ސްކޫލުތައް އޭސީ ކުރުން: ވައުދުވީ މިދިއަ ސެޕްޓެމްބަރަށް ނިންމަން، 4 މަސް ފަހުން ދިރާސީ އައު އަހަރު ފެށިއިރު ވެސް ވައުދު ނުފުއްދޭ
2026 ވަނަ އަހަރުގެ ދިރާސީ އަހަރު 80،000 އަށްވުރެ ގިނަ ދަރިވަރުންނާއެކު 219 ސްކޫލެއްގައި ފަށާފައިވާއިރު 4،790 ދަރިވަރުން އަލަށް ގްރޭޑް 1 ގައި ކިޔަވަން ވަނީ އެދިފަ. ބައެއް ދަރިވަރުންނަށް ފޮތްތައް އަދި ހަމަނުވާކަން ބެލެނިވެރިން ފާހަގަކުރޭ. ކޫލް ސްކޫލް ޕްރޮޖެކްޓްގެ ދަށުން ސްކޫލްތަކުގައި އޭސީ ހަރުކުރުމުގެ ވައުދު 2025 ސެޕްޓެމްބަރު ކުރިން ނިންމާނެ ކަމަށް ބުނި ނަމަވެސް 4 މަސް ފަހުން އަދި ފުއްދާފައި ނުވާތީ ސަރުކާރަށް ފާޑުކިޔުން ވަނީ އަމާޒުވެފަ.
ތައުލީމީ ވަޒީރު ޑރ.އިސްމާއިލް ޝަފީއު | ޕީއެސްއެމް
އެޑިއުކޭޝަން މިނިސްޓްރީގެ "ކޫލް ސްކޫލް" ޕްރޮޖެކްޓްގެ ދަށުން ރާއްޖޭގެ ހުރިހާ ސަރުކާރު ސްކޫލެއްގެ ކްލާސްރޫމްތަކުގައި އޭސީ ހަރުކުރުމުގެ މަސައްކަތް 2025 ވަނަ އަހަރުގެ ސެޕްޓެމްބަރު މަހުގެ ކުރިން ނިންމަން ބުނި ނަމަވެސް އޭގެ 4 މަސް ފަހުން 2026 ވަނަ އަހަރުގެ ދިރާސީ އަހަރު ފެށުނު އިރު ވެސް އެ ވައުދު ފުއްދާފައިނުވާތީ ބެލެނިވެރިންގެ ފާޑުކިއުން މި ސަރުކާރަށް އަމާޒު ވެއްޖެ އެވެ.
80،000 އަށް ވުރެ ގިނަ ދަރިވަރުންނާ އެކު 2026 ވަނަ އަހަރުގެ ދިރާސީ އަހަރު ފަށާފައި ވަނީ އަންގާރަ ދުވަހުގަ އެވެ. 219 ސްކޫލެއްގައި ކިޔަވައިދޭން ފަށާފައިވާއިރު 4،790 ދަރިވަރުން ވަނީ މި އަހަރު އަލަށް ސަރުކާރު ސްކޫލުތަކު ގައި ގްރޭޑް 1 ގައި ކިޔަވަން އެދިފަ އެވެ. އޭގެ ތެރޭގައި ހިމެނެނީ މާލެ ސަރަހައްދުގެ ސްކޫލުތަކަށް ވެއްދި 1748 ދަރިވަރުންނާއި އަތޮޅުތަކުން އަލަށް ގްރޭޑް އެކަކަށް ވެއްދި 3042 ދަރިވަރުންނެވެ.
މިނިސްޓްރީން ބުނީ، މިއަހަރު އަތޮޅުތަކުން މާލޭގެ ސްކޫލްތަކަށް 1530 ދަރިވަރަކު ބަދަލުވެފައިވާ ކަމަށާއި، މާލެއިން ހުޅުމާލޭގެ ސްކޫލްތަކަށް 836 ދަރިވަރުން ބަދަލުވެފައިވާ ކަމަށެވެ.
ދިރާސީ އަހަރުގެ ކިޔެވުން ފެށުނު އިރު އަދިވެސް ބައެއް ސްކޫލްތަކުގެ ދަރިވަރުންނަށް ފޮތްތައް ހަމަނުވާތީ އެކަމުގެ ޝަކުވާ ބެލެނިވެރިން ދަނީ ކުރަމުންނެވެ. އަތޮޅު ތެރެއާއި މާލޭ ގެ ސްކޫލުތަކު ގައި ކިޔަވާ ދަރިވަރުންނަށް ފޮތް ލިސްޓަށް ފޮތް ހަމަނުވާ މައްސަލައިގައި ބެލެނިވެރިން ކަންބޮޑުވުން ފާޅުކުރަމުންދާއިރު ބައެއް ދަރިވަރުންނަށް ދިވެހި އިސްލާމް ފޮތް ނުލިބޭ ކަން ވެސް ބައެއް ބެލެނިވެރިން ފާހަގަކުރެ އެވެ.
ފޮތް ތަކުގެ އިތުރުން އެޑިއުކޭޝަން މިނިސްޓްރީގެ "ކޫލް ސްކޫލް" ޕްރޮޖެކްޓްގެ ދަށުން ރާއްޖޭގެ ހުރިހާ ސަރުކާރު ސްކޫލެއްގެ ކްލާސްރޫމްތަކުގައި އޭސީ ހަރުކުރުމަށް ވީ ވައުދު އަދިވެސް ފުއްދާފައި ނުވާތީ އެކަމާ ގުޅިގެން ވެސް ބެލެނިވެރިން ގެ ފާޑުކިއުން ވަނީ މި ސަރުކާރަށް އަމާޒުވެފަ އެވެ.
އެޑިއުކޭޝަން މިނިސްޓަރު ޑރ. އިސްމާއިލް ޝަފީއު އޭރު ވިދާޅުވެފައި ވަނީ 2025 ވަނަ އަހަރުގެ ސެޕްޓެމްބަރު މަހުގެ ކުރިން ހުރިހާ ސްކޫލުތަކެއްގެ ކްލާސްރޫމުތަކުގައި އޭސީ ހަރުކޮށް ނިންމުމަކީ މި ސަރުކާރުގެ އަމާޒެއް ކަމަށެވެ.
ނަމަވެސް ސެޕްޓެމްބަރު މަސް ނިމުނު އިރުވެސް އެ ވައުދު މި ސަރުކާރުން ފުއްދާފައި ނުވާއިރު އޭގެ ފަހުން 4 މަސް ފާއިތުވެ 2026 ވަނަ އަހަރުގެ ދިރާސީ އަހަރު ފެށުނު އިރު ވެސް އެ ވައުދު ފުއްދާފައި ނުވާތީ ގިނަ ބަޔަކު ދަނީ ސަރުކާރަށް ވަރަށް ބޮޑަށް ފާޑުކިޔަމުންނެވެ.
