އެމެރިކާގެ މިނިއަޕޮލިސް ގައި ހިންގަމުންދާ އިމިގްރޭޝަން އޮޕަރޭޝަނެއްގެ ތެރެއިން، ފެޑަރަލް އެޖެންޓުން ބަޑިޖަހައި އިތުރު މީހަކު މަރާލައިފި
24 ޖެނުއަރީ 2026 | ހޮނިހިރު 18:59ފެޑަރަލް އެޖެންޓުން ބަޑިޖަހައި މަރާލީ އުމުރުން 37 އަހަރުގެ އެމެރިކާގެ ރައްޔިތެއް. ޕޮލިސް ޗީފް އޯހާރާ ވިދާޅުވީ ފެޑަރަލް އިދާރާތަކުން މަސައްކަތް ކުރަންވާނީ އިންސާނިއްޔަތުކަމާއި ނަޒާހަތްތެރިކަމާއެކު ކަމަށް. މިނެސޯޓާގެ ގަވަރުނަރު މި އޮޕަރޭޝަން ވަގުތުން ހުއްޓާލުމަށް ރައީސް ޓްރަމްޕަށް ވަނީ ގޮވާލައްވާފައި. މިއީ މި މަހުގެ ކުރީކޮޅު އޮފިސަރަކު ބަޑިޖަހައި ރެނޭ ނިކޯލް ގުޑް މަރާލުމަށްފަހު ދެވަނަ މިފަދަ ހާދިސާ.
މިނެސޯޓާގެ މިނިއަޕޮލިސްގައި ބަޑިޖެހުމުގެ ހާދިސާ ހިނގި ސަރަހައްދުގައި އެމެރިކާގެ ފެޑެރަލް އެޖެންޓުން ހަރަކާތްތެރި ވަނީ - ޖެނުއަރީ 24، 2026. | ގެޓީ އިމޭޖަސް
އެމެރިކާގެ މިނިއަޕޮލިސް ގައި ހިންގަމުންދާ އިމިގްރޭޝަން އޮޕަރޭޝަނެއްގެ ތެރެއިން، ފެޑަރަލް އެޖެންޓުން ބަޑިޖަހައި އިތުރު މީހަކު މަރާލައިފި ކަމަށް ކަމާބެހޭ ފަރާތްތަކުން ހާމަކޮށްފި އެވެ.
ހޮނިހިރު ދުވަހު ބޭއްވި ނޫސްވެރިންގެ ބައްދަލުވުމެއްގައި މިނިއަޕޮލިސްގެ ޕޮލިސް ޗީފް ބްރަޔަން އޯހާރާ ވިދާޅުވީ، ބަޑީގެ ހަމަލާތަކެއް އަމާޒުވެ ޒަޚަމްވި އުމުރުން 37 އަހަރުގެ މީހަކު ހޮސްޕިޓަލުގައި ފަރުވާދެމުން ދަނިކޮށް މަރުވެފައިވާ ކަމަށެވެ. މަރުވި މީހާ އަކީ އެމެރިކާގެ ރައްޔިތެއް ކަމަށާއި، އޭނާއަކީ އެ ސިޓީގައި ދިރިއުޅޭ މީހެއް ކަމަށްވެސް އޯހާރާ ވިދާޅުވި އެވެ. ނަމަވެސް އޭނާގެ ވަނަވަރު އަދި ހާމަކޮށްފައެއް ނުވެ އެވެ.
އޯހާރާ އިތުރަށް ވިދާޅުވީ، ސިޓީގައި ހަރަކާތްތެރިވާ ފެޑަރަލް އިދާރާތަކުން މަސައްކަތް ކުރަންވާނީ އިންސާނިއްޔަތުކަމާއި، ނަޒާހަތްތެރިކަމާއެކު، ގާނޫނު ތަންފީޒުކުރާ އިދާރާތަކުން އަމަލުކުރަންޖެހޭ އަޚުލާގީ މިންގަނޑުތަކުގެ ތެރެއިން ކަމަށެވެ.
މި ހާދިސާ ހިނގާފައިވަނީ ރައީސް ޑޮނަލްޑް ޓްރަމްޕްގެ ހަރުކަށި އިމިގްރޭޝަން ސިޔާސަތުގެ ދަށުން، މިނިއަޕޮލިސްގައި ފެޑަރަލް އެޖެންޓުން ހިންގަމުންދާ ހާއްސަ އޮޕަރޭޝަންތަކެއްގެ ތެރެއިންނެވެ.
މިކަމާ ގުޅިގެން މިނެސޯޓާގެ ގަވަރުނަރު ޓިމް ވޯލްޒް ސޯޝަލް މީޑިއާގައި ވިދާޅުވީ، މިއީ ބަލައިގަނެވޭނެ ކަމެއް ނޫން ކަމަށާއި، މި އޮޕަރޭޝަން ވަގުތުން ހުއްޓާލުމަށް ރައީސަށް ގޮވާލައްވާ ކަމަށެވެ. އަދި އެކަށީގެންވާ ތަމްރީނެއް ނެތް، އަނިޔާވެރި އޮފިސަރުން އެ ސިޓީން ވަގުތުން ބޭރުކުރުމަށް ވެސް އޭނާ ގޮވާލެއްވި އެވެ.
ސޯޝަލް މީޑިއާ ގައި ދައުރުވަމުންދާ ވީޑިއޯތަކުން ފެންނަ ގޮތުގައި، ފެޑަރަލް އޮފިސަރުންތަކެއް މީހަކު ބިމަށް ތިރިކޮށް ބާރުގެ ބޭނުންކުރަމުން ދަނިކޮށް ބަޑިޖަހާ އަޑު އިވެ އެވެ.
ޑިޕާޓްމަންޓް އޮފް ހޯމްލޭންޑް ސެކިއުރިޓީން ކަށަވަރުކޮށްދީފައިވާ ގޮތުގައި، އެ މީހާއަށް ބަޑިން ހަމަލާދީފައިވަނީ ބޯޑަރ ޕެޓްރޯލް އެޖެންޓެކެވެ. އެ އިދާރާއިން ބުނާ ގޮތުގައި އެ މީހާގެ އަތުގައި ފިސްތޯލައެއް އޮތް ކަމަށާއި، އޭނާގެ އަތުން ހަތިޔާރު އަތުލުމަށް ކުރި މަސައްކަތަށް އޭނާ ވަނީ ހުރަސްއަޅާފައި ކަމަށެވެ.
މިއީ މި މަހުގެ ކުރީކޮޅު އިމިގްރޭޝަން އެންޑް ކަސްޓަމްސް އެންފޯސްމަންޓް (ICE) އޮފިސަރަކު ބަޑިޖަހައި މިނިއަޕޮލިސްގެ އަންހެނެއް ކަމަށްވާ ރެނޭ ނިކޯލް ގުޑް މަރާލި ހާދިސާއަށް ފަހު، ހިނގި މިފަދަ ދެވަނަ ހާދިސާ އެވެ.
