ނިންމާދޭނެ ކަމުގެ ޔަގީންކަން ރައީސް މުއިއްޒު ދެއްވި ހެނބަދޫ ޓަރފް ދަނޑުގެ މަސައްކަތް 9 މަސް ވީއިރުވެސް ނުފަށާ!

ނ. ހެނބަދޫގައި އަޅާ ނިންމާނެ ކަމަށް ރައީސް ޑރ. މުހައްމަދު މުއިއްޒު ވައުދުވެވަޑައިގެން ޔަގީންކަން ދެއްވި ޓަރފް ދަނޑުގެ އެއްވެސް މަސައްކަތެއް 9 މަސް ދުވަސް ވީއިރުވެސް ކޮށްފައި ނުވާ ކަމަށް އެ ރަށު ކައުންސިލްގެ ރައީސް ހުސައިން އަބޫބަކުރު ވިދާޅުވެއްޖެ އެވެ. 

ރައީސް މުއިއްޒު ހެނބަދޫއަށް 2025 ވަނަ އަހަރުގެ ޖުލައި މަހު ވަޑައިގަތުމުން އެ ރަށު ޒުވާނުން ވަނީ އެ ރަށުގައި ޓަރފް ދަނޑެއް ނެތުމުގެ ކަންބޮޑުވުން ރައީސް އާ ހިއްސާ ކުރައްވާފަ އެވެ. އަދި އެ ރަށުގައި ދަނޑެއް އަޅައިދެއްވުމަށް އެ ރަށު ޒުވާނުން ވަނީ ރައީސް އަރިހުން އެދިފަ އެވެ. 

އެކަމާ ގުޅިގެން ރާއްޖެޓީވީ އާ ވާހަކަ ދައްކަވަމުން ހުސައިން އަބޫބަކުރު ވިދާޅުވީ ކޮންމެ ރަށެއްގައި ވެސް ޒުވާނުންނަށް ޓަރފް އަޅާފަ އޮންނަ ފުޓުބޯޅަ ދަނޑެއް ވަރަށް މުހިއްމު ކަމަށެވެ. ހެނބަދޫ ޒުވާނުން ވެސް ރައީސް އަރިހުން އެދުނީ އެ ދަނޑު ތަރައްގީ ކުރުމަކީ ޒުވާނުންނަށް މުހިއްމު ކަމަކަށް ވާތީ ކަމަށް އޭނާ ވިދާޅުވި އެވެ. 

ކައުންސިލް ރައީސް ވިދާޅުވީ އެ ދަނޑު ރަނގަޅު ފެންވަރަކަށް ހަދައި މަސައްކަތް ނިންމާނެ ކަމުގެ ޔަގީންކަން ރައީސް މުއިއްޒު އެ ރަށުގެ ރައްޔިތުންނަށް ދެއްވި ކަމަށެވެ. ހުސައިން އަބޫބަކުރު ވިދާޅުވީ ރައީސް އެ ޔަގީންކަން ދެއްވުމުން ޒުވާނުންނާ މަޝްވަރާ ކުރުމަށްފަހު ދަނޑު ތަރައްގީ ކުރަން ބޭނުންވާ ކުރެހުން ވެސް ފޮނުވާފައި ވާ ކަމަށާ އަދިވެސް ސަރުކާރުން އެކަމަށް އެދެވޭ ޖަވާބެއް ދީފައި ނުވާ ކަމަށެވެ.

އެގޮތުން 9 މަސް ދުވަސް ވީއިރުވެސް އެއްވެސް މަސައްކަތެއް އެތަނުގައި ކޮށްފައި ނުވާ ކަމަށާ ކައުންސިލާ ވެސް އެކަމުގެ އެއްވެސް މައުލޫމާތެއް ހިއްސާ ކޮށްފައި ނުވާ ކަމަށް ވެސް އޭނާ ވިދާޅުވި އެވެ. 

ސަރުކާރުން އެ މަސައްކަތް ވީ އެންމެ އަވަހަކަށް ނިންމައި ދިނުމަކީ ރަށު ރައްޔިތުންގެ ވަރަށް ބޮޑު އެދުމެއް ކަމަށް ކައުންސިލް ރައީސް ވިދާޅުވި އެވެ. ރައީސް މުއިއްޒުގެ ވެރިކަމުގެ ފުރަތަމަ ދެ އަހަރު ފާއިތުވެގެން ގޮސްފައިވާއިރު، ހެނބަދޫގައި ތަރައްގީގެ އެއްވެސް މަޝްރޫއެއް އެކަށީގެންވާ ގޮތަށް ނުހިނގާކަމަށް އެރަށު ރައްޔިތުން ބުނެ އެވެ.