ކަންސޭލޯ އަލުން ބާސެލޯނާ އަށް ބަދަލުވެއްޖެ

ސައުދީ ޕްރޯ ލީގުގެ އަލް ޙިލާލް އަށް ކުޅެމުން އައި ޕޯޗުގަލްގެ ޔާއޯ ކަންސޭލޯ، ސްޕެއިންގެ ބާސެލޯނާ އަށް ބަދަލުވެއްޖެ އެވެ. 

އުމުރުން 31 އަހަރުގެ ކުޅުންތެރިޔާ އަލް ޙިލާލް އަށް ބަދަލުވީ 2024 ވަނަ އަހަރު އެވެ. އެ ކުލަބާ އެކު އޭނާ ސޮއި ކޮށްފައި ވަނީ ތިން އަހަރު ދުވަހުގެ އެއްބަސްވުމެއްގަ އެވެ. ނަމަވެސް، އެއްބަސްވުމުގެ މުއްދަތު ހަމަވުމުގެ ކުރިން އަލް ޙިލާލް ދޫކޮށްލަން ކަންސޭލޯ ނިންމީ އެވެ.

އެއާ އެކު ބާސެލޯނާ އިން ވަނީ ލޯނު އެއްބަސްވުމެއްގެ ދަށުން ކަންސޭލޯ ހޯދައިފަ އެވެ. މިފަހަރު ވެސް ކަންސޭލޯ ބާސެލޯނާ އަށް ބަދަލުވެފައި ވަނީ ލޯނު އެއްބަސްވުމެއްގެ ދަށުންނެވެ. ލޯނު އެއްބަސްވުމުގެ ދަށުން، މިހާރު ކުރިއަށްދާ ސީޒަންގެ ނިޔަލަށް ކަންސޭލޯ ބާސެލޯނާ އަށް ކުޅޭނެ އެވެ.

އަލް ޙިލާލް އަށް ބަދަލުވުމުގެ ކުރިން ވެސް ކަންސޭލޯ ވަނީ ލޯނު އެއްބަސްވުމެއްްގެ ދަށުން ބާސެލޯނާ އަށް ކުޅެފަ އެވެ. އެ ފަހަރު އޭނާ ވަނީ ބާސެލޯނާ އަށް ކުޅެދިން 42 މެޗުގައި ހަތަރު ލަނޑު ޖަހައިފަ އެވެ. އެފަހަރު ބާސެލޯނާ އަށް ބަދަލުވުމުގެ ކުރިން ކަންސޭލޯ ވަނީ، ލޯނު އެއްބަސްވުމެއްގެ ދަށުން ޖަރުމަނުގެ ބަޔާން މިއުނިކް އަށް ވެސް ކުޅެފަ އެވެ.

ދެ ވަނަ ފަހަރަށް ލޯނު އެއްބަސްވުމެއްގެ ދަށުން ކަންސޭލޯ ބާސެލޯނާ އަށް ބަދަލުވީއިރު، މި ފަހަރު އޭނާ ހޯދުމަށް އިޓަލީގެ އިންޓަރ މިލާން އިން ވެސް މަސައްކަތް ކުރި ކަމަށް ރިޕޯޓު ކޮށްފައިވެ އެވެ. ނަމަވެސް ބާސެލޯނާގެ ޝައުޤުވެރިކަން އޮތުމާ އެކު، ކަންސޭލޯ ބޭނުންވީ އެ ކުލަބަށް ބަދަލުވާން ކަމަށް ބުނެފައިވެ އެވެ.

ބެންފީކާ އިން ސީނިއާ ކެރިއަރު ފެށި ކަންސޭލޯ ވަނީ މެންޗެސްޓަރ ސިޓީ އާއި ޔުވެންޓަސް އަށް ވެސް ކުޅެފަ އެވެ. މީގެ ކުރިން ވެސް އޭނާ ވަނީ ލޯނު އެއްބަސްވުމެއްގެ ދަށުން އިންޓަރ މިލާން އަށް ކުޅެފަ އެވެ. ކަންސޭލޯ ވަނީ ސިޓީގައި ހޭދަ ކުރި ހަތަރު ސީޒަންގެ ތެރޭގައި އެ ކުލަބަށް 154 މެޗު ކުޅެދީ ނުވަ ލަނޑު ޖަހައިފަ އެވެ.

ސިޓީ އާއެކު ކަންސޭލޯ ވަނީ ފަސް ތައްޓެއް ވެސް ކާމިޔާބު ކޮށްފަ އެވެ. އޭގެ ތެރޭގައި އިނގިރޭސި ޕްރިމިއާ ލީގު ތިން ފަހަރު ކާމިޔާބު ކުރުމުގެ އިތުރުން، އެފްއޭ ކަޕާއި، ކަރަބޯ ކަޕް ކާމިޔާބު ކުރުން ވެސް ހިމެނެ އެވެ. ޕޯޗުގަލްގެ ޤައުމީ ޓީމަށް ވެސް ކަންސޭލޯ ކުޅެމުން އަންނައިރު، އަލުން އެނބުރި އޭނާ ޔޫރަޕަށް އައުމުގެ ބޭނުމަކީ ޤައުމީ ޓީމުގެ ޖާގަ ކަށަވަރު ކުރުން ކަމަށް ވެސް މީޑިއާ ތަކުގައި ބުނެފައިވެ އެވެ.