މިޔަންމާ ގައި ސްކޭމް ސެންޓަރުތައް ހިންގި އާއިލާއެއްގެ 11 މެންބަރަކަށް ޗައިނާ އިން މަރުގެ އަދަބު ދީފި
މިޔަންމާ ގެ މިންގް އާއިލާ އިން 2015 އާއި 2023 އާ ދެމެދު 1.4 ބިލިއަން ޑޮލަރުގެ އާމްދަނީ ހޯދި ކަމަށް ކޯޓުން ހާމަކޮށްފައިވާއިރު، އެ ޖަރީމާތަކުގެ ސަބަބުން ޗައިނާގެ 14 ރައްޔިތަކު މަރުވެފައިވޭ. އިންސާނީ ވަގުފާރީގެ މަޅީގައި ޖެހިގެން މިފަދަ މަރުކަޒުތަކަށް ގެންދެވޭ މީހުންނަށް މަޖުބޫރުކޮށްގެން މަކަރާއި ހީލަތުން ފައިސާ އަތުލުމަށް މަސައްކަތް ކުރުވި ކަމަށްވޭ.
މިންގ އާއިލާގެ މެމްބަރުން ޝަރީއަތުގެ މަޖިލީހުގައި. | ސީސީޓީވީ
މިޔަންމާގައި މަކަރާއި ހީލަތުން ފައިސާ އަތުލާ "ސްކޭމް ސެންޓަރުތަކެއް" ހިންގި ނުރައްކާތެރި އާއިލާއެއްގެ 11 މެންބަރެއްގެ މައްޗަށް އިއްވާފައިވާ މަރުގެ އަދަބު ޗައިނާ އިން ތަންފީޒުކޮށްފި ކަމަށް އެ ގައުމުގެ ދައުލަތުގެ މީޑިއާތަކުން ރިޕޯޓްކޮށްފި އެވެ.
ޗައިނާގެ ޒޭޖިއަންގް ޕްރޮވިންސްގެ ކޯޓަކުން މިދިޔަ ސެޕްޓެމްބަރު މަހު މިންގް އާއިލާގެ މި މެންބަރުންގެ މައްޗަށް ހުކުމް އިއްވީ، ގަސްދުގައި މީހުން މެރުމާއި، ޣައިރު ގާނޫނީ ގޮތެއްގައި މީހުން ބަންދުކުރުމާއި، މަކަރާއި ހީލަތް ހެދުމުގެ އިތުރުން ގަވާއިދާ ހިލާފަށް ގޭމްބްލިން ނުވަތަ ޖުވާ ކުޅޭ ތަންތަން ހިންގިކަން ސާބިތުވުމާ ގުޅިގެންނެވެ.
މިންގް އާއިލާ އަކީ ޗައިނާގެ ބޯޑަރު ކައިރީގައި އޮންނަ މިޔަންމާގެ ލައުކައިންގް ނަމަކަށް ކިޔާ ކުޑަ އަވަށެއް ކޮންޓްރޯލް ކުރަމުންދިޔަ ނުފޫޒުގަދަ އާއިލާތަކުގެ ތެރެއިން އެއް އާއިލާ އެވެ. އެ އާއިލާގެ ވެރިކަމުގެ ދަށުން، ފަގީރު އަދި އެކަހެރިކޮށް އޮތް އެ އަވަށަކީ ކެސީނޯތަކާއި ހަށިވިއްކާ މަރުކަޒުތައް ގިނަ، ޒަމާނީ ވަސީލަތްތަކުން ފުރިގެންވާ މަރުކަޒަކަށް ވަނީ ބަދަލުކޮށްފަ އެވެ.
މި އާއިލާގެ ނުރައްކާތެރި ވިއުގަ ރޫޅިގެންދިޔައީ 2023 ވަނަ އަހަރު މިޔަންމާގައި ކުރިއަށްދާ ދާހިލީ ހަނގުރާމައިގެ ތެރެއިން، ލައުކައިންގް ގެ ކޮންޓްރޯލް ހޯދި ހަނގުރާމަވެރި ޖަމާއަތްތަކުން އެ އާއިލާގެ މެންބަރުން ހައްޔަރުކޮށް ޗައިނާގެ ސަރުކާރާ ހަވާލުކުރުމާ ގުޅިގެންނެވެ.
މިޔަންމާ ގައި ހިންގާ މިފަދަ ސްކޭމް އޮޕަރޭޝަންތަކުގައި ވޭތުވެދިޔަ އަހަރުތަކުގައި ޗައިނާގެ އެތައް ހާސް މަސައްކަތްތެރިންނެއް ވަނީ ތާށިވެފަ އެވެ. މި މީހުންނަކީ އިންސާނީ ވަގުފާރީގެ މަޅީގައި ޖެހިގެން މިފަދަ މަރުކަޒުތަކަށް ގެންދެވޭ އެތައް ލައްކަ ބައެއްގެ ތެރޭގައި ހިމެނޭ ބައެކެވެ. އެ މަރުކަޒުތަކުގައި އެ މީހުންނަށް މަޖުބޫރުކުރަނީ ބޭރު ގައުމުތަކުގެ މީހުންނަށް ގުޅައިގެން މަކަރާއި ހީލަތުން ފައިސާ އަތުލުމަށެވެ.
މިދިޔަ އަހަރު ޗައިނާގެ އިންޓަނެޓްގައި އެންމެ ބޮޑަށް ދެކެވުނު އެއް ވާހަކައަކީ، އެކްޓިންގެ މަސައްކަތަކަށް ތައިލެންޑަށް ދިޔަ ޗައިނާގެ އާދައިގެ އެކްޓަރަކު، ރަހީނުކޮށްގެން މިޔަންމާގެ ސްކޭމް ސެންޓަރަކަށް ގެންދިޔަ ހާދިސާ އެވެ. މިފަދަ ހާދިސާތަކާ ގުޅިގެން ޗައިނާ ސަރުކާރުގެ ކަންބޮޑުވުންތައް އިތުރުވެ، މިޔަންމާގެ އަސްކަރީ ސަރުކާރުން މިފަދަ ޖަރީމާތައް ހުއްޓުވުމަށް ޗައިނާއިން ދިޔައީ ތަކުރާރުކޮށް ބާރުއަޅަމުންނެވެ.
ނަތީޖާއެއްގެ ގޮތުން، މިޔަންމާގެ އަސްކަރީ ސަރުކާރާއި އެ ގައުމުގެ ހަނގުރާމަވެރި ޖަމާއަތްތަކާ ދެމެދު އޮތް ކުރިމަތިލުންތައް ވަރުގަދަވެ، ލައުކައިންގްގައި ހަރަކާތްތެރިވި މި މާފިއާ ގްރޫޕްގެ ބާރު ކެނޑިގެންދިޔަ އެވެ.
ޗައިނާގެ އެންމެ މަތީ ކޯޓުން ހާމަކޮށްފައިވާ ގޮތުގައި، މިންގް މާފިއާ އާއިލާގެ ސްކޭމް އޮޕަރޭޝަންތަކާއި ގޭމްބްލިން މަރުކަޒުތަކުން 2015 އާއި 2023 އާ ދެމެދު 10 ބިލިއަން ޔުއާން (ގާތްގަނޑަކަށް 1.4 ބިލިއަން އެމެރިކާ ޑޮލަރު) ގެ އާމްދަނީއެއް ހޯދާފައިވެ އެވެ. އެ އާއިލާ އިން ހުށަހެޅި އިސްތިއުނާފް މައްސަލަތައް މިދިޔަ ނޮވެމްބަރު މަހު ކޯޓުން ވަނީ ބޭރުކޮށްލާފަ އެވެ.
މި އާއިލާގެ ޖަރީމާތަކުގެ ސަބަބުން ޗައިނާގެ 14 ރައްޔިތަކު މަރުވެ، އެތައް ބަޔަކަށް އެކިވަރުގެ އަނިޔާތައް ލިބިފައިވާ ކަމަށް ވެސް ކޯޓުން ފާހަގަކޮށްފައިވެ އެވެ.
