ސިޔާސީ މަންފާ ހޯދުމަށް ބިން ހިއްކުމުގެ މަޝްރޫޢުތައް ހުއްޓުވާ ދިނުމަށް އެދި އޭސީސީ އަށް މައްސަލަ އެއް ހުށަހަޅައިފި
ބިޑު ކުރުމެއް ނެތި ކޮރަޕްޝަނަށް މަގުފަހިކޮށްގެން ބިން ހިއްކުމުގެ މަސައްކަތް ކުރަމުން ދާތީ ވަގުތީ އަމުރެއް ނެރެ މި ޕްރޮޖެކްޓުތައް ހުއްޓުވުމަށް އޭސީސީގައި އެދިފައިވޭ.
އެމްޑީޕީގެ ގައުމީ މަޖިލިސް މެންބަރު އަހުމަދު ސަލީމް (މާޒް ސަލީމް) އޭސީސީ އަށް މައްސަލަ ހުށަހެޅުމަށް ފަހު ރާއްޖެޓީވީ އަށް އިންޓަރވިއު ދެއްވަނީ | ރާއްޖެ އެމްވީ
ސިޔާސީ މަންފާ ހޯދުމަށް ރާއްޖޭގެ އެކި ކަންކޮޅުތަކުގައި ހިންގާ ބިން ހިއްކުމުގެ މަޝްރޫޢުތައް ހުއްޓުވާ ދިނުމަށް އެދި އެންޓިކޮރަޕްޝަން ކޮމިޝަން (އޭސީސީ)އަށް މައްސަލަ އެއް ހުށަހަޅައިފި އެވެ.
މި މައްސަލަ ހުށަހަޅުއްވާފައި ވަނީ އެމްޑީޕީގެ ގައުމީ މަޖިލިސް މެންބަރު އަހުމަދު ސަލީމް (މާޒް ސަލީމް)އެވެ.
އަންގާރަ ދުވަހު މާޒް ސަލީމް ހުށަހެޅުއްވި މައްސަލައިގައި، ބިން ހިއްކުމުގެ ޕުރޮޖެކްޓު ރާއްޖޭގެ ކަންކޮޅުތަކުގައި ހިންގަމުން ދަނީ، ދިވެހިރާއްޖޭގެ ތިމާވެށި ރައްކާތެރިކޮށް ދެމެހެއްޓުމާބެހޭ ޤާނޫނާއި ޚިލާފަށް ކަމަށް ފާހަގަކޮށްފައި ވެ އެވެ. އަދި އަވަސް އަރުވާލައިގެން ތިމާވެއްޓަށް މިވަރުގެ ބޮޑު ގެއްލުމެއްދީގެން ބިންހިއްކަންޖެހޭ ޙާލަތެއް ނެތް ކަމަށާއި ބިންހިއްކުމުގެ ނަމުގައި ރާއްޖެ އަށް އެތައް ޑުރެޖަރު ތަކެއް ގެނެސް އެކަން ކުރަމުން ދަނީ އެއްވެސް ބިޑުކުރުމެއްނެތި ކޮރަޕްޝަނަށް މަގުފަހިފާ ގޮތަށް ކަމަށް ފާހަގަކޮށްފައި ވެ އެވެ.
އެހެންކަމުން ވަގުތީ
އަމުރެއް ނެރެގެން މިޕްރޮޖެކްޓުތައް ހުއްޓުވާ އަދި އަވަސް މަސްއަލަ އެއް ގެ ގޮތުގައި
މި މަސްއަލަ އޭސީސީ އިން ތަޙުޤީޤު ކޮށްދިނުމަށް ސަލީމް ވަނީ އެދިވަޑައިގަންނަވާފަ އެވެ. މީގެ އިތުރުން، މިކަން
ހުއްޓުވުމަށް ކަމާއި ގުޅުންހުރި އެހެނިހެން މުޢައްސަސާތަކުގައި ދަންނަވައި،
ވީއެންމެ އަވަސް ފުރުޞަތެއްގައި މިކަން ބެލުމަކީ އޭސީސީގެ މައްޗައް ޤާނޫނުން
މަތިކުރެވިފައިވާ ކަމެއް ކަމަށް އޭނާ ވަނީ ވިދާޅުވެފަ އެވެ.
އެ މައްސަލަ އާއި ގުޅޭ ގޮތުން ރާއްޖެ އެމްވީ އަށް މައުލޫމާތު ދެއްވަމުން ސަލީމް ވިދާޅުވީ ގާނޫނު އަސާސީން ތިމާވެށި ހިމާޔަތް ކުރުމަކީ ދައުލަތުގެ މައްޗަށް ލާޒިމު ކޮށްފައިވާ ކަމެއް ކަމަށާއި ތިމާވެށި ހިމާޔަތް ކުރުމަކީ ދައުލަތުގެ އަސާސީ ވާޖިބެއް ކަމަށެވެ. އިގްތިސާދީ އަދި އިޖްތިމާއީ ކުރިއެރުން ހޯދުމަށް ކުރެވޭ މަސައްކަތްތަކަކީ ތިމާވެށި ހިމާޔަތް ކުރެވޭ، ދެމެހެއްޓެނިވި ތަރައްގީގެ އުސޫލުތަކުގެ މަތިން ކުރެވޭ ކަންތައްތައް ކަމަށް ހެދުމަކީ މުހިންމު ކަމެއް ކަމަށް އޭނާ ވިދާޅުވި އެވެ.
އޭނާ ވިދާޅުވީ، މިސަރުކާރުން މިހާފާޅުކަން ބޮޑުކޮށް ޚިޔާނާތްތެރިވެ، އަދި މިޚިޔާނާތްތެރިވުން ދުވަހެއް ދުވަހަކަށް އިތުރުވަމުން މިދަނީ އޭސީސީ އަށް ޤާނޫނުން ލާޒިމްކޮށްފައިވާ ޒިންމާ ފުރިހަމަޔަށް އަދާ ނުކުރާތީކަމަށެވެ. މީގެ އިތުރުން ގާނޫނާއި ގަވައިދުގެ ނުހަމަ ބޭނުން ކޮށް މަކަރާއި ހީލާތް އެކުލެވޭ ގޮތުން ސަރުކާރުގެ ބާރާ ނުފޫޒު ގައި ސިޔާސީ މަންފާ ހާސިލު ކުރުމަށް ބިން ހިއްކުމުގެ ކަންތައްތައްކަން ކުރާ ކަމަށް މާސް ސަލީމް ވަނީ ވިދާޅުވެފަ އެވެ. ސަރުކާރުން މިކަންކަން ކުރަމުން ގެންދަނީ ތިމާވެށީގެ މިފަދަ ކަންކަމަށް ފާރަވެރިވެ މިފަދަކަންކަން ބަލާ ތަޙުޤީގު ހިންގުމަށް ޤާނޫނުނުން މަތިކޮށްފައިވާ މުއައްސަސާތަކުގެ ބާރު ކަނޑުވާލުމަށް ފަހު ކަމަށް އެނާ ވިދާޅުވި އެވެ.
"މި ކޮމިޝަންގައި ތިއްބެވި ބޭފުޅުން ވެސް ޒިންމާދާރު ކުރެވޭނެ ދުވަހެއް އަންނާނެ. ޖަވާބުދާރީ ވާން ޖެހޭނެ." އޭނާ ވިދާޅުވި އެވެ.
މީގެ އިތުރުން އޭސީސީ އިން ވަޤުތީ އަމުރެއް ނެރެގެން މި މަސައްކަތް ނުހުއްޓުވައިފި ނަމަ ދިވެހި ދައުލަތުގެ މާލިއްޔަތަށް އެތައް ބިލިއަން ރުފިޔާއެއްގެ ބޮޑު ގެއްލުމެއް ލިބި، ދިވެހިރާއްޖޭގެ ތިމާވެއްޓަށް އިޢާދަ ނުކުރެވޭވަރުގެ ބޮޑު ގެއްލުމެއް ލިބިގެން ދާނެ ކަމަށް ސަލީމް ވަނީ ވިދާޅުވެފަ އެވެ.
