އިނގިރޭސިވިލާތުގެ ވެރި ރަށް ލަންޑަނު ގައި ހުންނަ ޗައިނާގެ އެމްބަސީގެ އައު އިމާރާތުގެ މަސައްކަތްތަކަށް ދޭންޖެހޭ ހުއްދަ ތަކުގެ މައްސަލައިގައި ގޮތެއް ނިންމުން އިނގިރޭސި ސަރުކާރުން ލަސްކޮށްފި އެވެ.

ލަންޑަނުގެ އެންމެ ކާރޫ ބާރޫ ބޮޑު އެއް ސަރަހައްދުގައި، ހައުސް އޮފް ޕާލަމެންޓާއި މާދުރު ނޫން ހިސާބެއްގައި ކުރިން ރޯޔަލް މިންޓް ހިންގި އިމާރާތް ގަނެގެން، އެތަނަށް ބަދަލުތަކެއް ގެނެސް، އެތަނަށް އެމްބަސީ ބަދަލު ކުރުމަށް ޗައިނާ ސަރުކާރުން ދަނީ މަސައްކަތް ކުރަމުންނެވެ.

މިއީ ނިސްބަތުން ބޮޑު އެމްބަސީއަކަށް ވެފައި، އެތަނާ މެދު ޗައިނާ އިން ގެންގުޅޭ ތަސައްވުރުގެ ސަބަބުން އެތަން މަޝްހޫރު ވެފައި ވަނީ 'ސުޕަ އެމްބަސީ' އެއްގެ ގޮތުގަ އެވެ. ޗައިނާގެ އިންސާނީ ހައްޤު ތަކުގެ ރެކޯޑާއި، އެ ގައުމުން ސަރުކާރާ އިދިކޮޅު ފަރާތްތަކާ ދޭތެރޭ ކަންކުރާ ގޮތުގެ އިތުރުން، ސަލާމަތީ ސަބަބު ތަކަށްޓަކައި އެ އިމާރާތަށް އެމްބަސީ ބަދަލު ކުރުމަށް އެ ސަރަހައްދުގެ ރައްޔިތުން ނުރުހެ އެވެ. މިހާތާނަށް އެކަން ނުވެ އޮތީ އެ ސަބަބަށްޓަކަ އެވެ.

އިމާރާތަށް އަލަށް އިތުރުކުރާ ބައިތަކުގެ ކުރެހުންތައް ޗައިނާ ސަރުކާރުން ސިއްރު ކުރުމާ ގުޅިގެން، އެ ކުރެހުންތައް އެއްކޮށް ލިބުމުން ނޫނީ ހުއްދަ ނުދޭން އިނގިރޭސި ސަރުކާރުން ވަނީ ކުރިން ނިންމާފަ އެވެ. މިކަމާ ގުޅޭ ގޮތުން ސެޕްޓެމްބަރު މަހުގެ ނުވަ ވަނަ ދުވަހު ގޮތެއް ނިންމަން އިނގިރޭސި ބޮޑުވަޒީރުގެ ނައިބު އަދި ހައުސިންއާ ބެހޭ ވަޒީރު އެންޖެލާ ރެއިނާ ހަމަޖައްސަވާފައިވީ ނަމަވެސް، މިހާރު ނިންމަވާފައިވަނީ އެނިންމުން އޮކްޓޫބަރު 21 އަށް ލަސް ކުރުމަށެވެ.

އިމާރާތުގެ އައު ޑިޒައިންތައް އެކުލަވާލާފައި ހުންނަ ގޮތުން އެމްބަސީ އިން ޚިދުމަތް ހޯދަން ދާ ބަޔަކު ހިފަހައްޓައި، އިނގިރޭސި ސަރުކާރުގެ ބާރު ނުފޯރާ ހިސާބަށް ގެންދިޔުމުގެ ބިރު އެބަ އޮތް ކަމަށް އެކްޓިވިސްޓުން ފާހަގަކުރެ އެވެ.

މި އެމްބަސީ އަކީ ހުޅަނގުގެ ގައުމު ތަކުގައި ތިބި ޗައިނާ ރައްޔިތުންނަށް ފާރަލުމަށް ޗައިނާ އިން ބޭނުން ކުރާނެ މަރުކަޒަކަށް ވާނެ ކަމަށް އިންސާނީ ހައްޤު ތަކަށް މަސައްކަތް ކުރާ ޖަމްއިއްޔާ ތަކުން ގަބޫލުކުރެ އެވެ.