ދުނިޔޭގެ ތާރީޚުގައި ގައުމަކަށް ލިބުނު އެންމެ ބޮޑު ވިޔަފާރީގެ ފައިދާ ޗައިނާ އިން ހޯދައިފި

އެމެރިކާގެ ރައީސް ޑޮނަލްޑް ޓްރަމްޕް ކަނޑައެޅުއްވި ޓެރިފްތަކާއި ވިޔަފާރީގެ ސިޔާސަތުތަކުގެ ސަބަބުން ދުނިޔޭގެ އިގްތިސާދަށް ލޮޅުންތަކެއް އެރި 2025 ވަނަ އަހަރު، ޗައިނާގެ އެކްސްޕޯޓް ރެކޯޑް މިންވަރަކަށް އިތުރުވެފައިވާކަން އެ ގައުމުން ހާމަކޮށްފި އެވެ.

ބުދަ ދުވަހު ބެއިޖިންގްއިން އާންމުކުރި ތަފާސްހިސާބުތަކަށް ބަލާއިރު، ދުނިޔޭގެ ތާރީޚުގައި ވެސް ގައުމަކުން ހޯދި އެންމެ ބޮޑު ވިޔަފާރީގެ ފައިދާ (ޓްރޭޑް ސާޕްލަސް) ޗައިނާ އިން ވަނީ ހޯދާފަ އެވެ. އެއީ 1.19 ޓްރިލިއަން އެމެރިކާ ޑޮލަރެވެ. މިއީ ޗައިނާގެ މުޅި އަހަރުގެ ވިޔަފާރީގެ ފައިދާ 1 ޓްރިލިއަން ޑޮލަރަށްވުރެ މައްޗަށް ދިޔަ ފުރަތަމަ ފަހަރެވެ. މީގެ ކުރިން އެންމެ މަތީ ރެކޯޑެއްގެ ގޮތުގައި އޮތީ 2024 ވަނަ އަހަރު ލިބުނު 993 ބިލިއަން ޑޮލަރެވެ.

ނިމިދިޔަ އަހަރުގެ ހަތް މަހެއްގައި ޗައިނާގެ މަހުން މަހަށް ލިބޭ ވިޔަފާރީގެ ފައިދާ 100 ބިލިއަން ޑޮލަރަށްވުރެ މައްޗަށް ގޮސްފައިވެ އެވެ. މިއީ ޓްރަމްޕްގެ ޓެރިފް ސިޔާސަތުތަކުގެ ސަބަބުން ދުނިޔޭގެ އެހެން ގައުމުތަކާއެކު ޗައިނާއިން ކުރާ ވިޔަފާރިއަށް މާބޮޑު އަސަރެއް ކޮށްފައި ނުވާކަމުގެ ހެއްކެކެވެ. އެމެރިކާ އާއެކު ކުރާ ވިޔަފާރި ކޮންމެ ވެސް ވަރަކަށް ދަށަށް ދިޔަ ނަމަވެސް، ދެކުނު އިރުމަތީ އޭޝިއާ، އެފްރިކާ އަދި ލެޓިން އެމެރިކާގެ ގައުމުތަކަށް ޗައިނާއިން ކުރާ އެކްސްޕޯޓް ވަނީ ބޮޑުތަނުން އިތުރުވެފަ އެވެ.

ޗައިނާގެ ކަސްޓަމްސްގެ ޑެޕިއުޓީ ޑައިރެކްޓަރު ވަންގް ޖުން ބުދަ ދުވަހު ބޭއްވި ނޫސްވެރިންގެ ބައްދަލުވުމެއްގައި ވިދާޅުވީ، ދުނިޔޭގެ ވިޔަފާރި އަށް އަންނަމުންދާ ބޮޑެތި ބަދަލުތަކާއި ގޮންޖެހުންތަކަށް ބަލާއިރު، މިއީ ވަރަށް އާދަޔާޚިލާފު އަދި ބުރަ މަސައްކަތުން ހޯދާފައިވާ ނަތީޖާއެއް ކަމަށެވެ. އަދި ތިމާވެއްޓާ ރައްޓެހި ޓެކްނޮލޮޖީ އާއި، އާޓިފިޝަލް އިންޓެލިޖެންސް އާ ގުޅުންހުރި އުފެއްދުންތަކުގެ އިތުރުން ރޮބޮޓިކްސްގެ ދާއިރާ އިން ކުރާ އެކްސްޕޯޓް އިތުރުވެފައިވާކަން އޭނާ ފާހަގަކުރެއްވި އެވެ.

މި ބޮޑު ކުރިއެރުމުގެ މައިގަނޑު ސަބަބަކީ ދެކުނު އޭޝިއާ، އެފްރިކާ އަދި ޔޫރަޕްގެ ގައުމުތަކުގައި ޗައިނާގެ މުދަލަށް އޮތް ޑިމާންޑް އިތުރުވުމެވެ. އަނެއްކޮޅުން ޗައިނާގެ އިގްތިސާދަށް ވަނީ ރިއަލް އެސްޓޭޓްގެ މައްސަލަތަކާއި ދަރަނި އިތުރުވުމުގެ ސަބަބުން ހީނަރުކަމެއް އައިސްފަ އެވެ. މީގެ ސަބަބުން ވިޔަފާރިވެރިން އިންވެސްޓްކުރުމަށް ފަސްޖެހި، އާންމުން ޚަރަދުކުރުމުގައި ސަމާލުވެފައިވެއެވެ. ނަތީޖާއެއްގެ ގޮތުން، ބޭރުން މުދާ އެތެރެކުރާ މިންވަރު (އިމްޕޯޓް) އިތުރުވެފައި ވަނީ އެންމެ 0.5 އިންސައްތަ އެވެ.

ހަމައެއާއެކު، ޗައިނާގެ ފައިސާ (ޔުއާން) ގެ އަގު ދަށްވުމާއި، ހުޅަނގުގެ ގައުމުތަކުގައި ތަކެތީގެ އަގު އުފުލިފައިވުމުން، ޗައިނާގެ އުފެއްދުންތަކަށް އޮތް ޝައުގުވެރިކަން ވަނީ އިތުރުވެފައެވެ.

ޗައިނާގެ އުފެއްދުންތަކާއި ޚިދުމަތްތައް ދުނިޔޭގެ ވިޔަފާރީގެ ނިޒާމުގެ ތެރެއަށް ވަރަށް ބޮޑަށް ވަދެފައިވާތީ، 2026 ވަނަ އަހަރު ވެސް މި ކާމިޔާބީ ދެމިއޮންނާނެ ކަމަށް ތަޖުރިބާކާރުން ލަފާ ކުރެ އެވެ.