"ބިންވެރިޔާ" ސްކީމުގެ ދަށުން ގިރާވަރުފަޅުން ގޯތި ލިބުނު މީހުންގެ ބިމުގެ ސަރަހައްދުތައް ކަނޑައެޅުމަށް އަލުން ގުރު ނަގަނީ
މިމަހުގެ 31 ވާ ހޮނިހިރު ދުވަހު މާފަންނު ޒުވާނުންގެ މަރުކަޒުގައި އާ ލޮޓް ނަންބަރު ކަނޑައެޅުމަށް ގުރުއަތުލުން ކުރިއަށް ދާނެ. ކުރިން ހަމަޖެހިފައިވާ 610 ގޯތި މަދުވާތީ ޖުމްލަ 4،072 ގޯތި ހިމެނޭ އާ ޕްލޭން އެކުލަވާލައި އާންމުކޮށްފައިވާނެ ކަމަށް މިނިސްޓްރީ އިން ބުނި. ދައުލަތުގެ މީޑިއާއިން މި ގުރުއަތުލުން ވަގުތުން ދައްކާނެ ކަމަށް ވެސް މިނިސްޓްރީން ބުނި.
ގިރާވަރު ފަޅު | ސޯޝަލް މީޑިއާ
ގިރާވަރުފަޅު ގެ ލޭންޑް ޔޫސް ޕްލޭނަށް ގެނެސްފައިވާ ބަދަލާ އެކު "ބިންވެރިޔާ" ސްކީމުގެ ދަށުން ގިރާވަރުފަޅުން ގޯތި ލިބިފައިވާ މީހުންގެ ބިމުގެ ސަރަހައްދުތައް ކަނޑައެޅުމަށް އަލުން ގުރުއަތުލުން ކުރިއަށް ގެންދަން ނިންމައިފި އެވެ.
ހައުސިންގ މިނިސްޓްރީ އިން ކުރި އިއުލާނެއްގައި ބުނީ ގިރާވަރުފަޅުގެ ލޭންޑް ޔޫޒް ޕްލޭނަށް ބަދަލު ގެނެވި, އާ ލޭންޑް ޔޫޒް ޕްލޭނެއް ތައްޔާރުކުރެވިފައިވާތީ، އެ ޕްލޭނަށް ރިއާޔަތްކޮށް ބިންވެރިޔާ ސްކީމްގެ ދަށުން ގިރާވަރުފަޅުން ގޯތި ލިބިފައިވާ ފަރާތްތަކުގެ ގޯތީގެ ސަރަހައްދަށް ބަދަލު އައިސްފައިވާ ކަމަށެވެ. އެހެންކަމުން އާ ލޮޓް ނަންބަރެއް ކަނޑައެޅިގެން ދިއުން އެކަށީގެންވާ ކަމަށް މިނިސްޓްރީން ބުންޏެވެ. އަދި ގޯތީގެ ގުރު ނެގުން މިމަހުގެ 31 ވާ ހޮނިހިރު ދުވަހު ކުރިއަށް ގެންދަން ނިންމާފައިވާ ކަމަށް އެމިނިސްޓްރީން ބުނެފައިވެ އެވެ.
އެ މިނިސްޓްރީ އިން ބުނީ އެ ބަދަލާ ގުޅިގެން، ގޯތި ލިބުނު އެންމެނަށް ލިބިފައިވާ ގޯތި އަލުން ކަނޑައެޅުމަށްޓަކައި އަންނަ ހޮނިހިރު ދުވަހުގެ ހެނދުނު 9:30 އިން ފެށިގެން މާފަންނު ޒުވާނުންގެ މަރުކަޒުގައި ގުރު ނެގުން ކުރިއަށް ދާނެ ކަމަށެވެ. އަދި މީގެ ކުރިން އާންމުކޮށްފައިވާ ގިރާވަރުފަޅުގެ ލޭންޑު ޔޫސް ޕްލޭނުގައި އެ ސަރަހައްދުން ދޫކުރަން ހަމަޖެހިފައިވާ 610 ގޯތި މަދުވާ ކަމަށް ވެސް އެ މިނިސްޓްރީން ބުނެ އެވެ.
ހައުސިންގ މިނިސްޓްރީ އިން ބުނީ އެ އަދަދު ހިމަނައިގެން ގިރާވަރުފަޅުން ދޫކުރަންޖެހޭ ޖުމްލަ 4،072 ގޯއްޗާ އެކު އާ ލޭންޑް ޔޫސް ޕްލޭން މިހާރު އެކުލަވާލައި އާންމުކޮށްފައިވާ ކަމަށެވެ. އަދި މިނިސްޓްރީން ބުނި ގޮތުގައި ގުރު ނެގުން ކުރިއަށް ގެންދާނީ ހާޒިރީންނާއި މިނިސްޓްރީގެ މުވައްޒަފުންގެ ކުރިމަތީގަ އެވެ.
ގުރުއަތު ނެގުން ކުރިއަށްދާއިރު، ގޯތި ލިބިފައިވާ ފަރާތްތަކަށް ހަމަޖެހިގެންދާ ޕްލޮޓް ހައުސިންގ މިނިސްޓްރީގެ ހިޔާވެހި ޕޯޓަލުން ވަގުތުން ފެންނާނެ ކަމަށާއި، އެ ފަރާތްތަކަށް ލިބޭ ޕްލޮޓް ނަންބަރު މެސެޖަކުން އަންގާނެ ކަމަށް މިނިސްޓްރީން މައުލޫމާތުދެ އެވެ.
ދައުލަތުގެ މީޑިއާއިން މި ގުރުއަތުލުން ވަގުތުން ދައްކާނެ ކަމަށް ވެސް މިނިސްޓްރީން ބުންޏެވެ.
އެއާއެކު، މިނިސްޓްރީން ބުނީ، ގޯތި ލިބޭ ފަރާތްތަކުގެ ގުރުނަގާ ނިމުމުން، ގޯތި ހަވާލުކުރުމުގެ އެއްބަސްވުމުގައި ސޮއިކުރުމާއި ގޯތީގެ ރަޖިސްޓްރީ ހަވާލުކުރުމުގެ މަސައްކަތް ކުރިއަށްގެންދާނެ ގޮތުގެ މައުލޫމާތު ފަހުގެ ތާރީޚެއްގައި ހިއްސާކުރެވޭނެ ކަމަށެވެ.
