މޫސާ އަލީ ޖަލީލު ގެ ޖަގަހަ ހުޅުވުމުގެ ޖަލްސާ އަށް، ކިރިޔާ ހުކުރު ހަމަވާ ވަރަށް ވެސް މީހުން އެއްވީ ސަރުކާރު ކުންފުނިތަކުގެ މުވައްޒަފުންނަށް މަޖުބޫރު ކޮށްގެން

މާލެ ސިޓީގެ މޭޔަރު ކަމަށް ސަރުކާރު ހިންގާ ޕާޓީ ޕީއެންސީ ޓިކެޓުގައި ވާދަކުރާ މޫސާ އަލީ ޖަލީލުގެ ކެމްޕެއިން ޖަގަހަ ހުޅުވުމުގެ ޖަލްސާ އަށް ދާނެ ބަޔަކު ނުވާނެ ކަން ސަރުކާރަށް ޔަގީން ވުމުން، އެ ޖަލްސާ އަށް ވެސް މީހުން ހަމަކުރީ އާދައިގެ މަތިން ސަރުކާރު ކުންފުނި ތަކުގެ މުވައްޒަފުންނަށް މަޖުބޫރުކޮށްގެން ކަން ހާމަ ވެއްޖެ އެވެ.

އާދީއްތަ ދުވަހުގެ ރޭ ހެންވޭރު ކޮޅުގައި ބޭއްވި މި ޖަލްސާ އަށް ހާޒިރުވީ ނިސްބަތުން މަދު ބައެއް ކަމަށާއި، އެ މީހުންގެ ތެރެއިން ބޮޑު އިންސައްތަ އެއް ހިއްސާކުރަނީ ސަރުކާރު ހިއްސާވާ ކުންފުނިތަކުގެ މުވައްޒަފުން ކަމަށް މައުލޫމާތު ލިބިފައިވެ އެވެ.

ރާއްޖެ އެމްވީ އަށް މައުލޫމާތު ދެއްވަމުން ސަރުކާރު ހިއްސާވާ ކުންފުންޔެއްގެ އިސް ވެރިޔަކު ވިދާޅުވީ މޫސާ އަލީ ޖަލީލުގެ ކެމްޕެއިން ޖަގަހަ ހުޅުވުމަށް ބޭއްވި ޖަލްސާ އަށް މަތިން އަންގައިގެން އެ ކުންފުނީގެ މުވައްޒަފުން ވެސް ދިޔަ ކަމަށެވެ. ސަރުކާރު ހިއްސާވާ އެހެން ކުންފުންޔެއްގެ އިސް ފަރާތެއް ރާއްޖެ އެމްވީ އަށް މައުލޫމަތު ދެއްވަމުން ވިދާޅުވީ ސަރުކާރަށް ތާއީދެއް ނެތުމުގެ ހުރިހާ އުނދަގުލެއް ކުރިމަތި ވަނީ ސަރުކާރު ހިއްސާވާ ކުންފުނިތަކުގެ މުވައްޒަފުންނަށް ކަމަށެވެ.

އަހަރުމެން ނުޖެހޭނެ ޕީއެންސީ ގެ ހުރިހާ ސިޔާސީ ހަރަކާތެއްގަ ބައިވެރި ވާކަށް. ބޮޑު މުސާރަ ދޭ ސިޔާސީ މުވައްޒަފުންނާއި މަޖިލީހުގެ މެމްބަރުން ޖެހޭނީ ޕީއެންސީ ގެ ޖަލްސާތަކަށް މީހުން ހަމަކުރަން. އެމީހުން ކުރަން ޖެހޭ ކަމެއް ނުޖެހޭނެ އަހަރުމެން ލައްވަ ކުރުވާކަށް. އެކަމު މިއަދު އަނގަޔާ އަތާ ދިމާ ކުރަން މި ވަޒީފާ ބޭނުން. އެހެންވީމަ ތަންކެއް ރީއްޗަށް ބުނާނަމަ "މަތިން" އެންގީމަ ޖަހާހާ ބެރަކަށް ނެށުން ނޫން ގޮތެއް މިއަދަކު ނެތް

ސަރުކާރު ހިއްސާވާ ކުންފުންޏެއްގެ އިސް ފަރާތެއް 

ޖަލްސާގައި ވާހަކަދައްކަވަމުން ކުރީގެ ޗީފް އޮފް ޑިފެންސް ފޯސް އަދި ކުރީގެ ޑިފެންސް މިނިސްޓަރު މޫސާ އަލީ ޖަލީލު ވަނީ ރައީސް މުއިއްޒަށް ވަރަށް ބޮޑަށް ސަނާ ކިޔުއްވާފަ އެވެ. އެގޮތުން އޭނާ މޭޔަރުކަން ކުރައްވާނީ މުއިއްޒުގެ މޭޔަރުކަން ނަމޫނާއަކަށް ބަލައިގެން ކަމަށާއި އަދި އޭނާ ގެ ހަޔާތުގައި ލިބުނު އެންމެ ބޮޑު ޝަރަފަކީ ޕީއެންސީ ޓިކެޓުގައި މާލޭގެ މޭޔަރުކަމަށް ވާދަކުރުމުގެ ފުރުސަތު ލިބުން ކަމަށް ވިދާޅުވި އެވެ.

މިރޭ މާތްالله ގެ ހަޒުރަތުން ވާގި އެދިހުރެ، މާލެ ސިޓީގެ މޭޔަރަކަށް އިންތިހާބުވުމުގެ ދަތުރު މި ފަށަނީ މި ސިޓީގެ ރައްޔިތުން އެންމެ ލޯބިވާ އިހުތިރާމު ބަލައިގެން ހުލްގުހެޔޮ ހީވާގި މޭޔަރަކު، ރައީސް ޑރ. މުހައްމަދު މުއިއްޒުގެ ފިޔަވަޅުފުޅު މަތިން، އެ މަނިކުފާނު ހިންގެވި މަގު ހިޔާރުކޮށް އެ މަނިކުފާނުގެ ހިންމަތާއި ހިތްވަރު ނަމޫނާއަކަށް އަދި އިން ފާހަގައަކަށް ބަލައިގެން.

މޫސާ އަލީ ޖަލީލު

އާދީއްތަ ދުވަހުގެ ރޭ ބޭއްވި ޖަލްސާގައި މާލޭގެ ދާއިރާތަކަށް ޕީއެންސީ ޓިކެޓުގައި ވާދަކުރާ ކެންޑިޑޭޓުން ވެސް ބައިވެރިވި އެވެ. ރާއްޖޭގެ ނައިބު ރައީސް ހުސެއިން މުހައްމަދު ލަތީފް ޝަރަފްވެރި ކޮށްދެއްވި މި ޖަލްސާގައި މޫސާ އަލީ ޖަލީލުގެ އިތުރުން ޕީއެންސީ ޓިކެޓުގައި މާލޭގެ އެކި ދާއިރާތަކަށް ވާދަކުރައްވާ ކެންޑިޑޭޓުން ވެސް ކުރު ވާހަކަކޮޅެއް ދެއްކި އެވެ.

ރައީސް މުއިއްޒުގެ ވެރިކަމުގައި ސަރުކާރު މުވައްޒަފުންނާއި ސަރުކާރު ހިއްސާވާ ކުންފުނިތަކުގެ މުވައްޒަފުންނަށް ބިރުދައްކާ ނުފޫޒު ފޯރުވައިގެން ސިޔާސީ ކަންކަމުގައި ބައިވެރިކުން ވަނީ އާދަޔާ ޚިލާފަށް އިތުރުވެފަ އެވެ. ސަރުކާރަށް ނެތް ތާއީދެއް މި ނޫން ގޮތަކަށް ނުދެއްކޭނެ ކަމަށް ރައީސް މުއިއްޒު ވެސް ގަބޫލުފުޅު ކުރައްވާކަމަށް އިދިކޮޅު ފަރާތްތަކުން ބުނެ އެވެ.