މޮޅުވުން ހައްގު، ރެފްރީ އަކީ ކާކުކަން އިނގޭ: ފްލިކް

ސްޕެނިޝް ލީގުގައި ރެއާލް ސޮސިއެޑާޑްއާ ދެކޮޅަށް ކުޅުނު މެޗުން ބާސެލޯނާ އަށް މޮޅުވުން ހައްގު ކަމަށް ބުނެ، އެ ޓީމުގެ ކޯޗު ހަންސީ ފްލިކްގެ ނުރުހުން މެޗުގެ ރެފްރީ އަށް އަމާޒު ކޮށްފި އެވެ.

ސޮސިއެޑާޑްގެ އަމިއްލަ ދަނޑުގައި ކުޅުނު މެޗުގައި ބާސެލޯނާ އިން ތިން ލަނޑު ޖެހި ނަމަވެސް، އެ ތިން ލަނޑު ވެސް ބަަލައިގެންފައި ނުވެ އެވެ. ބާސެލޯނާ އިން ޖެހި ތިން ލަނޑުގެ ތެރެއިން ދެ ލަނޑު އޮފްސައިޑު ކަމަށް ނިންމިއިރު، އަނެއް ލަނޑު ބަލައި ނުގަތީ ފައުލް ކަމަށް ކަނޑަ އަޅައިގެންނެވެ. 

އެ މެޗަށް ފަހު ވާހަކަ ދައްކަމުން ބާސެލޯނާގެ ކޯޗު ފްލިކް ބުނީ، މެޗުގެ ނަތީޖާ އަކީ ބާސެލޯނާ އިން ދެއްކި ކުޅުމަށް ހައްގު ނަތީޖާއެއް ނޫން ކަމަށެވެ. ނަމަވެސް، ބާސެލޯނާ އިން ޑިފެންސްގައި އިތުރަށް ސަމާލުކަން ދޭން ޖެހޭ ކަމަށް އޭނާ ބުންޏެވެ. ޚާއްސަކޮށް ނަތީޖާ ހަމަހަމަ ކުރުމަށް ފަހު، އެހާ މަދު ވަގުތު ކޮޅެއްގެ ތެރޭގައި އިދިކޮޅު ޓީމަށް އިތުރު ލަނޑެެއް ޖެހުމަކީ ޤަބޫލު ކުރެވޭ ކަމެއް ނޫން ކަމަށް އޭނާ ބުންޏެވެ.

މެޗުގައި ބާސެލޯނާގެ ކުޅުންތެރިން ރަނގަޅު ކުޅުމެއް ދެއްކިކަން ފާހަގަކޮށް ފްލިކް ބުނީ، ކުޅުންތެރިންގެ ފަރާތުން ހިތްވަރު ވެސް ފެނުނު ކަމަށެވެ. އެހެން ނަމަވެސް، ބައެއް ދުވަސް ދުވަހު މެޗު ނިމޭއިރު ނަސީބު އެހީ ނުވާނެ ކަމަށް ފްލިކް ބުނެފައިވެ އެވެ. އެކަން ފާހަގަކޮށް ފްލިކް ބުނީ ބާސެލޯނާ އަށް މޮޅުވުން ހައްގު ކަމަށާއި، ނަމަވެސް މިއީ ފުޓުބޯޅަ ކަމަށެވެ.

މެޗުގައި ބާސެލޯނާ އިން ޖެހި ތިން ލަނޑު ވެސް ބަލައި ނުގަންނަން ނިންމުމުން، އެކަމާ ގުޅޭ ގޮތުން ފްލިކް ބުނީ ރެފްރީ އަކީ ކާާކުކަން އިނގޭ ކަމަށެވެ. މެޗު ބަލަން ތިބި އެންމެނަށް ވެސް އެކަން ފެންނާނެ ކަމަށާއި، އޭނާގެ ހަކަތަ ރެފްރީގެ ވާހަކަ އަށް ދޫކޮށްލަން ބޭނުން ނުވާ ކަމަށް ވެސް ފްލިކް ވަނީ ބުނެފަ އެވެ. ފްލިކް ބުނީ ރެފްރީއާ ބެހޭ ގޮތުން ހުރި ބައެއް ކޮމެޓުތައް އޭނާ އަށް ފެނިފައިވާ ކަމަށާއި، ސްޕެނިޝް ލީގުގައި ވަރަށް ރަނގަޅު ރެފްރީން ތިބޭ ކަމަށް އޭނާ ބުންޏެވެ. ނަމަވެސް، އެ މެޗުގެ ރެފްރީ އަކީ ކާކުކަން އިނގޭ ކަމަށް ފްލިކް ބުންޏެވެ.

ސޮސިއެޑާޑް އަތުން މޮޅުވެ ލީގު ތާވަލްގެ އެއް ވަނަ މަގާމުގައި ލީޑު ފުޅާ ކުރުމުގެ ފުރުސަތު ބާސެލޯނާ އަށް އޮތެވެ. ނަމަވެސް، މެޗުން ބަލިވުމާ އެކު ބާސެލޯނާ އެއް ވަަނައިގައި އޮތީ ޕޮއިންޓެއްގެ ލީޑަކުންނެވެ. މިހާތަނަށް ލީގުގައި ކުޅެފައިވާ 20 މެޗުން އެ ޓީމަށް ލިބެނީ 49 ޕޮއިންޓެވެ. ހަމަ އެ އަދަދަށް މެޗު ކުޅެގެން ދެ ވަަނައިގައި އޮތް ވާދަވެރި ރެއާލް މެޑްރިޑަށް ލިބެނީ 48 ޕޮއިންޓެވެ.