އެތައް އަހަރެއް ފަހަތަށް: ނަމުގައި ޑިމޮކްރަސީ، އަމަލުން ހުދުމުހުތާރުކަން
ޑިމޮކްރެސީގެ ނަމުގައި ވެރިކަމަށް ވަޑައިގެން ރައީސް މުއިއްޒު ދައުލަތުގެ އެންމެހައި ބާރުތައް އެއް މީހެއްގެ މުށުތެރެއަށް ޖަމާކުރަމުން ގެންދަވަނީ ހުދުމުހުތާރު ވެރިކަމުގެ ހަނދާންތައް އާކޮށްދެމުން. 2025 ވަނަ އަހަރު ވެގެންދިޔައީ ޖުމްހޫރިއްޔަތުގެ އަސާސްތަކާ ނުކިއްސަރު ކަންކަމެއް ހިނގައި އެންމެހައި ބާރުތައް އެއް މޭޒެއްގެ ދަށުގައި ތަގުޅިވެ ބާރުވު އަހަރަކަށް.
ހުދުމުހުތާރު ބާރެއްގެ ދަށުގައި ޑިމޮކްރެޓިކް މުއައްސަސާތަކުގެ ރަމްޒީ ތަސްވީރެއް، ވެރިކަން ކުރުމުގެ ބާރާއި ގާނޫނު ހެދުމުގެ ބާރާއި އަދުލު އިންސާފުގެ ބާރު އެއް މީހެއްގެ މުށުތެރެއަށް ޖަމާވެފައިވާ މަންޒަރު ދައްކުވައިދެނީ. | ރާއްޖެއެމްވީ
ވެރިންނަކީ ރައްޔިތުންނަށް ޚިދުމަތް ކުރަން ތިބޭ މީހުންނެވެ. ރައްޔިތުންގެ ތެރެއިން ގިނަ ބަޔަކު ނިކުމެ ވެރިން އިންތިޚާބު ކުރަނީ، މުޅި ރައްޔިތުންނަށް ޚިދުމަތް ކުރުމަށެވެ. ވެރިކަމުގެ އާރާއި ބާރުގައި ވެރިން ތިއްބެވި ނަމަވެސް، އެ މީހުންގެ ފެންވަރަކީ ރައްޔިތުންގެ ފެންވަރެވެ. އެ މީހުން ތިބީ ރައްޔިތުން ހަވާލު ކުރި މަސްއޫލިއްޔަތެއް އަދާ ކުރުމަށެވެ. އެމީހުންނަށް މުސާރަ އާއި އިނާޔަތް ދެނީ ރައްޔިތުން މަސައްކަތް ކޮށްގެން ދައްކާ ޓެކްސް ފައިސާ އިން ނެވެ.
ޑިމޮކްރެސީގެ ރިވެތި ނަމުގައި ވެރިކަމަށް ވަޑައިގެން، ދައުލަތުގެ އެންމެހައި ބާރުތައް އެންމެ މީހެއްގެ މުށުތެރެއަށް ޖަމާކުރަމުންދާ ދިއުމަކީ ތާރީހުގައި ހިނގާފައިވާ ހުދުމުހުތާރު ވެރިކަންތަކުގެ ހަނދާންތައް އާކޮށްދޭ ކަމެކެވެ. މިއީ އެފަދަ ވެރިއެއްގެ 'ހިކުމަތްތެރިކަމަށް' ތައުރީފުކޮށް ބޯޖަހާ މީހުންނަށް ގަބޫލުކުރަން އުނދަގޫވި ވިޔަސް، ރައީސް މުއިއްޒުގެ ވެރިކަމުން ފެންނާން އޮތް ބިރުވެރި ހަގީގަތެވެ.
ނިމިގެން މިދިޔަ 2025 ވަނަ އަހަރަކީ މުއިއްޒު ހުދުމުހުތާރު އުސޫލުތައް ގިޔަރަކަށް ފަހު ގިޔަރެއް މަތިކުރަމުން ގޮސް، ވަރަށް ފުރިހަމަ އަށް އެކަން ފެނިގެން ދިޔަ އަހަރެކެވެ. އެއްގޮތުން ނުވިއްޔާ އަނެއްގޮތުންވެސް އެ ކުރަން ބޭނުންވާ ކަމެއް ކޮށްފާ ނޫނީ ހުއްޓާނުލާކަން ސާފުވެ އެވެ. ރައްޔިތުން ރުހުނަސް ނުރުހުނަސް ކަންކުރަނީ ބޭފުޅާއަށް ފެންނަގޮތަކަށެވެ.
ގާނޫނު ހެދުމުގެ ބާރާއި އަދުލު އިންސާފު ގާއިމު ކުރުމުގެ ބާރުގެ އިތުރުން ވެރިކަން ކުރުމުގެ ބާރު އޮންނަނީ މުޅީން ވަކީންނެވެ. އެއީ މަޖިލީހާއި ޝަރުއީ ކޯޓުތަކާއި ރައީސުލްޖުމްހޫރިއްޔާ އެވެ. އެ ހުރިހާ ބާރެއް ވެސް ފެށިގެން އަންނަނީ އަދި ދެމި އޮންނާނީ ވެސް ރައްޔިތުންގެ ކިބައިގައި ކަމަށް ބަޔާން ކޮށްފައި އޮންނަނީ ގާނޫނުއަސަސީގެ ހަތަރުވަނަ މާއްދާގަ އެވެ.
ޑިމޮކްރަޓިކް ނިޒާމެއް ޤަބޫލު ކޮށްގެން ތިބޭ މުޖުތަމައެއްގައި، ހުދުމުހުތާރުކަން ވެރި މީހާގެ ކިބައިން ފެންނަން ފެށުމަކީ ބިރުވެރި ކަމެކެވެ. މީގެ ކުރިން އެކަން އޮތީ އާބާދީ ބޮޑެތި، ދުނިޔޭގެ ނިސްބަތުން ވެސް ބާރު ގަދަ ޤައުމު ތަކުގައި ކަމަށް ވިޔަސް، މިއަދު ކުދި އާބާދީ ތަކުން ވެސް އެކަން ފެންނަން ފަށައިފި އެވެ.
ދުނިޔޭގެ ތާރީޚަށް ބަލާއިރު ވެސް، ހުދުމުހުތާރު އެތައް ވެރިންނެއް ފެނިއްޖެ އެވެ. މިއަދު ވެސް، ދުނިޔޭގެ ޤައުމު ތަކުގައި ހުދުމުހުތާރުކަން މަތީ ވެރިކަން ކުރާ ވެރިން އެބަ ތިއްބެވެ. އެ ޤައުމު ތަކުގައި ކަން އޮންނަ ގޮތަކީ، ވެރި މީހާގެ ހިތަށް އެރި ގޮތެވެ. ފަހަރުގައި، އަޅުގަނޑުމެންނަށް އެކަން އިހުސާސް ނުކުރެވިދާނެ އެވެ. އެއީ މިއަދާ ހަމައަށް އެ ފަދަ ތަޖުރިބާއެއް ކޮށްފައި ނެތީމަ އެވެ. އަނެއްކޮޅުން، ހުދުމުހުތާރު ވެރި ކަމެއް އުފެދެނީ ވެސް އެއް ދުވަހަކުން ނޫނެވެ. އޭގެ ކުރިން ވަރަށް ގިނަ ކަންކަން ހިނގާނެ އެވެ.
ރާއްޖޭގެ ވެރިކަން ކުރުމުގެ ނިޒާމު މިހައި ފުރިހަމަ އަށް ތަރުތީބުކޮށް ލިޔެފައި އޮތް ނަމަވެސް މި ފާއިތުވި ދެ އަހަރު ދުވަހުގެ ތެރޭގައި ޖުމްހޫރިއްޔަތުގެ އަސާސްތަކާ ނުކިއްސަރު އެތައް ކަމެއް ހިނގައިފި އެވެ. ވެރިކަން ކުރުމުގެ އެންމެހައި ބާރުތައް އެއް މޭޒެއްގެ ދަށުގައި ތަގުޅިވެ ބާރުވެއްޖެ އެވެ. ރައީސުލްޖުމްހޫރިއްޔާ މުހައްމަދު މުއިއްޒު ދިވެހީންގެ މަގުބޫލުކަން ހޯއްދެވީ މައިގަނޑު ދެ ތަސްވީރެއް ދައްކަވައިގެންނެވެ.
ކެމްޕޭނު ޕޯޑިއަމްތަކުގައި އެމަނިކުފާނު ވާހަކަދެއްވިއިރު، ސިފަކޮށްދެއްވި އެއް ތަސްވީރަކީ އޭރު ރާއްޖެ އޮތް ގޮތް ކަމަށް ބުނާ ތަސްވީރެކެވެ. އެއީ އިންޑިއާގެ "އަޅުވެތިކަމުގައި" އޮތް މިނިވަން ފަނޑިޔާރުގެއެއް ނެތް ރާއްޖެ އެކެވެ. އެ ރާއްޖޭގެ ގާނޫނު ހަދާ މަޖިލީހުގައި ވެސް ތިއްބެވީ ވަކި ގައުމަކުން ކޮންޓްރޯލް ކުރާ މެންބަރުންތަކެއް ކަމަށް މުއިއްޒު ތުހުމަތު ކުރެއްވި އެވެ.
އެއަށްފަހު ދެން އެމަނިކުފާނު ސިފަކޮށްދެއްވީ "ދިވެހީންގެ ރާއްޖެ" އޮންނާނެ ގޮތުގެ މަންޒަރެކެވެ. އެއީ ޝަރުއީ ކޯޓުތަކަށް އެއްވެސް ނުފޫޒެއް ނުފޯރުވާ ރާއްޖެ އެކެވެ. އެއްވެސް ގައުމެއްގެ ނުފޫޒެއް ނެތި ހިންގާ ވެރިކަމެއް އޮންނަ ރާއްޖެ އެކެވެ. މިނިވަންކަމާއެކު ރައްޔިތުންގެ ހައްގުގައި ވަކާލާތުކުރާ މަޖިލިސް މެންބަރުންތަކެއް ތިއްބެވި ރާއްޖެ އެކެވެ.
ސުވާލަކީ ކަންކަން ވެގެން ދަނީ "ދިވެހިންގެ ރާއްޖެ" ސިފަކޮށްދިން ގޮތަށް ހެއްޔެވެ؟
ވެރިކަން ކުރުމުގެ ބާރު ނުވަތަ ސަރުކާރު ޒިންމާދާރު ކުރުވުމަކީ ގާނޫނު ހަދާ މަޖިލީހުގެ ވާޖިބެކެވެ. އެ ކަންކަން އެގޮތަށް ކުރެވޭނީ ގާނޫނު ހަދާ މަޖިލީހަކީ މިނިވަން ތަނެއްގެ ގޮތުގައި އޮވެގެންނެވެ. އެހެންމަވެސް، މުއިއްޒު ވަނީ އެ މިނިވަންކަން މަޖިލިސް މެންބަރުންގެ ކިބައިން ނިގުޅައިގަނެ، ގާނޫނު ހެދުމުގެ ބާރު އަޅުވެތިކޮށްފަ އެވެ. މަޖިލީހާއި ސުޕްރީމް ކޯޓު ފައިދަށުލުމަށްފަހު މުއިއްޒު ދެން އަމާޒު ހިފީ މިނިވަން ނޫސްވެރިކަން މަރާލުމަށެވެ.
މީޑިއާތައް ކޮންޓްރޯލްކޮށް ހަގީގަތް ހާމަކުރުން ހުއްޓުވުމަށްޓަކައި އޭގެ ކުރިން ފެށިގެން ވެސް ސަރުކާރުން ދިޔައީ ސިއްރިއްޔާތުގައި މަސައްކަތްތަކެއް ކުރަމުންނެވެ.
މުއިއްޒު ވިދާޅުވާ ގޮތުން އެއްވެސް ކަމެއްގައި އެމަނިކުފާނުގެ ބައިވެރިވުމެއް ނެތެވެ. ހުސް އިއްތިފާގެވެ. އިއްތިފާގަކުން މި ނިމުނު 2025 ވަނަ އަހަރު ވެގެން މިދިޔައީ ހުރިހާ ބާރެއް މުށުތެރެއަށް ލައި ބާރުކޮށްލި އަހަރަކަށެވެ.
