ރެއާލް ބަލިކޮށް، ބާސެލޯނާ އިން ސުޕަ ކަޕް ދިފާއު ކޮށްފި

ސްޕެނިޝް ސުޕަ ކަޕްގެ ފައިނަލްގައި ވާދަވެރި ރެއާލް މެޑްރިޑް ބަލިކޮށް، އެންމެ ފަހުގެ ޗެމްޕިއަން ބާސެލޯނާ އިން މުބާރާތުގެ ތަށި ދިފާއު ކޮށްފި އެވެ.

ސައުދީ އަރަބިއްޔާގެ ކިންގް ޢަބްދުﷲ ސްޕޯޓްސް ސިޓީގައި އާދީއްތަ ދުވަހުގެ ރޭ ދަންވަރު ކުޅުނު މެޗު ބާސެލޯނާ އިން ކާމިޔާބު ކުރީ 3-2 އިންނެވެ. މެޗުގައި ބާސެލޯނާ އިން ދެ ފަހަރެއްގެ މަތިން ލީޑު ނެގިއިރު ވެސް، ރެއާލް އިން ނަތީޖާ ހަމަހަމަ ކުރި އެވެ. ނަމަވެސް، ތިން ވަނަ ލަނޑެއް ޖަހައިގެން ބާސެލޯނާ ވަނީ މެޗުން މޮޅުވެފަ އެވެ.

މެޗުގެ ފުރަތަމަ ހާފުގެ 36 ވަނަ މިނެޓުގައި ބާސެލޯނާ އަށް ލީޑު ނަގައިދިނީ ބްރެޒިލްގެ ރަފީނިއާ އެވެ. އެއީ ފާމިން ލޮޕޭޒް ތަނަވަސްކޮށްދިން ފުރުސަތެއްގައި އޭނާ ޖެހި ލަނޑެކެވެ. ނަމަވެސް، މެޗުގެ ފުރަަތަމަ ހާފުގެ އިތުރު ވަގުތުގައި ވިނީޝިއުސް ޖޫނިއާ ޖެހި ލަނޑާ އެކު، ރެއާލް އިން ނަތީޖާ ހަމަހަމަ ކުރި އެވެ. އެއީ ގޮންޒާލޯ ގާސިއާ ތަނަވަސްކޮށްދިން ފުރުސަތެއްގައި ވިނީޝިއުސް ޖެހި ލަނޑެކެވެ.

އޭގެ އިރު ކޮޅެއް ފަހުން ބާސެލޯނާ އިން ދެ ވަނަ ލަނޑެއް ޖަހައި، ދެ ވަނަ ފަހަަރަށް ލީޑު ނެގި އެވެ. ސްޕެއިންގެ ޕެޑްރީ ތަނަވަސްކޮށްދިން ފުރުސަތެއްގައި ބާސެލޯނާ އަށް އެ ލަނޑު ޖަހައިދިނީ ޕޮލެންޑުގެ ފޯވާޑު ރޮބާޓް ލެވަންޑޯސްކީ އެވެ. އޭގެ ދެ މިނެޓު ފަހުން ގާސިއާ ވަނީ ލަނޑު ޖަހައި ދެ ވަނަ ފަހަރަށް ރެއާލް އަށް ނަތީޖާ ހަމަހަމަ ކޮށްދީފަ އެވެ. 

މެޗުން ބާސެލޯނާ މޮޅުވީ ދެ ވަނަ ހާފުގައި ޖެހި ލަނޑުންނެވެ. އެގޮތުން މެޗުގެ 73 ވަނަ މިނެޓުގައި ބާސެލޯނާ އަށް އެ ލަނޑު ޖަހައިދިނީ ރަފީނިއާ އެވެ. އެ ލަނޑު ޖަހަން ރަފީނިއާ އަށް ފުރުސަތު ތަނަވަސްކޮށްދިނީ ޑެނީ އޮލްމޯ އެވެ.

މޮޅާއެކު ބާސެލޯނާ އިން ސުޕަ ކަޕް ކާމިޔާބު ކޮށްފައިވާއިރު، މިއީ އެ ކުލަބުން ސުޕަ ކަޕް ކާމިޔާބު ކުރި 16 ވަނަ ފަހަރެެވެ. ބާސެލޯނާ އަކީ އެންމެ ގިނައިން ސުޕަ ކަޕް ކާމިޔާބު ކޮށްފައިވާ ޓީމެވެ. މިއީ ބާސެލޯނާގެ ކޯޗުކަމާ ހަންސީ ފްލިކް ހަވާލުވީ ފަހުން، އެ ކުލަބުން ކާމިޔާބު ކުރި ހަތަރު ވަނަ ތައްޓެވެ. 

ފްލިކްގެ އިރުޝާދުގެ ދަށުން ބާސެލޯނާ އިން ވަނީ ސްޕެނިޝް ލީގު، ކޮޕާ ޑެލް ރޭ އަދި ސުޕަ ކަޕް ކާމިޔާބު ކޮށްފަ އެވެ. މީގެ ތެރެއިން ވެސް ސުޕަ ކަޕް މި ވަނީ ދެ ފަހަރު ކާމިޔާބު ކޮށްފަ އެވެ.