޭ އަމާން ދޯދި 1 ވަނަ ޓަވަރުގައި ހުކުރު ދުވަހު ހިނގި އަލިފާނުގެ ހާދިސާގައި ފެން ހޮޅިތަކަށް ގެއްލުން ވެފައިވާތީ، 6 ވަނަ ޔުނިޓުގެ މާސްޓާ ބެޑްރޫމް ފިޔަވައި އެހެން ތަންތަނުގައި ފެނާއި ޑްރެއިނޭޖް ބޭނުން ނުކުރުމަށް އެފްޑީސީން އެދިފައިވޭ. އެ ކޯޕަރޭޝަނުން ހާދިސާގެ ސަބަބާއި ލިބިފައިވާ ގެއްލުން ދެނެގަތުމުގެ މަސައްކަތް ކުރަމުން ދާ ކަމަށް ވަނީ ބުނެފަ.
އަމާން ދޯދި 1 ވަނަ ޓަވަރުގެ ތިރީގައި ހުރި ކުނި ތަކެއްގައި ރޯވެފައި | ސޯޝަލް މީޑިއާ
ހުޅުމާލޭގެ ދެވަނަ ފިޔަވަހީގައި ކުރީ ސަރުކާރުން ތަރައްގީ ކުރި އަމާން ދޯދި 1 ވަނަ ޓަވަރުގައި އަލިފާނުގެ ހާދިސާ އާ ގުޅިގެން ފެން ހޮޅިތަކަށް ގެއްލުން ވެއްޖެ އެވެ.
އަމާން ދޯދި 1 ވަނަ ޓަވަރުގައި އަލިފާނުގެ ހާދިސާ އެއް ހުކުރު ދުވަހު ވަނީ ހިނގާފަ އެވެ. މިކަމުގެ މައުލޫމާތު ހާމަކޮށް ފަހި ދިރިއުޅުން ކޯޕަރޭޝަން (އެފްޑީސީ) އިން ބުނީ އެ އަލިފާނުގެ ހާދިސާގެ މައުލޫމާތު ރިޕޯޓު ކުރުމާއެކު އެމްއެންޑީއެފް ގެ ފަޔަރ އެންޑް ރެސްކިއު އިން ހަރަކާތްތެރިވެ އެ އަލިފާންގަނޑު ކޮންޓްރޯލް ކޮށްފައިވާ ކަމަށެވެ. އަދި އެއްވެސް މީހަކަށް މި ހާދިސާގައި އަނިޔާ އެއް ލިބިފައި ނުވާ ކަމަށް ވެސް އެފްޑީސީ އިން ވަނީ ބުނެފަ އެވެ.
އެމްއެންޑީއެފް އިން ބުނީ ހާދިސާ ރިޕޯޓްކޮށްފައި ވަނީ ހުކުރު ދުވަހު މެންދުރު 13:11 ހާއިރު ކަމަށެވެ. އަދި މި މައުލޫމާތު އެމްއެންޑީއެފް ފަޔަރ އެންޑް ރެސްކިޔު ސަރވިސްއަށް ލިބުމާ އެކު، ހުޅުމާލޭ ފަޔަރ ސްޓޭޝަނުގެ ފަޔަރ ފައިޓަރުން ވަނީ އެ ސަރަހައްދަށް ގޮސް އަލިފާން ނިއްވުމުގެ މަސައްކަތް ކޮށްފައި ކަމަށެވެ.
ފަޔަރ ފައިޓަރުން ކުރި މަސައްކަތުން އެ ޓަވަރުގެ ތިރީގައި ރޯވެފައި ހުރި އަލިފާން އެއްކޮށް ނިއްވާލެވުނީ ހުކުރު ދުވަހު މެންދުރު 13:28 ހާއިރުކަމަށް އެމްއެންޑީއެފް އިން ވަނީ ބުނެފަ އެވެ.
އެ ހާދިސާއާ ގުޅިގެން އެ ކޯޕަރޭޝަނުން ވަނީ މި ޓަވަރުގައި ދިރިއުޅޭ ފަރާތްތަކަށް އަންގަންޖެހޭ މައުލޫމާތު އެފްޑީސީ ގެ އޮފިޝަލް ވައިބަރ ގްރޫޕްތަކުން ހިއްސާ ކޮށްފަ އެވެ.
އެފްޑީސީން ފޮނުވި މެސެޖުގައި ބުނީ އަލިފާނުގެ ހާދިސާގައި ހޮޅިތަކަށް ގެއްލުން ލިބިފައިވާ ކަމަށެެވެ. އެހެންވެ، ކޮންމެ ފަންގިފިލާއެއްގެ 6 ވަނަ ޔުނިޓުގެ މާސްޓާ ބެޑްރޫމް ފިޔަވައި އެހެން ކޮޓަރިތަކާއި ޔުޓިލިޓީ އޭރިއާގައި ފެނާއި ޑްރެއިނޭޖް ބޭނުން ނުކުރުމަށް އެދޭ ކަމަށެވެ.
އެފްޑީސީ އިން ބުނީ މި ހާދިސާ ހިނގަން މެދުވެރިވި ސަބަބުތައް އިތުރަށް ދެނެގަތުމުގެ މަސައްކަތް އެ ކޯޕަރޭޝަނުން ކުރަމުންދާއިރު، އަލިފާނުގެ ހާދިސާގެ ސަބަބުން އިމާރާތައް ލިބިފައިވާ ގެއްލުން ދެނެގަނެ ކުރަންޖެހޭ މަރާމާތު ދެނެގަތުމުގެ މަސައްކަތް ވެސް ކުރަމުންދާނެ ކަމަށެވެ.
މީގެ އިތުރުން ބައެއް އަމިއްލަ ވައިބަރ ގްރޫޕް ތަކުގައި އިމާރާތުގެ ވެންޓިލޭޝަން ޝާފްޓްތަކާއި ކުނި އުކާލުމާ ގުޅޭގޮތުން ދޮގު މައުލޫމާތު ހިއްސާ ކޮށްފައިވާއިރު މިފަދަ މައުލޫމާތު ހިއްސާކުރާއިރު ޒިންމާދާރު ވުމަށް އެ ކޯޕަރޭޝަނުން ވަނީ އިލްތިމާސް ކޮށްފަ އެވެ.
އެހެންކަމުން މިފަދަ މައުލޫމާތު ހިއްސާ ކުރާއިރު އެފްޑީސީގެ އޮފިޝަލް ސޯޝަލް މީޑިޔާ ޕްލެޓްފޯމްތަކުގެ އިތުރުން އެ ކޯޕަރޭޝަނުގެ އޮފިޝަލް ވައިބަރ ގްރޫޕްތަކުން ހިއްސާކުރާ މައުލޫމާތުތަކަށް ރިއާޔަތް ކުރުމަށް ވެސް ވަނީ އެދިފަ އެވެ.
އެފްޑީސީ އިން ބުނީ މުސްތަގުބަލުގައި މިފަދަ ހާދިސާތައް ތަކުރާރުވިޔަ ނުދިނުމަށާއި، ޓަވަރުތަކުގައި ދިރިއުޅޭ އެންމެހާ ފަރާތްތަކުގެ ސަލާމަތާއި ރައްކާތެރިކަން ކަށަވަރު ކުރުމުގެ ގޮތުން، ކުނި އުކާލުމަށް ޚާއްސަ ކުރެވިފައިވާ ސަރަހައްދު ފިޔަވައި އެހެން ތަންތަނަށް ކުނި އުކާލުމަކީ މަނާކަމެއް ކަމެއް ކަމަށެވެ.
