ރެއާލްއާ ދެކޮޅަށް ކުޅެ ސުޕަ ކަޕް ކާމިޔާބު ވުމަކީ ބޮޑު ކާމިޔާބެއް: ފްލިކް
13 ޖެނުއަރީ 2026 | އަންގާރަ 03:52ފައިނަލް މެޗާ ގުޅޭ ގޮތުން ވާހަކަ ދައްކަމުން ފްލިކް ބުނީ، އެ މެޗުގައި ބާސެލޯނާ އިން ވަރަށް ރަނގަޅަށް ކުޅުނު ކަމަށް. ބާސެލޯނާ އިން މުޅި މެޗު ކޮންޓްރޯލް ކޮށްގެން ކުޅުނު ކަމަށާއި، ކުޅުންތެރިން އެންމެ ފުރިހަމަ އަށް މަސައްކަތް ކުރި ކަމަށް އޭނާ ބުނި.
ބާސެލޯނާގެ ކޯޗު ހަންސީ ފްލިކް | ރޮއިޓަސް
ވާދަވެރި ރެއާލް މެޑްރިޑްއާ ދެކޮޅަށް ކުޅެ ސްޕެނިޝް ސުޕަ ކަޕް ކާމިޔާބު ކުރުމަކީ ބޮޑު ކާމިޔާބެއް ކަމަށް، ބާސެލޯނާގެ ކޯޗު ހަންސީ ފްލިކް ބުނެފި އެވެ.
އޭނާ މިހެން ބުނީ ސުޕަ ކަޕްގެ ފައިނަލްގައި ރެއާލް ބަލިކޮށް، ބާސެލޯނާ އިން މުބާރާތް ކާމިޔާބު ކުރުމަށް ފަހު އެވެ. ރެއާލް ބަލިކޮށް ބާސެލޯނާ އިން ސުޕަ ކަޕް ކާމިޔާބު ކޮށްފައިވާއިރު، މިއީ ޖެހި ޖެހިގެން ދެ ވަނަ ފަހަރަށް ރެއާލް ބަލިކޮށް ބާސެލޯނާ އިން ސުޕަ ކަޕް ކާމިޔާބު ކުރި ފަހަރެވެ.
ފައިނަލް މެޗަށް ފަހު ވާހަކަ ދައްކަމުން ފްލިކް ބުނީ، ސުޕަ ކަޕަކީ ވެސް ވަރަށް މުހިންމު މުބާރާތެއް ކަމަށާއި، އެ މުބާރާތް ކާމިޔާބު ކުރުމަކީ މުހިންމު އަމާޒަކަށް ވެފައި އޮތް ކަމަށެވެ. ޚާއްސަކޮށް ވާދަވެރި ރެއާލްއާ ދެކޮޅަށް ކުޅެ ސުޕަ ކަޕް ކާމިޔާބު ވުމަކީ ބާސެލޯނާ އަށް ބޮޑު ކާމިޔާބެއްގެ ގޮތުގައި ފްލިކް ސިފަ ކުރި އެވެ. ބާސެލޯނާ އަށް ލިބުނީ ރަނގަޅު ކާމިޔާބެއް ކަމަށާއި، އެ ކާމިޔާބާ މެދު ހިތްހަމަ ޖެހޭ ކަމަށް ފްލިކް ބުންޏެވެ.
މީގެ އިތުރުން ފްލިކްް ބުނީ، އޭނާ އަށް އެންމެ މުހިންމު ކަމަކަށް ވެފައި އޮތީ މޮޅުވުމުގެ އިތުރުން ބާސެލޯނާ އިން ރަނގަޅު ވައްޓަފާޅިއެއްގައި ކުޅުން ކަމަށެވެ. އެކަން ބާސެލޯނާ އަށް ވަރަށް ރަނގަޅަށް ޙާސިލު ކުރެވިފައިވާ ކަމަށާއި، މުޅި ޓީމުގެ ހުރިހާ ކުޅުންތެރިންނާ މެދު އިންތިހާ އަށް ފަޚުރުވެރިވާ ކަމަށް ފްލިކް ބުންޏެވެ.
ފައިނަލް މެޗާ ގުޅޭ ގޮތުން ވާހަކަ ދައްކަމުން ފްލިކް ބުނީ، އެ މެޗުގައި ބާސެލޯނާ އިން ވަރަށް ރަނގަޅަށް ކުޅުނު ކަމަށެވެ. ބާސެލޯނާ އިން މުޅި މެޗު ކޮންޓްރޯލް ކޮށްގެން ކުޅުނު ކަމަށާއި، ކުޅުންތެރިން އެންމެ ފުރިހަމަ އަށް މަސައްކަތް ކުރި ކަމަށް އޭނާ ބުންޏެވެ. އެކަމަކު ވެސް، ރެއާލްއާ ދެކޮޅަށް ކުޅުމަކީ ފަސޭހަ ކަމެއް ނޫން ކަމަށް ކުރިން ވެސް އިނގުނު ކަމަށާއި، މެޗުގައި އެކަން އިޙުސާސް ކުރެވުނު ކަމަށް ފްލިކް ބުންޏެވެ.
މުޅި މެޗުގައި ވެސް އެންމެ ތަފާތު ކަމަކަށް ވީ، ބާސެލޯނާގެ ހުރިހާ ކުޅުންތެރިން ވެސް ޓީމެއްގެ ގޮތުގައި މަސައްކަތް ކުރުން ކަމަށް ފްލިކް ވަނީ ބުނެފަ އެވެ. ހަމަ އެއާ އެކު، ބާސެލޯނާގައި އޮތް މެންޓާލިޓީ އަކީ ވަރަށް ތަފާތު އެއްޗެއް ކަމަށް ފްލިކް ބުންޏެވެ. އޭނާ ބުނީ ބާސެލޯނާ އަށް ލިބުނު މޮޅަކީ ހުރިހާ ގޮތަކުން ވެސް ހައްގު މޮޅެއް އަދި ކާމިޔާބެއް ކަމަށެވެ. ބާސެލޯނާގެ ބެޖަށްޓަކައި ކުޅުންތެރިން ވީ ޤުރުބާނީ އަކީ އަބަދު ވެސް ބަލައި ގަންނާނެ ކަމެއް ކަމަށް ފްލިކް ބުންޏެވެ.
ރެއާލް ބަލިކޮށް ބާސެލޯނާ އިން ސުޕަ ކަަޕް ކާމިޔާބު ކޮށްފައިވާއިރު، މިއީ ބާސެލޯނާ އިން ސުޕަ ކަޕް ކާމިޔާބު ކުރި 16 ވަނަ ފަަހަރެވެ. ބާސެލޯނާ އަކީ އެންމެ ގިނައިން ސުޕަ ކަޕް ކާމިޔާބު ކޮށްފައިވާ ޓީމެވެ. ފްލިކްގެ އިރުޝާދުގެ ދަށުން ބާސެލޯނާ އިން މިހާތަނަށް ހަތަރު ތައްޓެއް ކާމިޔާބު ކޮށްފައިވާއިރު، މި ސީޒަންގައި ވެސް ބާސެލޯނާ އިން އަންނަނީ ރަނގަޅު ކުޅުމެއް ދައްކަމުންނެވެ.
