ހާލު ކިހިނެއް؟ - ނ.ވެލިދޫ: ރައީސް މުއިއްޒު ދައްކަވާ ވާހަކަ އާއި އަމަލާއި ދިމާ ނުވެ ރައްޔިތުން މާޔޫސްކަމުގައި!
ނ.ވެލިދޫ ރައްޔިތުން ރާއްޖެ ޓީވީގެ ހާލު ކިހިނެތް ޕްރޮގްރާމްގައި ރައީސް މުއިއްޒުގެ ވެރިކަމާ މެދު ނުތަނަވަސްކަން ފާޅުކުރި. ރައްޔިތުން ކަންބޮޑުވި ބޮޑެތި ކަންތައްތަކުގެ ތެރޭގައި ތަކެތީގެ އަގު އިންތިހާ އަށް ބޮޑުވުމާއި ކަރަންޓު ބިލް އިތުރުވުމާއި ދާއިމީ ބަލިތަކަށް ބޭސް ނުލިބުން ހިމެނޭ.
ނ.ވެލިދޫ ހާލު ކިހިނެތް ޕްރޮގްރާމްގެ ތެރެއިން | ރާއްޖެ އެމްވީ
ރައީސް ޑރ.މުހައްމަދު މުއިއްޒު ދައްކަވާ ވާހަކަ އާއި އަމަލާއި ދިމާ ނުވެ ރައްޔިތުން ތިބީ މާޔޫސްވެފައި ކަމަށް ނ.ވެލިދޫ ގެ ރައްޔިތުން ބުނެފި އެވެ.
ވެލިދޫ ރައްޔިތުން އެހެން ބުނެފައި ވަނީ ރާއްޖެ ޓީވީ ގެ ހާލު ކިހިނެއް ޕްރޮގްރާމްގައި ވާހަކަދައްކަމުންނެވެ. އެ ރައްޔިތުން ވަނީ މިހާރު ވެރިކަން ކުރާ ގޮތާއި މެދު ނުތަނަވަސްވުންތައް ހުރިކަން ހާމަކޮށްފަ އެވެ.
އާއްމުން ފާޅުކުރި ކަންބޮޑުވުންތަކުގެ ތެރޭގައި ތަކެތީގެ އަގު ބޮޑުވުމާއި، ބޭސް ނުލިބުމާއި ރަށަށްޓަކާ ވެފައިވާ ވައުދުތައް ނުފުއްދުމުގެ ކަންބޮޑުވުން ހިމެނެ އެވެ.
އެ ރަށުގެ ހަދީޖާ ކިޔާ މީހަކު ބުނީ ތަކެތީގެ އަގު އިންތިހާ އަށް ބޮޑު ކަމަށެވެ. އެންމެ ކުޑަ މިނުން ބިހުގެ އަގު ވެސް ބޮޑު ވުމުން އާއްމުންނަށް އިންތިހާ ދަތިތަކާއި ދިމާވަ ކަމަށް އޭނާ ވަނީ ބުނެފަ އެވެ. އަދި ގޭގައި އޭސީ އެއް ވެސް ނެތް ނަަމަވެސް ކަރަންޓު ބިލު އިންތިހާ އަށް ބޮޑު ކަމަށް އޭނާ ބުންޏެވެ.
މީގެ އިތުރުން ހުސްނާ ނަމަކަށް ކިޔާ އުމުރުން ދުވަސްވީ މީހަކު ބުނީ މި ވެރިކަން އައި ފަހުން ތަކެތީގެ އަގު އިންތިހާ އަށް ބޮޑު ކަމަށެވެ. އަދި ކަރަންޓު ބިލް ވެސް ވަރަށް ބޮޑު ކަމަށް އޭނާ ފާހަގަކުރި އެވެ. މީގެ އިތުރުން މުއިއްޒުގެ ވެރިކަމުގައި މުށުތެރެއަށް ހުރިހާ ބާރެއް ލައިގެން ވެރިކަން ކުރާ ކަމަށް އޭނާ ވަނީ ބުނެފަ އެވެ.
"މިހާރު މި އޮތީ ކަންކަން ގޯސްވެފައި. މީހުންނަށް ވެސް ބިރުން ނުކެރޭ އެއްޗެއް ބުނަން ވެސް." އޭނާ ވަނީ ބުނެފަ އެވެ.
އެ ރަށުގެ އިބްރާހިމް ކިޔާ މީހަކު ބުނީ މި ސަރުކާރު އައި ފަހުން އެއްވެސް ކަމެއް ރަނގަޅަށް ނުދާ ކަމަށެވެ. ދައުލަތް ހިނގާ ގޮތް އެއްވެސް ވަރަކަށް ކަމު ނުދާ ކަމަށް އޭނާ ވަނީ ބުނެފަ އެވެ. ލާ އަންނައުނާއި، ކާބޯތަކެތީގެ އަގު ވެސް އިންތިހާ އަށް ބޮޑުވެފައިވާ ކަަމަށް އޭނާ ވަނީ ބުނެފަ އެވެ. އޭނާ ބުނީ ކައުންސިލް އިންތިޚާބުގައި މި ސަރުކާރަށް މެޖޯރިޓީ ދީފި ނަމަ ކަންކަން އިތުރަށް ގޯހުން ގޯހަށް ދާނެ ކަމަށެވެ.
"ކަސްމަތި ޖަހާ ރޭޒަރު ތިލައިން ވެސް ދެ ރުފިޔާ އަގު ބޮޑުވެއްޖެ. ކިހިނެއް ދުނިޔޭގަ އުޅޭނީ؟ ޑޮލަރު ރޭޓު އަރައިފި 20،21 އަށް. މައްޗަށް ދާ ގޮތް ނޭނގިގެން މި އުޅެނީ،" އޭނާ ވަނީ ބުނެފަ އެވެ.
އެ ރަށުން ވާހަކަދެއްކި އިތުރު މީހަކު ވަނީ އެ ރަށަކީ ލޯކަލް ޓުއަރިޒަމް އިން ނަފާ ހޯދާ ބައެއް ކަމަށާއި އެކަމަށް ވެސް މި ސަރުކާރުން ހުރަސް އަޅަމުންދާ ކަމަށެވެ. ރަށްރަށަށް ފައިދާ ވާ ގޮތަށް އިގްތިސާދު ހިންގަން ވެސް ސަރުކާރަށް ނޭނގޭ ކަމަށް އޭނާ ވަނީ ބުނެފަ އެވެ.
"މި މީހުން ދަންނަނީ ހަމައެކަނި އެންމެ ވައްތަރެއްގެ ޓުއަރިޒަމް އެއް. ރަށުގެ ލޯކަލް ޓުއަރިޒަމް ވެސް ހަލާކުކޮށްފި." އޭނާ ވަނީ ބުނެފަ އެވެ.
އެ ރަށުން ވާހަކަ ދެއްކި އިތުރު މީހުން ވެސް ވަނީ އެ މީހުންގެ ކަންބޮޑުވުންތައް ހިއްސާކޮށްފަ އެވެ. އެ ރަށުން ވާހަކަދެއްކި އުމުރުން ދުވަސްވީ އަންހެނަކު ބުނީ ދާއިމީ ބަލިތަކަށް ލިބެން ޖެހޭ ބޭސް ލިބުމުގައި މި ސަރުކާރުގައި ވަރަށް ބޮޑު ދަތިތަކާއި ކުރިމަތިލާން ޖެހޭ ކަމަށެވެ.
