ރާއްޖޭގެ އިގްތިޞާދު ރަނގަޅުކަމަށް ބުނެ މިނިސްޓަރ ސައީދު އިތުރުފުޅު ހައްދަވައިފި
ރާއްޖޭގެ ޖުމްލަ އާމްދަނީ ދަށްވި އިރު ޓެކްސް އާއި ޓެކްސް ނޫން އާމްދަނީތައް ވެސް ވަނީ ދަށްވެފަ
މިނިސްޓަރ ސައީދު
ރާއްޖޭގެ އިގްތިސާދު ރަނގަޅު ކަމަށް ބުނެ އިކޮނޮމިކް މިނިސްޓަރ މުހައްމަދު ސައީދު އިތުރުފުޅުހައްދަވައިފިއެވެ.
ސައީދު އެފަދައިން ވިދާޅުވީ އަންގާރަ ދުވަހު ބޭއްވި ނޫސްވެރިންގެ ބައްދަލުވުމެއްގައެވެ.
މިދިޔަ އަހަރުގެ ޖެނުއަރީ މަހު މީރާއިން ބަލައިގަތް އާމްދަނީއަށްވުރެ މިއަހަރުގެ ޖެނުއަރީމަހު މީރާއިން ބަލައިގަތް އާމްދަނީ 7.7 އިންސައްތަ ދަށަށް ވަނީ ގޮސްފައެވެ. ޖަނަވަރީ 2025 ގައި މީރާއިން ބަލައިގަނެފައިވާ ޖުމުލަ އާމްދަނީ އަކީ 3.34 ބިލިއަން ރުފިޔާއެވެ. މި އަދަދަކީ ވޭތުވެދިޔަ އަހަރުގެ މި މުއްދަތުގައި ލިބުނު އާމްދަނީއަށްވުރެ 7.7 އިންސައްތަ ދަށް އަދަދެކެވެ.
މީގެ އިތުރުން ދިވެހި ދައުލަތުގެ އާމްދަނީ ވަރަށް ބޮޑަށް ދަށަށް ހިނގައްޖެ ކަމަށާއި އެކަމާ ވަރަށް ބޮޑަށް ކަންބޮޑުވެ ވަޑައިގަންނަވާ ކަމަށް ދިއްގަރު ދާއިރާގެ މެމްބަރު އަދި މަޖިލީހުގެ ނައިބު ރައީސް އަހުމަދު ނާޒިމް ވެސް ވަނީ ދާދި ފަހުން ވިދާޅުވެފައެވެ. އެހެންކަމުން އިގްތިޞާދީ ރަނގަޅު ފިޔަވަޅުތަކެއް ނޭޅޭތީ އިސްތިއުފާދެއްވަނީ ކޮން އިރަކުންތޯ ރާއްޖެއެމްވީން ވާނީ ސުވާލުކޮށްފައެވެ.
އެހެންނަމަވެސް އާމްދަނީ ދަށްވާ ސަބަބު އިކޮނޮމިކް މިނިސްޓަރ މުހައްމަދު ސައީދަށް ބުނެއެއް ނުދެވުނެވެ. އަދި ނާޒިމްގެ ވާހަކަތަކާއި މެދު އެއްޗެއް ދަންނަވަން ނޭނގޭ ކަމަށް ސައީދު ވަނީ ވިދާޅުވެފައެވެ.
އެހެންނަމަވެސް ރާއްޖޭގެ އިގްތިސާދު ރަނގަޅުކަމަށް ސައީދު ވިދާޅުވިއެވެ. އާމްދަނީ ދަށްވި ސަބަބަށް އަލިއަޅުވާލުމުގެ ބަދަލުގައި ވަޒީރު ވަނީ މި އަހަރު އިގްތިޞާދީ ގޮތުން 6.4 % އިގެ ކުރިއެރުމެއް ލިބޭނެ ކަމަށް ފާހަގަކުރައްވާ އެ މަގުން ވާހަކަތައް ބައްޓަންކުރައްވާފައެވެ.
ލަފާކުރާ ފިގަރ އެއް އެއީ 6.4% ނަމަ ދެން ކުއަރޓަރލީ މެޝާ ކުރަނީ. ކުރިއަރާނެ ކަމަށް ބެލެވެނީ. އެކަމަށް ބަރޯސާ ވާން ޖެހެނީ އެމްއެމްއޭ އަށް.އިކޮނޮމިކް މިނިސްޓަރ މުހައްމަދު ސައީދު
ސައީދު މިހެން ވިދާޅުވެފައިވާ އިރު ސަރުކާރުގެ އިސް ފަރާތްތަކުން ވެސް ދަނީ ރާއްޖޭގެ އިގްތިސާދު އޮތީ ނާޒުކު ފައްތަރެއްގައި ކަމަށް އެކި ޕްލެޓްފޯމްތަކުގައި ފާހަގަކުރަމުންނެވެ. އެހެންކަމުން ސައީދުގެ ވާހަކަ އާއި ސަރުކާރުގެ ބައެއް ފަރާތްތަކުގެ ވާހަކަ އާއި ދިމާނުވާކަން ފާހަގަކޮށްލެވެއެވެ.
އިގްތިޞާދު ރަނގަޅުކަމަށް ސައީދު ވިދާޅުވި ނަމަވެސް ފިނޭންސް މިނިސްޓްރީގެ ތަފާސްހިސާބުތައް ދައްކާގޮތުން މިދިޔަ މަހެއްހާ ދުވަހުގެ ތެރޭގައި ދައުލަތަށް ވަތް އާމްދަނީ ވަނީ 19% ދަށްވެފައެވެ. އަދި ރާއްޖޭގެ ޖުމްލަ އާމްދަނީ ދަށްވި އިރު ޓެކްސް އާއި ޓެކްސް ނޫން އާމްދަނީތައް ވެސް ވަނީ ދަށްވެފަ އެވެ.
މީގެ އިތުރުން ޗައިނާ އާއި އެކު ޤާއިމްކުރި މިނިވަން ވިޔަފާރީގެ އެއްބަސްވުމުގެ ސަބަބުން އިމްޕޯޓް ޑިއުޓީ ދަށް ނުވާކަމަށް ބުނެ މީގެ ކުރިން އެހެން ޕްލެޓްފޯމްތަކުގައި ދައްކާފައިވާ ވާހަކަ ވަޒީރު ވަނީ ތަކުރާރުކުރައްވާފައެވެ. އެގޮތުން މި އަހަރު މިހާތަނަށް އިމްޕޯޓު ޑިއުޓީގެ ގޮތުގައި ދައުލަތަށް ލިބުނު އާމްދަނީ ދަށަށް ދިޔައީ ޗައިނާއާއެކު ހަދާފައިވާ ފްރީ ޓްރޭޑް އެގްރީމެންޓް (އެފްޓީއޭ) ގެ ސަބަބުން ކަމަށް އިގްތިސާދާއި މާލީ ކަންކަން ދިރާސާކުރާ ފަރާތްތަކުން ބުނި ނަމަވެސް އެކަމަށް ސައީދު ވަނީ އިންކާރުކުރައްވާފައެވެ.
