ސޮސިއެޑާޑް އަތުން ބަލިވެ، ބާސެލޯނާ އަށް ފައިދާ ނުނެގުނު

ސްޕެނިޝް ލީގުގައި ރެއާލް ސޮސިއެޑާޑްއާ ދެކޮޅަށް ކުޅުނު މެޗުން ބަލިވެ، ލީގު ތާވަލްގެ އެއް ވަަނައިގައި ލީޑު ފުޅާ ކުރަން ލިބުނު ފުރުސަތު ނަގާލައިފި އެވެ. 

ސޮސިއެޑާޑްގެ އަމިއްލަ ދަނޑުގައި އާދީއްތަ ދުވަހުގެ ރޭ ދަންވަރު ކުޅުނު މެޗު އެ ޓީމުން ކާމިޔާބު ކުރީ 2-1 އިންނެވެ. މެޗުގައި ސޮސިއެޑާޑް އިން ލަނޑު ޖަހައި ކުރި ހޯދާފައި ވަނިކޮށް، ބާސެލޯނާ އިން ނަތީޖާ ހަމަހަމަ ވެސް ކުރި އެވެ. ނަމަވެސް ދެ ވަނަ ލަނޑެއް ޖަހައިގެން ސޮސިއެޑާޑް ވަނީ މެޗުން މޮޅުވެފަ އެވެ.

މެޗު ފަށައިގެން ހަތް ވަނަ މިނެޓުގައި ބާސެލޯނާގެ ފާމިން ލޮޕޭޒް ލަނޑެއް ޖެހި ނަމަވެސް، ވީޑިއޯ އެސިސްޓެންޓް ރެފްރީ (ވީއޭއާރު) އިން ވަނީ އެ ލަނޑު ބަލައި ނުގަންނަން ނިންމައިފަ އެވެ. އޭގެ ފަހުން މެޗުގެ 32 ވަނަ މިނެޓުގައި ސޮސިއެޑާޑް އިން ލީޑު ނެގީ މިކޭލް އޮޔާޒަބާލް ޖެހި ލަނޑުންނެވެ.

މެޗުގެ ނަތީޖާ ހަމަހަމަ ކުރުމަށް ބާސެލޯނާ އިން ގިނަ މަސައްކަތް ތަކެއް ކުރިއިރު، އެ ޓީމަށް ނަތީޖާ ހަމަހަމަ ކުރެވުނީ މެޗުގެ 70 ވަނަ މިނެޓުގަ އެވެ. އެ ލަނޑު ބާސެލޯނާ އަށް ޖަހައިދިނީ މާކަސް ރަޝްފޯޑު އެވެ. އެއީ ސްޕެއިންގެ ޒުވާން ކުޅުންތެރިޔާ ލަމީން ޔަމާލް ތަނަވަސްކޮށްދިން ފުރުސަތެއްގައި އޭނާ ޖެހި ލަނޑެކެވެ.

ނަމަވެސް، ބާސެލޯނާ އިން ނަތީޖާ ހަމަހަމަ ކުރިތާ މިނެޓެއް ފަހުން ސޮސިއެޑާޑް އިން ވަނީ ދެ ވަނަ ލަނޑެއް ޖަހައި ލީޑު ނަގައިފަ އެވެ. ސޮސިއެޑާޑްގެ ދެ ވަނަ ލަނޑު ޖަހައި މެޗުން އެ ޓީމު މޮޅު ކޮށްދިނީ ގޮންޒާލޯ ގުއޭޑޭޝް އެވެ. އޭގެ ފަހުން މެޗުގެ 88 ވަނަ މިނެޓުގައި އެ ޓީމުގެ ކާލޮސް ސޮލާާ އަށް ސީދާ ރަތް ކާޑު ވެސް ދެއްކި އެވެ.

މެޗުން ބަލިވި ނަމަވެސް، ބާސެލޯނާ އެއް ވަަނައިގައި އޮތީ ޕޮއިންޓެއްގެ ލީޑަކުންނެވެ. މިހާތަނަށް ލީގުގައި ކުޅެފައިވާ 20 މެޗުން އެ ޓީމަށް ލިބެނީ 49 ޕޮއިންޓެވެ. ހަމަ އެ އަދަދަށް މެޗު ކުޅެގެން ދެ ވަަނައިގައި އޮތް ވާދަވެރި ރެއާލް މެޑްރިޑަށް ލިބެނީ 48 ޕޮއިންޓެވެ.