ދަރިވަރުންގެ ކުރިމަތީގައި ރައީސް މުޢިއްޒުގެ އެޑިއުކޭޝަން މިނިސްޓަރު ސިޔާސީގޮތުން ޗެލެންޖު ކުރައްވައިފި

ޝަހީދު އަލީ ސްކޫލް ހުޅުވުމުގެ ރަސްމިއްޔާތުގައި ރައީސް ޑރ. މުހައްމަދު މުޢިއްޒުގެ އެޑިއުކޭޝަން މިނިސްޓަރު ޑރ. އިސްމާއީލް ޝަފީއު ދަރިވަރުންގެ ކުރިމަތީގައި ސިޔާސީގޮތުން ޗެލެންޖު ކުރައްވައިފި އެވެ. 

ދިރާސީ އައު އަހަރާއި ދިމާކޮށް ޝަހީދު އަލީ ސްކޫލް ހުޅުވުމުގެ ރަސްމިއްޔާތުގައި މިނިސްޓަރު އިސްމާއިލް ޝަފީއު ވިދާޅުވީ ކަންކަން ރާވައި، ހިންގައި، ތަންފީޒުވުމުން އެ ކަމުގެ ކްރެޑިޓް ނަގަން ބަޔަކު މަސައްކަތްކުރި ނަމަވެސް އެ ކަމާމެދު އެއްވެސް ކަންބޮޑުވުމެއް ނެތްކަމަށެވެ. މިނިސްޓަރު މިފަދައިން ދަރިވަރުންގެ ކުރިމަތީ ވިދާޅުވީ އެ ސްކޫލަކީ މިދިޔަ އެމްޑީޕީ ވެރިކަމުގެ ތެރޭ ކުރެވުނު މަސައްކަތުގެ ނަތީޖާކަމަށް އޭރުގެ އެޑިއުކޭޝަން މިނިސްޓްރީގެ އިސް ވެރިން ސިފަކުރެއްވުމުން އެކަމަށް ރައްދު ދެއްވުމުގެ ގޮތުންނެވެ. 

ކަންކަން ރާވާލީމައާއި، ކަންކަން ހިނގީމައާއި، ކަންކަން ތަންފީޒުވަމުންދާތަން ފެނުނީމާ އެކަމުގެ ކްރެޑިޓް ނަގާ ފަރާތްތައް ތިބޭނެ.

އެޑިއުކޭޝަން މިނިސްޓަރު ޑރ. އިސްމާއީލް ޝަފީއު

ރައީސް މުޢިއްޒު ގެ އެޑިއުކޭޝަން މިނިސްޓަރު އެފަދައިން ދަރިވަރުންގެ ސިޔާސީ ވާހަކަ ދެއްކެވުމާއި ގުޅިގެން ގިނަ ބައެއްގެ ފާޑުކިއުން ވަނީ އަމާޒުވެފަ އެވެ. ބައެއް އަންމު ފަރާތްތަކުން ވަނީ ފާހަގަކުރި ގޮތުގައި އެފަދަ ހަފްލާއެއްގައި އެތަށް ދަރިވަރުންނެއް ކުރިމަތީ ސިޔާސީ ވާހަކަ ދެއްކުމަކީ ބަލައިގަނެވޭނެ ކަމެއް ނޫން ކަމަށެވެ. 

މީގެ އިތުރުން ޝަހީދު އަލީ ސްކޫލް ހުޅުވުމަށްފަހު ދަރިވަރުންގެ އަތަށް ދިން ކަރުދާހުގައި ރައީސުލްޖުމްހޫރިއްޔާ ގެ ފޮޓޯ ޖަހައި، އެ ތަނުގެ ބިންގާ އަޅުއްވައިދެއްވީ އެމަނިކުފާނު ކަމަށް ލިޔެފައިވެ އެވެ. އަދި ‏އެއީ ދަރިވަރުންނާ އެއްވެސް ގުޅުމެއް ހުރިކަމަކަށް ވެސް ނޫނެވެ. މީގެ ކުރިން ވެސް އެކި ވެރިކަމުގައި އެތައް ސްކޫލެއް ވަނީ ހުޅުވާފަ އެވެ. އެހެން ނަމަވެސް ވެރިންގެ ކިބައިން މިފަދަ އަމުލަތައް ފެނުން މިއީ ފުރަތަމަ ފަހަރެވެ.