ޗައިނާގެ ރައީސް ޝީ ގެ އަރިސް އަދި އަސްކަރިއްޔާގެ އެންމެ މަތީ ފަންތީގެ ޖެނެރަލެއްގެ މައްސަލަ ތަހުގީގުކުރަން ފަށައިފި

ޗައިނާގެ އަސްކަރިއްޔާގެ އެންމެ މަތީ ފަންތީގެ ޖެނެރަލެއްގެ މައްސަލަ ތަހުގީގުކުރަން ފަށައިފި އެވެ.

ޗައިނާގެ ދިފާއީ ވުޒާރާއިން ހާމަކުރި ގޮތުގައި، އެ ގައުމުގެ އަސްކަރިއްޔާ ގައި ހިމެނޭ އެންމެ މަތީ ފަންތީގެ ޖެނެރަލްގެ މައްޗަށް "އަޚުލާގީ އަދި ގާނޫނީ  އުސޫލުތަކާ ޚިލާފުވުމުގެ" ބޮޑެތި ތުހުމަތުތަކެއް ކޮށް، އޭނާގެ މައްސަލަ ތަހުގީގު ކުރަން ވަނީ ފަށާފައެވެ.

ރައީސް ޝީ ޖިންޕިންގެ އަސްކަރީ އެންމެ ގާތް އެކުވެރިޔާގެ ގޮތުގައި ބެލެވޭ ޖެނެރަލް ޒަންގް ޔޯޝިއާގެ މައްޗަށް ކުރެވޭ ތުހުމަތުތަކުގެ އިތުރު ތަފްސީލެއް އެ ވުޒާރާއިން ހާމައެއް ނުކުރެ އެވެ. ނަމަވެސް، ޗައިނާގެ ސިޔާސީ މާހައުލުގައި މިފަދަ ތުހުމަތުތަކަކީ އާންމުކޮށް ކޮރަޕްޝަނަށް ނިސްބަތްކޮށް ބޭނުންކުރާ ބަސްމަގެއް ކަން ފާހަގަ ކުރެވެ އެވެ.

ދިފާއީ ވުޒާރާގެ ބަޔާނުގައި ބުނެފައިވާ ގޮތުގައި، އަސްކަރިއްޔާގެ އިސް އެހެން އޮފިސަރެއް ކަމަށްވާ ޖެނެރަލް ލިއު ޒެންލީގެ މައްސަލަ ވެސް މިހާރު ދަނީ ތަހުގީގު ކުރަމުންނެވެ.

މި ދެ މީހުންގެ މައްސަލަ ބަލަން މި ފެށީ، މިދިޔަ އޮކްޓޯބަރު މަހު އަސްކަރިއްޔާގެ އިސް ނުވަ ޖެނެރަލަކު މަގާމުން ވަކިކުރުމާ ގުޅިގެންނެވެ. މިއީ ފާއިތުވި ދިހަވަރަކަށް އަހަރު ތެރޭގައި ޗައިނާގެ އަސްކަރިއްޔާގެ ތެރޭގައި ހިންގާ މިފަދަ އެންމެ ބޮޑު ހަރަކާތެވެ.

އުމުރުން 75 އަހަރުގެ ޒަންގް އަކީ ސެންޓްރަލް މިލިޓަރީ ކޮމިޝަން (ސީ.އެމް.ސީ) ގެ ވައިސް ޗެއާމަނެވެ. މިއީ ރައީސް ޝީ އިސްވެ ހުންނަވައި، ގައުމުގެ ހަތިޔާރު އެޅި ސިފައިން ކޮންޓްރޯލް ކުރާ ކޮމިއުނިސްޓް ޕާޓީގެ އެންމެ މަތީ ގޮތްޕެވެ. މީގެ އިތުރުން ޒަންގް އަކީ ޕާޓީގެ އެންމެ މަތީ ނިންމުންތައް ނިންމާ 24 މެންބަރުންގެ މައްޗަށް އެކުލެވޭ ޕޮލިޓިބިއުރޯގެ މެންބަރެއް ވެސް މެއެވެ.

ޒަންގްގެ ބައްޕައަކީ ޗައިނާގެ ކޮމިއުނިސްޓް ޕާޓީ އުފެއްދުމުގައި އިސްކޮށް އުޅުނު ޖެނެރަލުންގެ ތެރެއިން ފަރާތެކެވެ. 1968 ވަނަ އަހަރު އަސްކަރިއްޔާއާ ގުޅުނު ޒަންގް އަކީ، ހަނގުރާމައިގެ އަމަލީ ތަޖުރިބާ ލިބިފައިވާ މަދު އިސް ލީޑަރުންގެ ތެރެއިން އެކެކެވެ. އާންމުކޮށް ރިޓަޔަރ ކުރަން ޖެހޭ އުމުރަށްވުރެ ގިނަ ދުވަހު އޭނާ މަގާމުގައި ބެހެއްޓެވުމުން ދޭހަވަނީ، މިހާތަނަށް ރައީސް ޝީ އޭނާ އަށް ކުރެއްވި އިތުބާރު ބޮޑުކަމެވެ.

މި އިއުލާން ނެރެފައި މިވަނީ، މިދިޔަ ޑިސެމްބަރު މަހު ބޭއްވި ޕާޓީގެ މަތީ ފަންތީގެ ބައްދަލުވުމަކުން ޒަންގް އަދި ލިއު ފެނިފައި ނުވާތީ، އެ ދެ ފަރާތުގެ މައްސަލަ ބަލަމުންދާ ކަމަށް ދެކެވުނު ވާހަކަތަކަށް ފަހުގަ އެވެ.

ރައީސް ޝީ ވެރިކަމަށް ވަޑައިގަތީއްސުރެ، ތަފާތު އެކި ދާއިރާތަކުން ކޮރަޕްޝަން ނައްތާލުމަށް ބޮޑެތި މަސައްކަތްތަކެއް ކުރައްވަމުން ގެންދަވާއިރު، ފަހަކަށް އައިސް މި ހަރަކާތްތައް ވަނީ އަސްކަރިއްޔާ އަށް ވަރަށް ބޮޑަށް އަމާޒުކޮށްފަ އެވެ. ރައީސް ޝީ ވަނީ ކޮރަޕްޝަނަކީ ކޮމިއުނިސްޓް ޕާޓީއަށް އޮތް "އެންމެ ބޮޑު ނުރައްކާ" ކަމަށް ސިފަކުރައްވައި، އެކަމާ ދެކޮޅަށް ކުރާ މަސައްކަތަކީ "ނާޒުކު އަދި އުނދަގޫ" މަސައްކަތެއް ކަމަށް ވިދާޅުވެފަ އެވެ.

މި ސިޔާސަތަށް ތާއީދުކުރާ ފަރާތްތަކުން ބުނަނީ މިއީ ހެޔޮ ވެރިކަމެއް ގާއިމުކުރުމަށް ކުރެވޭ މަސައްކަތެއް ކަމަށެވެ. ނަމަވެސް، ބައެއް ފަރާތްތަކުން ގަބޫލުކުރާ ގޮތުގައި މިއީ ސިޔާސީ ވާދަވެރިން މަގާމުތަކުން ދުރުކުރުމަށް ބޭނުންކުރާ އުކުޅެކެވެ.

ޒަންގް އަދި ލިއުގެ މައްސަލަ ބަލަން ފެށުމާއެކު، ސީ.އެމް.ސީގެ އަސްލު ހަތް މެންބަރުންގެ ތެރެއިން މިހާރު މަގާމުގައި ތިއްބެވީ އެންމެ ދެ ބޭފުޅުންނެވެ. އެއީ ކޮމިޝަންގެ ޗެއާމަން ރައީސް ޝީ އާއި، އަސްކަރިއްޔާގެ އަޚުލާގީ ކަންކަން ބަލަހައްޓާ ޒަންގް ޝެންގްމިން އެވެ.