ވެނެޒުއޭލާ އިން އަތުލައިގަތް ތެޔޮ ޓޭންކަރު ތަކުން އެމެރިކާ އިން ތެޔޮ ނަގައިފި ކަމަށް ޓްރަމްޕް ވިދާޅުވެއްޖެ
ސަރުކާރުން ވެނެޒުއޭލާގެ 50 މިލިއަން ފީފާ ތެޔޮ އަތުލާފައިވާ ކަމަށާއި، އޭގެ ތެރެއިން ބައެއް ތެޔޮ މިހާރު ހުޅުވާލެވިފައިވާ ބާޒާރުގައި ވިއްކަމުންދާ ކަމަށް ވެސް އަންގާރަ ދުވަހު ޓްރަމްޕް ވިދާޅުވި.
އެމެރިކާގެ ރައީސް ޑޮނަލްޑް ޓްރަމްޕް. | ރޮއިޓަސް
ވެނެޒުއޭލާ އިން ހިފަހައްޓާފައިވާ ތެޔޮ ޓޭންކަރުތަކުގައި ހުރި ތެޔޮ އެމެރިކާ އިން ނަގައި، އެ ގައުމުގެ ރިފައިނަރީތަކުގައި އެ ތެޔޮ ސާފުކުރާނެ ކަމަށް ރައީސް ޑޮނަލްޑް ޓްރަމްޕް ވިދާޅުވެއްޖެއެވެ.
ޓްރަމްޕް މިހެން ވިދާޅުވީ ހޮނިހިރު ދުވަހު "ނިއު ޔޯކް ޕޯސްޓް" ނޫހަށް ދެއްވި އިންޓަވިއުއެއްގަ އެވެ.
"މިކަން އޮތް ގޮތް ބުނެދޭނަން؛ އެމީހުންގެ އަތަކު މިހާރު ތެލެއް ނުހުންނާނެ. އެ ތެޔޮ މިހާރު ވަނީ އަހަރެމެންގެ ބާރުގެ ދަށަށް ގެނެސްފައި،" ޓްރަމްޕް އެ ނޫހަށް ވިދާޅުވި އެވެ.
ޓްރަމްޕް އިތުރަށް ވިދާޅުވި ގޮތުގައި، މި ތެޔޮ ސާފުކުރުމުގެ މަސައްކަތް ހިއުސްޓަން ހިމެނޭ ގޮތަށް އެކި ސަރަހައްދުތަކުގައި ދަނީ ކުރަމުންނެވެ.
ވެނެޒުއޭލާގެ ތެޔޮ ބޭރުކުރުން ކޮންޓްރޯލް ކުރުމަށް ޓްރަމްޕް ފެއްޓެވި އެއް މަސް ދުވަހުގެ ކެމްޕޭނުގެ ތެރެއިން، އެމެރިކާގެ އަސްކަރިއްޔާ އިން މިހާތަނަށް ވެނެޒުއޭލާ އާ ގުޅުންހުރި ހަތް ތެޔޮ ޓޭންކަރެއް ވަނީ ހިފަހައްޓާފަ އެވެ.
މީގެ އިތުރުން، އޭނާގެ ސަރުކާރުން ވެނެޒުއޭލާގެ 50 މިލިއަން ފީފާ ތެޔޮ އަތުލާފައިވާ ކަމަށާއި، އޭގެ ތެރެއިން ބައެއް ތެޔޮ މިހާރު ހުޅުވާލެވިފައިވާ ބާޒާރުގައި ވިއްކަމުންދާ ކަމަށް ވެސް އަންގާރަ ދުވަހު ޓްރަމްޕް ވިދާޅުވި އެވެ.
