ވިލިމާލެ ހޮސްޕިޓަލާއި ގުޅޭގޮތުން ސަރުކާރުން އެކި ފަހަރު އެކި ތާރީހު
ރައީސް މުއިއްޒުގެ ސަރުކާރުން ވިލިމާލޭ ހޮސްޕިޓަލް ނިމޭނެ އައު ތާރީހެއް އަނެއްކާދީ ދައުރު ނިމުމުގެ ކުރިން މަސައްކަތް ނިމޭނެ ކަމަށް ބުނެފައިވޭ
ވިލިމާލޭގެ 100 އެނދުގެ ހޮސްޕިޓަލުގެ ފީސިބިލިޓީ ސްޓަޑީ ހެދުމަށް ހަވާލުކުރި ރަސްމިއްޔާތުގެ ތެރެއިން - 17 އޮކްޓޯބަރު 2024
2024 ގައި އަމަލީ މަސައްކަތް ފަށާ އަންނަ އަހަރު ތެރޭގައި ހިދުމަތް ލިބޭނެކަމަށް ސަރުކާރުން ބުނި ވިލިމާލޭ ހޮސްޕިޓަލްގެ މަސައްކަތް ނުފެށި ދިގުލައިގެން ގޮސް ދައުރު ނިމުމުގެ ކުރިން އެ ހޮސްޕިޓަލުން ހިދުމަތް ލިބޭނެކަމަށް ބުނެ ސަރުކާރުން އަނެއްކާ ވެސް އައު ތާރީހެއް ދީފި އެވެ.
ވިލިމާލޭގެ އައު ހޮސްޕިޓަލު ނިމޭނެ އައު ތާރީހެއް ދެއްވީ ރައީސް ޑރ. މުހައްމަދު މުއިއްޒު އާދީއްތަ ދުވަހުގެ ރޭ ވިލިމާލޭގެ ރައްޔިތުންނާއި ބައްދަލުކުރެއްވުމަށް ބޭއްވި ހަފްލާގައި ކޮންސްޓްރަކްޝަން މިނިސްޓަރު ޑރ. އަބްދުﷲ މުއްތަލިބު އެވެ. މިއީ އެ ހޮސްޕިޓަލުގެ ތާރީހާއި ގުޅިގެން ސަރުކާރުން ވާހަކަ ދެއްކި 3 ވަނަ ފަހަރެވެ.
މިނިސްޓަރު މުއްތަލިބު ވިދާޅުވީ މި ސަރުކާރު ވެރިކަމާއި ހަވާލުވި އިރު ގައި ހިލޭ އެހީގެ ގޮތުގައި ޗައިނާ ސަރުކާރުން ކަނޑައަޅާފައިވާ ފައިސާގެ ތެރެއިން ބޮޑު ބައެއް ހަރަދު ކުރައްވަން ނިންމެވީ ވިލިމާލެ އަށް ކަމަށެވެ. އެގޮތުން 100 އެނދުގެ ހޮސްޕިޓަލެއްގެ މަސައްކަތް ވަރަށް ކުރީކޮޅުގައި ފަށައިގެން ހިންގަމުންދާ ކަމަށެވެ. މިނިސްޓަރު ވިދާޅުވީ ޗައިނާގެ ހިލޭ އެހީގައި ފަށާ ޕްރޮޖެކްޓްތަކަކީ ވަރަށް ގިނަ މަރުހަލާތަކެއް ހިނގާ ޕްރޮޖެކްޓްތަކެއް ކަމަށެވެ.
ރައްޔިތުންގެ ފައިސާވީމާ ވަރަށް ގިނަ ކަންތައްތަކެއް ފާހަގަކޮށް، ވަރަށް ގިނަ ކަންތައްތަކެއް ކޮށްގެން އަޅުގަނޑުމެންނަށް އިމްޕްލިމެންޓޭޝަނާ ހަމައަށް ދެވެނީ. އެހެންވީމާ އެގޮތުން އެންމެ ފުރަތަމަ ފީސިބިލިޓީ ޓީމެއް އައިސް ފީސިބިލިޓީގެ މަސައްކަތް ކޮށް އޭގެ ފަހުން ކޮންސެޕްޝަނަލް ލެވެލް، އަގުތަކާ އެއްޗެހި ހަދާ ނިންމާ މިހާރު އެ އޮތީ ޑިޒައިން ކޮންސަލްޓެންޓެއް - ޓެންޑަރ ކުރުމަށް ބޭނުންވާ ހުރިހާ ޑޮކިއުމެންޓްތައް ފައިނަލް ކުރުމަށް ބަޔަކު ހޮވާފައި. އިރާދަކުރެއްވިއްޔާ ޑިސެމްބަރު މަހުގެ ތެރޭގައި އެ ޓީމުން އައިސްގެން ކަމާބެހޭ އިދާރާތަކާއި ވާހަކަ ދައްކައިގެން ބޭނުންވާ ފައިނަލް ޑީޓަލް ޑިޒައިންތަކާއި އަދި ޓެންޑަރ ޑޮކިއުމެންޓްސްތަކާ އެއްޗެހި ތައްޔާރުކުރާނެ. އެ މަސައްކަތަށް ގާތްގަނޑަކަށް 5 މަސް ދުވަސް ވަރު ނަގާނެ ކަމަށް މައުލޫމާތު ދިފައި އޮތީ.ކޮންސްޓްރަކްޝަން މިނިސްޓަރު ޑރ. އަބްދުﷲ މުއްތަލިބު
މިނިސްޓަރ ވިދާޅުވީ ފައިނަލް ޑީޓެއިލް ޑިޒައިން
ތަކާއި އަދި ޓެންޑަރ ޑޮކިއުމެންޓްސްތަކުގެ މަސައްކަތަށް ބޭނުންވާ 5 މަސް ދުވަސް ނަގާނެ ކަމަށެވެ. އެހެންކަމުން އަންނަ އަހަރުގެ މެދުތެރޭގައި ނުވަތަ 3 ވަނަ ކުއާޓަރ އަށް ދާއިރުގައި އަމަލީ މަސައްކަތް ފެށިގެން އަޅުގަނޑު ގަބޫލުކުރަނީ 2 އަހަރެއްހާ ދުވަހުގެ ތެރޭގައި މަސައްކަތް އެންމެ ގިނަވެގެން ނިމިގެންދާނެ ކަަމަށް މިނިސްޓަރ ވިދާޅުވި އެވެ. އަދި ނިމިގެންދާއިރު ހޮސްޕިޓަލް ވެގެންދާނީ ޒަމާނީ ފެންވަރުގެ ހުރިހާ ވަސީލަތްތަކެއް ގާއިމްކުރެވިފައި އޮންނަ ހޮސްޕިޓަލަކަށް ކަމަށެވެ.
މިނިސްޓަރު މިފަދައިން ވިދާޅުވި ނަމަވެސް ވިލިމާލޭގައި 100 އެނދުގެ އައު ހޮސްޕިޓަށް 2024 ވަނަ އަހަރުގެ ތެރޭގައި އަޅަން ފަށާނެ ކަމަށް ކުރީގެ ހެލްތް މިނިސްޓަރު އަދި މިހާރުގެ ފޮރިން މިނިސްޓަރު ޑރ. އަބްދުﷲ ހަލީލު ވަނީ ވިދާޅުވެފަ އެވެ. މިނިސްޓަރު ހަލީލު ވިދާޅުވީ ޑިސެމްބަރު 27، 2023 ގައި ދައުލަތުގެ މީޑިއާއަށް ދެއްވި އިންޓަރވިއު އެއްގަ އެވެ. މިނިސްޓަރު ހަލީލު ވިދާޅުވީ 2024 ވަނަ އަހަރު އަމަލީ މަސައްކަތް ފަށާ 3 އަހަރު ދުވަހުގެ ތެރޭގައި އެ ހޮސްޕިޓަލުގެ އަމަލީ މަސައްކަތް ނިންމާ ހިދުމަތް ލިބޭނެ އިންތިޒާމް ހަމަޖެހިގެންދާނެ ކަމަށެވެ.
މީގެ އިތުރުން ވިލިމާލޭގެ 100 އެނދުގެ ހޮސްޕިޓަލުގެ އަމަލީ މަސައްކަތް މި އަހަރުގެ މެދުތެރޭގައި ފަށާނެ ކަމަށް މާލޭ ގްރޫޕް އޮފް ހޮސްޕިޓަލްސްގެ ސީއީއޯ އިބްރާހީމް އަބްދުއްރައްޒާގް ހަލީމް ވަނީ ވިދާޅުވެފަ އެވެ. ހަލީމް މިފަދައިން ވިދާޅުވީ 9 ޑިސެމްބަރު 2024 ގަ އެވެ. ހަލީމް ވިދާޅުވެފައިވަނީ ދިވެހި ސަރުކާރާއި ޗައިނާ ސަރުކާރާ ދެމެދު މަޝްވަރާތައް ކުރެވި، މިނިސްޓްސް އޮފް ދަ މީޓިންގްސް ގައި ސޮއިކުރެވިފައިވާ ކަމަށެވެ. އަދި ހޮސްޕިޓަލުގެ ފީސިބިލިޓީގެ މަސައްކަތް ޗައިނާގެ ސިޑްކާ ކުންފުނިން ވަނީ ކޮށްފައި ކަމަށެވެ.
ސަރުކާރުން އެއިރު ބުނެފައިވަނީ 6 މަސްދުވަހުގެ ތެރޭގައި ޓެންޑަރިންގ މަރުޙަލާގައި މަސައްކަތް ކުރާނެ ކުންފުންޏެއް ހޯދުމުގެ މަސައްކަތް ޗައިނާއިން ކުރިއަށްގެންދާނެއެވެ. އަދި މި އަހަރުގެ މެދުތެރޭގައި އަމަލީ މަސައްކަތް ފަށާ 2 އަހަރުގެ ތެރޭގައި މަސައްކަތް ނިމެނޭ ކަމަށެވެ.
